Hneăng hôp hiăng tơkŭm tơpui, môi tuăn mâu tơdroăng tối tơdroăng tơbleăng pêi tung hơnăm hdrối nah, malối mâu tơdroăng ki péa pâ hiăng tơleăng mơnhên klêi, mâu tơdroăng ối tơvâ tơvân, troăng rơhlâ tơleăng mơnhên xuân môi tiah mâu tơdroăng cheăng, troăng rơhlâ tung hơnăm 2024. Tối mơgêi a hneăng hôp, Péa ngế pro xiâm hnê ngăn tơnêi têa tối nhên kô mơ-eăm pêi kơtăng tơkŭm hnê mơhno mâu khu xiâm, kơvâ cheăng, kong pơlê, Khu mơdró, tíu pêi cheăng ki tơdjâk troh tơrŭm cheăng krá tơbleăng pêi tơƀrê  mâu tơdroăng tơhrâ, pơtối tơpui tơno tơ’lêi hlâu ăm khu mơdró péa tơnêi têa tơrŭm ‘no liăn cheăng, tê mơdró.

Péa pâ loi khât tiah kố, tơhrâ pơtối ki tơƀrê dêi rôh hôp kô pro xiâm kum tơrŭm cheăng kâ pơla péa tơnêi têa mơnhông tơƀrê, rế trâu rơdâ, pêi khât,  pơxúa, veăng ‘no hnoăng ôh tá la lâi pơtê tơrŭm ki kân, tơrŭm môi tuăn ƀă tơrŭm tung tŭm tơdroăng cheăng pơla Việt Nam - Lếo tung la ngiâ.