10 khế hdrối, tâi tâng tơmeăm tê ‘ngré ƀă kơxô̆ liăn châ xo ing tê tơmeăm xúa riân tâk 9,4% tâng vâ pơchông ƀă hơnăm 2022. Khu xiâm ngăn tê mơdró tối, a la ngiâ, tơdroăng tê mơdró tung lâp plâi tơnêi kô ối hên ki pơ’lêh.

Vâ tơniăn tơdroăng tê rôe mâu tơmeăm kal vâ xúa, rak tơniăn yă tê a mơ’nui hơnăm 2023 ƀă rôh Têt Lo hơnăm nếo Giáp Thìn hơnăm 2024, Khu xiâm ngăn tê mơdró pơkâ thế Khu xiâm ngăn ‘na mơdró kâ mâu kong pơlê, pơlê kong kơdrâm dêi Tíu xiâm, mâu tíu pêi cheăng, Khu kơvâ tê tơmeăm rĕng ai pơkâ pêi pro, tê mơdró, mâu troăng rơhlâ mung hdrối tơmeăm tê ƀă pro tơniăn yă tê tơmeăm, hbrâ ai troăng rơhlâ tơniăn tơdâng tíu tê, tơniăn, pôi tá ăm ai tơdroăng ôh tá bê tơmeăm, lơ chía to kơnâ yă tung mơ’nui hơnăm ƀă Têt Lo hơnăm nếo.