Kơ’nâi 3 hơnăm pêi pro tơdroăng tơrŭm cheăng hnê tối, Rơ’jíu Việt Nam hiăng tơkŭm chêh lối 3 rơpâu tơdroăng nếo ai, ƀai, chêh xo mơnhên rơdâ, êng - tiâ mơnhên, tơpui mo’no tơdrêng ‘na mâu tơdroăng cheăng kâ, túa lĕm tro, rêh ối pơlê pơla, kring vế tơniăn – ‘na cheăng lêng tung kong pơlê Dak Lak. Hlối mơ’no 1 rơpâu 816 tơdroăng chuyên đề nâl kuăn ngo, tung mê ai: 908 tơdroăng mơ’no ƀă nâl Rơđế ƀă 908 tơdroăng mơ’no ƀă nâl M’Nông, péa nâl ki ai kuăn pơlê hên a kong pơlê Dak Lak. Tung 6 khế apoăng hơnăm 2023, Rơ’jíu  Việt Nam hiăng ai 480 tơdroăng chêh mâu tơdroăng nếo ai,  mâu ƀai tŭm túa tối ‘na mâu tơdroăng cheăng kâ, kal kí kring vế tơniăn cheăng lêng dêi kong pơlê.

Tung pơla nốkố tơdroăng kal kí tung kong pơlê a mâu tơring dêi kong pơlê Dak Lak ai tơdroăng ôh tá tơniăn, Rơ’jíu Việt Nam hiăng ăm hên chôu mơ’no mâu tơdroăng nếo ai, mâu ƀai ki tơtro tối ‘na plâ mơdât mâu ngế ki pơlông djâ tối mâu tơdroăng ôh tá tro, ai khu ‘mêi ki kơneăm tí tăng lông mơhnhôk djâ pro tơdroăng ôh tá tro; tối ‘na tơdroăng pêi pro dêi kuăn pơlê ing mâu tơdroăng ăm hlo ôh tá tơniăn ƀă tơdroăng ‘nâi sĭng hmréa dêi mâu ngế ki tro hyông troăng.

Tối tơbleăng a rôh hôp, pôa Đỗ Tiến Sỹ, Ngế cheăng tung Tíu xiâm Đảng, Ngế pơkuâ xiâm Rơ’jíu Việt Nam khĕn kơdeăn, 3 hơnăm tơrŭm cheăng, tơdroăng tơrŭm hnê tối tiô troăng rơhlâ, tơdroăng hnê pêi pro, troăng dêi Đảng, luât pơkâ tŏng kum, luât dêi Tơnêi têa  troh kuăn pơlê tung kong pơlê Dak Lak châ pêi pro tŭm tâi tâng ƀă rơkê tâ. Kong pơlê Dak Lak hiăng ƀă dế pro tơ’lêi hlâu ăm mâu ngế chêh hlá tơbeăng dêi Rơ’jíu Việt Nam veăng chêh mâu tơdroăng tung kong pơlê. Pakĭng mê, kong pơlê hiăng teăm tối tŭm tâi tâng mâu tơdroăng ki hlá tơbeăng tơmâng chêh tá tơdroăng rêh ối, túa lĕm tro, tơdroăng kal kí, cheăng kâ, rêh ối, ‘na lêng kring gak tơniăn bâ mâu ngế ki hmâng rơ‘jiu ‘nâi môi tiah hlo khât mâu tơdroăng mê, ƀă hlối hlê tro nhên tâ.

Pôa Đỗ Tiến Sỹ, Ngế pơkuâ xiâm Rơ’jíu Việt Nam tối, Rơ’jíu Việt Nam hiăng ƀă kô đi đo rơtế ƀă kong pơlê Dak Lak tung tơdroăng mơdêk tâ nếo chêh tối mâu tơdroăng nếo ai, hnê tơbleăng mâu tơdroăng tung hyôh rơ’jíu. Tung mê tơmâng hên tâ cho mâu tơdroăng, luât pơkâ tŏng kum ai krê xêh dêi kơpong Tây Nguyên ƀă Dak Lak:

 “Tung la ngiâ, ngin xuân rơtế ƀă vâi pú tơmâng pêi pro tro tiô mâu tơdroăng Pơkâ dêi Tíu xiâm Đảng, hnê mơhno dêi Chin phuh, tơdroăng hnê dêi khu hnê mơhno 35 ‘na hbrâ mơdât khu ‘mêi ki hriăn pro tơ’nhiê tơdroăng hơniâp, klêi mê luât pơkâ ’na hdroâng kuăn ngo, 3 tơdroăng pơkâ dêi tơnêi têa. Malối cho tối mơgêi 67 dêi Khu xiâm Kal kí, Pơkâ 103 dêi Chin phuh ƀă Pơkâ 72 dêi Kuô̆k hô̆i ‘na mơnúa pơkâ luât tŏng kum krê ăm pơlê kong kơdrâm Ƀuôn Ma Thuột, la ngiâ kô ah ngin kô veăng rơtế ƀă vâi pú pêi hnoăng cheăng hnê tối ăm tơtro ƀă mâu tơdroăng nếo ai ăm tơtro tâ’’.

Hvái ngăn 3 hơnăm pêi pro tiô tơdroăng tơrŭm cheăng, pôa Nguyễn Đình Trung, Ngế cheăng tung tíu xiâm Đảng, Kăn hnê ngăn Đảng  kong pơlê  Dak Lak ăm ‘nâi, mâu hlá tơbeăng dêi rơ’jíu Việt Nam chêh tối ‘na tŭm tơdroăng cheăng dêi kong pơlê Dak Lak  hiăng mơhno ăm hlo khât ƀă châ hên ngế khĕn kơdeăn. Malối, tơdroăng Rơ‘jíu Việt Nam ai hên tơdroăng mơ’no ƀă nâl kuăn ngo a Dak Lak ƀă kơpong Tây Nguyên cho tơdroăng ki kal vâ mơdêk pêi tơƀrê tơdroăng hnê tối ƀă kuăn pơlê a mâu pơlê cheăm.

Tơdroăng tơrŭm krá nhên hiăng kum pêi tro tơdroăng nếo ai, hnê tối tung tŭm tơdroăng cheăng kâ - túa lĕm tro, rêh ối pơlê pơla, tơniăn tơdroăng cheăng lêng kring gak kong pơlê. Ing mê, veăng ‘no hnoăng kal tung mơdêk ki rơdêi dêi kong pơlê, mơnhông kuăn pơlê ai tuăn loi a tơdroăng cheăng hnê mơhno dêi râ pơkuâ Đảng, mâu kăn pơkuâ cheăm bêng, mơnhông cheăng kâ, mơhno túa lĕm tro, rêh ối pơlê pơla dêi kong pơlê.

Cho kong pơlê ai troh 49 hdroâng kuăn ngo nhŏng o, tơdroăng vâ ’nâi mâu tơdroăng, tơdroăng hnê tối a Dak Lak gá hên. Xua mê, Kăn hnê ngăn Đảng kong pơlê Dak Lak xuân pơkâ thế, tung la ngiâ, Rơ’jíu Việt Nam pơtối po rơdâ mâu tơdroăng hnê tối. Tung mê, kal khât tơdroăng nếo ai tơdroăng tơkŭm pêi tiô troăng rơhlâ hnê mơhno luât dêi Đảng ƀă Tơnêi têa a pơlê cheăm bêng tung kong pơlê:

 “Tung pơla tơkŭm pêi pro mâu luât pơkâ tŏng kum dêi Tơnêi têa a pơlê cheăm bêng mê ăm hlo nhên mâu tơdroăng xơpá tơvâ tơvân, ai mâu luât pơkâ pêi, luât pơkâ tŏng kum drêng xúa pêi a mâu pơlê cheăm kơpong Tây Nguyên mê ai mâu tơdroăng ối tơvâ tơvân. Tơdroăng mê mơhno nhên ing mâu tơdroăng pơkâ dêi tơnêi têa klêi mê ‘na tơdroăng ki ê. Mâu pơlê cheăm tơring kong pơlê xuân púi vâ VOV, malối VOV Tây Nguyên kal ai rơkong tơpui, kal ai mâu tơdroăng chêh tối rơdêi tâ nếo ‘na mâu tơdroăng ki ôh tá tro, tơvâ tơvân, lơ mâu tơdroăng tơvâ tơvân hâi pêi tơƀrê tung tơdroăng tơkŭm tối tơbleăng pêi pro mâu luât pơkâ tŏng kum vâ mơnhông tơƀrê kơpong Tây Nguyên”.

Drêng troh rôh hôp mơgêi 3 hơnăm pêi pro tơdroăng tơrŭm cheăng ƀă kong pơlê Dak Lak, Ngế pơkuâ xiâm Rơ’jíu Việt Nam hiăng diâp Kỷ niệm chương xua tơdroăng tơpui mơ’no tung rơ’jíu ăm mâu pôa Nguyễn Đình Trung, Ngế cheăng tung tíu xiâm Đảng, Kăn hnê ngăn Đảng kong pơlê; pôa Phạm Minh Tấn, Kăn phŏ hnê ngăn Đảng kong pơlê; pôa Phạm Ngọc Nghị, Kăn hnê ngăn Vi ƀan kong pơlê; ƀă pôa Nguyễn Tuấn Hà, Kăn phŏ hnê ngăn Vi ƀan kong pơlê.

Xuân rôh kố, Rơ’jíu Việt Nam hiăng pro diâp ăm kong pơlê Dak Lak 3 toăng hngêi rŭm tuăn kơnâ 300 rơtuh liăn.