Tơpui a rôh po hneăng hôp, pôa Vương Đình Huệ, Kăn xiâm hnê ngăn Kuô̆k hô̆i pơkâ thế mâu kăn Kuô̆k hô̆i hriăn ngăn nhên, tơpui tối leăng, mơnhên tối tro khât, tơdrăng, tŭm têk mâu tơdroăng ki klêi kơ’nâi hiăng pêi pro klêi; mơhno nhên mâu tơdroăng ki tá hâi pêi pro klêi; pơkâ mơ’no, pleăng mâu troăng hơlâ tŏng kum vâ pêi klêi tro má môi dêi hơnăm 2023; séa ngăn, pơkâ kơlo, tơdroăng pơkâ ƀă mâu hnoăng cheăng, troăng hơlâ pêi pro túa pơkâ mơnhông cheăng kâ rêh ối pơlê pơla, liăn ngân tơnêi têa hơnăm 2024.

Pakĭng mê, Kuô̆k hô̆i kô séa ngăn, pơkâ ‘na tơdroăng ki ‘mâi rơnêu mâu tơdroăng ki kal dêi Pơkâ 53 ‘na Pơchuât tơbleăng hriăn ngăn mâu kơxop hlá mơ-éa ki xo tơvêh tơnêi, chêl thiê̆n, tŏng kum, vêh pro Tơraih tơƀai lâp plâi tơnêi Long Thành; séa ngăn klêi kơ’nâi pêi pro Pơkâ 43 ‘na troăng hơlâ liăn ngân, liăn ki kum Tơdroăng ‘mâi mơnhông ƀă mơdêk cheăng kâ rêh ối pơlê pơla; klêi kơ’nâi séa ngăn mâu luât tiô pơkâ thế a Pơkâ 101 dêi Kuô̆k hô̆i hneăng 15.

Kơxo lơ 23/10, a Hneăng hôp má 6, Kuô̆k hô̆i hneăng má XV, pôa Phạm Minh Chính, Ngế pro xiâm hnê ngăn Chin phuh hiăng tơbleăng tơdroăng châ tơƀrê pêi pro pơkâ mơnhông cheăng kâ - rêh ối pơlê pơla hơnăm 2023; tiô tối hdrối pơkâ mơnhông cheăng kâ - rêh ối pơlê pơla hơnăm 2024.

Tiô tơbleăng, cheăng kâ - rêh ối pơlê pơla pơtối tiô troăng tơniăn, hiăng châ pơkâ tâi tâng pơkâ mơ’no; Cheăng kâ Việt Nam pơtối cho tíu ki eăng dêi cheăng kâ lâp plâi tơnêi. Rak tơniăn cheăng kâ pơtối châ mơdêk; thăm xúa kŏng ngê̆; Mâu kơvâ cheăng mơhno khôi túa lĕm tro, rêh ối pơlê pơla châ tơmâng mơ’no liăn mơnhông, châ tơƀrê nhên tâ.

Ing tơdroăng châ tơƀrê dêi 9 khế, tiô tối plâ hơnăm 2023 mơ-eăm ki vâ iâ 10/15 túa pơkâ châ ƀă hluâ pơkâ mơ’no. Rơtế ƀă mê Ngế pro xiâm hnê ngăn tơnêi têa hiăng mơhno pơkâ tâi tâng, tơdrêng amê xuân tối nhên 12 hnoăng cheăng, troăng pêi ki xiâm hơnăm 2024 ƀă tung la ngiâ, tung mê tối rơdêi 15 túa pơkâ ki xiâm ‘na mâu kơvâ cheăng kâ, rêh ối pơlê pơla, kong prâi.