VOV4.Xơ Đăng - Kơxo lơ 14/7, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ roh hôp má pái Khu hnê mơhno tơnêi têa pêi pro tơkêa dêi Việt Nam a Hneăng hôp COP26. Xông tơpui a roh hôp, pôa Phạm Minh Chính pơkâ thế Khu hnê mơhno pêi pro tơtro mâu hnoăng hiăng pơkâ mơ’no, tah lôi mâu tơdroăng pá puât, mâu troăng pơkâ pêi, troăng hơlâ luât pro tơ’lêi hlâu pêi pro mâu tơkêa dêi Việt Nam a COP26.

Roh hôp má 3 Khu hnê mơhno tơnêi têa pêi pro tơkêa dêi Việt Nam a Hneăng hôp COP26

Ngế pro xiâm hnê ngăn tơnêi têa xuân pơkâ thế mâu kăn teăng mâ tơpui tơno tơkŭm tro tơdroăng, tơpui tơdroăng ki xiâm, ki kal cho pơkâ mơ’no mâu troăng pêi, mâu khu xiâm, kơvâ cheăng tiô tơdroăng cheăng, hnoăng tơkŭm pêi pro. Mâu kong pơlê xuân hiăng hlê plĕng ƀă tơkŭm pêi pro, hlê plĕng tŭm ‘na mâu tơkêa a Hneăng hôp COP26, ki rơhêng vâ tối ‘na pơkâ kơdroh mơ’no trếo ki ‘mêi lo pakong kong prâi ‘’0’’ a hơnăm 2050 ing pêi pro mâu mơ-éa luât, mâu hlá mơ-éa hnê mơhno dêi kơ koan tơnêi têa.

A Sa Ly tơplôu ƀă tơbleăng