Hneăng hôp cho tơdroăng kal kí ki kân dêi rơxông ối nếo, hâi leh tơrŭm môi tuăn tâi tâng mâ khu Droh rơtăm Việt Nam pâ nhuô̆m tơnêi têa, mơnhên troăng mơnhông nếo dêi khu tơrŭm Khu ƀă tơdroăng droh rơtăm. Ƀă hdró mơnhên ƀă rơkong pêi pro: “Droh rơtăm Việt Nam pâ nhuô̆m tơnêi têa – tơdroăng pói vâ – tơrŭm môi tuăn – djâ troăng ahdrối – tơmiât pêi rơkê – loi tơngah mot tung rơxông nếo’’.

Hneăng hôp Khu pơkuâ Droh rơtăm Việt Nam roh má 9 tơkŭm mơjiâng mâu khu hnoăng cheăng, troăng pêi tung tơdroăng pêi pro tơdroăng ‘’Á pâ nhuô̆m tơnêi têa á’’ ƀă tơdroăng “Mơjiâng Khu droh rơtăm Việt Nam ó rơdêi’’. Tung hâi lơ 17/12, Hneăng hôp hiăng tơpui tơno môi tuăn rah xo 135 ngoh, nâ veăng Vi ƀan Khu xiâm Khu pơkuâ Droh rơtăm Việt Nam hneăng má 9; tơpui tơno môi tuăn rah 8 ngoh, nâ veăng Vi ƀan Séa ngăn Khu hneăng má 9.

Mâu kăn teăng mâ xuân hiăng veăng 6 tôh tơpui tơno ‘na mâu tơdroăng pơxá, pơkâ mâu tơdroăng pêi dêi droh rơtăm tung hneăng la ngiâ.