VOV4.Xơ Đăng - Kơxo lơ 25/4, Vi ƀan Séa ngăn Tơnêi têa tơkŭm po rôh hôp lâp tơnêi têa tơpui ‘na hnoăng cheăng séa ngăn hneăng má 1 hơnăm 2022, tơbleăng hnoăng cheăng hneăng má 2 hơnăm 2022 tiô tơdroăng ki ‘no tơdrêng ing um tơvi, rơ’jíu ƀă hyôh Internet a mâu tíu mơ’no tung lâp tơnêi têa. Jâ Trần Cẩm Tú, Ngế cheăng tung tíu xiâm kal kí, kăn pơkuâ ngăn tíu xiâm Đảng, kăn pơkuâ Vi ƀan Séa ngăn Tơnêi têa pơkuâ po rôh hôp a tíu ki mơ’no Hà Nội. Hneăng má 1 hơnăm 2022, kơxô̆ mâu rôh séa ngăn rêm râ tâk tâng pơchông ƀă khế kố hơnăm nah, malối cho séa ngăn drêng hlo tơdroăng ki ai pro xôi.

Hnoăng cheăng séa ngăn ai hên hơ’lêh nếo, tơtrŏng vâ mơdêk ki rơkê plĕng, tơƀrê tung séa ngăn; tơdroăng ki pơkâ tơleăng pơsăm tối, pơsăm tơkêng teăm tơdrêng. Vâ pêi klêi tơdroăng, túa pơkâ hnoăng cheăng hơnăm 2022 pơkâ mơ’no, Vi ƀan Séa ngăn Tơnêi têa pơkâ mơ’no hnoăng cheăng ki nhên, tung mê pơkâ thế râ Đảng, Vi ƀan Séa ngăn rêm râ athế hbrâ rơnáu, kơtăng tâ nếo tung pơkuâ, hnê mơhno ƀă tơkŭm pêi pro hnoăng cheăng séa ngăn ƀă pêi pro pơxâu phâk, veăng kum kơhnâ tung hnoăng cheăng mơjiâng, ‘mâi rơnêu Đảng ƀă khu pơkuâ tơdroăng kal kí.

Katarina Nga tơplôu ƀă tơbleăng