VOV4.Xơ Đăng - Pôa Phạm Minh Chính, Ngế pro xiâm hnê ngăn tơnêi têa nếo kĭ Pơkâ ‘na tơdroăng rah xo pôa Y Vinh Tơr, Kăn cheăng tung Tíu xiâm Đảng, Kăn cheăng tung Khu pơkuâ tơdroăng cheăng Đảng kong pơlê, Kăn hnê ngăn Hô̆i đong kong pơlê, Kăn pơkuâ Khu kăn teăng mâ Kuô̆k hô̆i hneăng má XV kong pơlê Dak Lak to pro Ngế xiâm phŏ, Kăn phŏ pơkuâ Vi ƀan hdroâng kuăn ngo.

Rah xo pôa Y Vinh Tơr to pro Ngế xiâm phŏ, Kăn phŏ pơkuâ Vi ƀan hdroâng kuăn ngo

Pôa Y Vinh Tơr kot mâ hơnăm 1976; pơlê xiâm kong pơlê Dak Lak. Hriâm lĭ luâ̆n Chính trị cao cấp. Hriâm kân cho thak sih Quản lý công, Kih sư Lâm Nghiệp. Pôa Y Vinh Tơr ai hâi khế pêi cheăng a Tỉnh Đoân Dak Lak ƀă hiăng pro hên kăn a mâu kơ koan tung kong pơlê. A hneăng hôp Kăn teăng mâ lâp tơnêi têa roh má XIII dêi Đảng, pôa Y Vinh Tơr châ rah xo pro Kăn cheăng tung Tíu xiâm Đảng. Sap khế 3/2021 – 6/2021, pôa cho Kăn phŏ hnê ngăn Hô̆i đông kong pơlê Dak Lak. Sap khế 7/2021 – 6/2022 pôa cho Kăn hnê ngăn Hô̆i đong kong pơlê Dak Lak; Kăn teăng mâ Kuô̆k hô̆i hneăng má XV ƀă Kăn pơkuâ Khu kăn teăng mâ Kuô̆k hô̆i kong pơlê Dak Lak.

            A Sa Ly tơplôu ƀă tơbleăng