Po tung 2 hâi sap hâi lơ 23 troh lơ 24/9, Hâi leh pơxiâm pêi cheăng hơ’lêh nếo tơdroăng hriĕn plĕng ki nếo kong pơlê Dak Lak hơnăm 2024 (Techfest Dak Lak 2024) ai hên tơdroăng pêi pro mê cho: Mơđah, tơbleăng mâu tơdroăng tơkêa bro, tơmeăm pơxiâm vâ pêi cheăng, OCOP, kơmăi kơmok thôn pơlê, tơdroăng ki pêi pơxúa ăm hyôh hyô; mâu rôh po hôp tơpui tơno ‘na pơxiâm pêi cheăng hơ’lêh nếo hriăn plĕng, pơxiâm pêi cheăng ngiât, troăng hơlâ mơhnhôk pơxiâm pêi cheăng tung mâu kơvâ cheăng, mâu khu ngế...

Kố cho tơdroăng ki châ tơkŭm po rêm hơnăm, vâ pro tơ’lêi rôh trâm mâ tơpui tơno ƀă dêi rơpó tung kuăn pơlê mơngế ki pơxiâm pêi cheăng, tơdjêp ƀă tơdroăng ‘no liăn cheăng, tăng khu tơrŭm cheăng, po rơdâ kơchơ tê mơdró.

Tung tơdroăng Hâi leh pơxiâm pêi cheăng hơ’lêh nếo tơdroăng hriăn plĕng ki nếo kong pơlê Dak Lak hơnăm 2024, Khu xiâm ngăn tê mơdró kong pơlê Dak Lak tơkŭm po Hôp tối mơgêi tơdjêp tê mơdró, tê tơmeăm pêi lo hơnăm 2024. Hneăng hôp tơpui mâu tơdroăng vâ pêi  mâu pơkâ mơhnhôk, tơbleăng lâp lu ƀă mơnhông tơƀrê ing tơdroăng vâ pơxiâm pêi cheăng, ing tuăn vâ mơngế mơdró kâ tung mâu khu râ kuăn pơlê ƀă tơdroăng pơxiâm pêi cheăng hơ’lêh nếo, tơdjêp ƀă mâu ngế xiâm ngăn ‘na hệ sinh thái, mâu khu cheăng khoa hok ƀă khu rak ngăn, kuăn pơlê mơngế mơdró kâ vâ veăng gum, mơhno troăng mơnhông tơƀrê tơmeăm pê lo. Veăng hôp, pôa Đường văn Quân, Ngế pơkuâ Kŏng ti veăng tơlo liăn pro trếo kơhiâm Cao Nguyên tối:

“Tung tơdroăng kố á vâ tối ăm tíu pêi cheăng ki nếo pơxiâm pêi cheăng lơ pơxiâm ai mâu tơmeămtơbleăng tê a kơchơ vâi thế hlo mâu tơdroăng vâ tơbleăng tê tơmeăm a kơchơ mê ti lâi.  Ing tơdroăng pơxiâm tơmiât, troh chêh a tơdrong tâ tơmeăm, mâu hlá mơ-éa ki tơdjâk troh ‘na luât ‘na tơmeăm ki mê drêng vâi vâ tơbleăng tê a kơchơ. A ai môi  khu vâi pú vâ veăng kơjo kum hnê kơtê ôh tá ăm liăn”.

Rôh kố, a pơlê kong kơdrâm Ƀuôn Ma Thuột xuân po Hôp tơpui ‘na tơdroăng mơdêk hệ sinh thái pơxiâm pêi cheăng ƀă tơdroăng hriăn plĕng ki nếo dêi kong pơlê Dak Lak. Veăng hôp mê, ai Phŏ yăo sư Tiê̆n sih Lê Đức Niêm, Kăn phŏ pơkuâ hngêi trung Đại học Tây Nguyên tối tiah kố, hệ sinh thái pơxiâm pêi cheăng hơ’lêh nếo hriĕn plĕng ki nếo a Dak Lak dế a râ má 2, cho râ ki nếo pơxiâm, hâi pê klêi. Xua mê, kal pơtối pê klêi  tơdrêng, mơjiâng mâu tơdroăng ki xiâm ‘na liăn, hnê pêi pro...

“Ki hdrối athế ai tŭm, thế ai tŭm mâu tơmeăm môi tiah hngêi trung đăi hok, khu mơdró ki djâ troăng pêi hdrối, mâu kơ koan khu râ kơvâ cheăng, malối, thế ai troăng mơhno hdrối dêi kong pơlê, tung mê ai mâu ngế ki kơhnâ vâ khât vâ mơdêk hệ sinh thái pơxiâm pêi cheăng mơnhông tơbrê. Má péa, cho pêi trâu tâ, mâu tơdroăng vâ pêi ôh tá xê to tơpui to ƀă rơkong, thế tơpui hlôi pêi khât, kum mâu khu mơdró mơnhông pêi cheăng. Tâng mơnhông hệ sinh thái pơxiâm pêi cheăng lĕm tro khu mơdró kô ‘nâi tơmiêt xêh tung tơdroăng hệ sinh thái ‘na nhâ têa kuăn kiâ  mê’’.

Tung mâu hâi Leh pơxiâm pêi cheăng hơ’lêh hriăn plĕng ki nếo kong pơlê Dak Lak hơnăm 2024, mâu tíu pêi cheăng hiăng mơhno, tơbleăng vâ chê 150 khu tơmeăm ki nếo pơxiâm pê lo, tơmeăm OCOP, pêi cheăng ƀă kơmăi a thôn pơlê, tơmeăm pê lo pơxúa ăm tơdroăng ôm hyô dêi mâu tíu pêi cheăng tung kong pơlê.

Pôa Nguyễn Tuấn Hà, Kăn phŏ hnê ngăn Vi ƀan kong pơlê Dak Lak khê̆n kơdeăn, tơdroăng pêi tơƀrê dêi hâi leh cho xiâm ki mơhnhôk vâ ai tuăn mơ-eăm pêi cheăng pêi lo tơmeăm  tung mâu khu râ kuăn pơlê, hok tro, sinh viên. Mơhnhôk ai tuăn ‘nâi tơchĕng troh hriăn plĕng ki nếo dêi kong pơlê rế ton rế krá kak, ai khât ƀă hlối tơƀrê.

“ Mâu rôh hôp tơpui tơno tơpui trâu mâu tơdroăng kal, mê cho hôp tơpui tơdroăng tơdjâk hơ’lêh nếo mê hngêi trung Đại học Tây Nguyên kô tơmâng hơ’lêh nếo tung hok tro sinh ‘na Khu xiâm Pơkâ ƀă ‘no liăn cheăng mê hơ’lêh tơdroăng hriăn plĕng ki nếo tung khu mơdró, khu pêi cheăng tơrŭm. Drêng tơmâng pêi khât tiah mê kô pro pơxúa. Mâu tơmeăm dêi vâi pú pơxiâm pêi lo tê mơdró xuân rế hên, mơnâ mâ ngăn ƀă rế pơxúa,  troh hên khu râ kuăn pơlê’’.

Tơkéa vâ tối, mâu tơdroăng pêi pro kơjo kum pơxiâm pêi cheăng a kong pơlê hiăng pro ai pơxúa khât, veăng mơjiâng hệ sinh thái pơxiâm pêi cheăng dêi Dak Lak mơnhông tâ, tơbleăng troh lâp lu ai tuăn hriăn tơmiât vâ pêi cheăng tung mâu khu râ kuăn pơlê.