Rôh hôp Khu mơdró kâ mơnhông krá ton (VCSF) 2023 ai inâi “Rôh tơ’noăng ngiât lâp plâi tơnêi: Sap ing tơdroăng cheăng tung la ngiâ troh tơdroăng ki tê mơdró krá ton”. Rôh hôp kố, tung mê ai rôh hôp ‘na tơdroăng ki châ tơkŭm po a kơxo má ƀă Rôh hôp tâi tâng châ tơkŭm po a kơxê rơtế tung hâi.

Mâu tơdroăng ki kal châ tơpui tơno a Rôh hôp hơnăm kố cho: mơdêk hơ’lêh on tơhrik krá ton; mơdêk rơdêi rôh tơ’lêi vâ mâu khu mơdró kâ tơpui tơno, pơkâ mơ’no mâu tơdroăng ki pâ thế, troăng hơlâ troh mâu kơ koan ki ai tơdjâk tung tơdroăng ki mơdêk ivá tơxup tơbriât, mơdêk tơdroăng ki mơnhông krá tơniăn dêi khu mơdró kâ tối krê ƀă dêi tơnêi têa tối tơdjuôm.

Rôh hôp kố tơ’mot 250 ngế kăn veăng hôp tơdrêng ƀă dâng 300 ngế kăn veăng hôp ing troăng hyôh internet tung mê ai mâu kăn teăng mâ dêi mâu kơ koan, khu râ pơkuâ cheăng, teăng mâ mâu khu tơpui kâ, mâu khu tơrŭm kong têa ê ƀă mâu khu mơdró kâ, khu tơrŭm tê mơdró tung lâp tơnêi têa, mâu khu ki rơkê plĕng ƀă mâu kơ koan chêh hlá tơbeăng, um tơvi, rơ’jíu.