VOV4.Xơ Đăng - Kơxo lơ 11/5, a Hngêi Kuô̆k hô̆i, pơxiâm po rôh hôp 11 dêi Vi ƀan pơkuâ Kuô̆k hô̆i. A rôh hôp kố, Vi ƀan pơkuâ Kuô̆k hô̆i ăm rơkong veăng tơpui tối ƀă 11 tơdroăng ki kal. Tung mê, ki rơhêng vâ tối cho hlá mơéa pơchuât tơbleăng ‘na cheăng kâ rêh ối pơlê pơla ƀă liăn ngân tơnêi têa hơnăm 2021 ƀă tơdroăng pêi pro mâu khế apoăng hơnăm 2022. Malối, a rôh hôp kố, Vi ƀan pơkuâ Kuô̆k hô̆i ăm rơkong veăng tơpui tối ‘na tơdroăng ki pơtroh ăm Kuô̆k hô̆i séa ngăn, pơkâ troăng hơlâ ‘no liăn cheăng tung tơdroăng tơkêa Vành đai 4 kơpong Pơlê kong xiâm Hà Nội, Tơdroăng tơkêa pro troăng châu Đốc – Cần Thơ – Sóc Trăng; tơdroăng tơkêa pro troăng Khánh Hòa - Ƀuôn Ma Thuột; ƀă tơdroăng tơkêa pro troăng Biên hòa – Vũng Tàu. Kố cho mâu tơdroăng tơkêa ki kal dêi tơnêi têa ối tung pơkuâ dêi Kuô̆k hô̆i pơkâ troăng hơlâ ‘no liăn pro, ai xúa hên kơxô̆ liăn tơnêi têa, kong pơlê, kơxô̆ liăn ‘no cheăng tơdjuôm krâ kơvâ khế hơnăm ối tung kơxô̆ liăn ki mơhnhôk cheăng kâ.

Katarina Nga tơplôu ƀă tơbleăng