VOV4.Xơ Đăng - Hâi lơ 8/4, a pơlê kong kơdrâm Plei Ku, Khu xiâm ngăn chiâk deăng ƀă Mơnhông thôn pơlê tơrŭm ƀă Vi ƀan hnê ngăn kong pơlê Gia Lai tơkŭm po rôh hôp Tơdroăng ƀă troăng mơnhông pêt pôm loăng a Việt Nam. Nôkố, tơnêi têa pin ai lối 528 rơpâu ha pôm loăng, pêt ki hên a kơpong thông ƀă peăng kong ngo Bắc Trung Bộ, kơpong a kĭng têa kơxĭ Nam Trung Bộ, Tây Nguyên ƀă Đông Nam Bộ. Hơnăm 2021, pôm loăng tung lâp tơnêi têa vâ chê vâ chê 10,7 rơtuh tâ̆n, tung mê ai 2,9 tâ̆n châ tê ngi kong tê, kơxô̆ liăn pêi lo vâ chê 1,2 rơtuh dollars.

 Pôa Lê Quốc Doanh, ngế xiâm phŏ ngăn chiâk deăng ƀă mơnhông thôn pơlê

A rôh hôp, pôa Lê Quốc Doanh, ngế xiâm phŏ ngăn chiâk deăng ƀă mơnhông thôn pơlê ăm ‘nâi, tung la ngiâ ah, mâu tíu pêi cheăng dêi Khu xiâm ngăn chiâk deăng ƀă Mơnhông thôn pơlê kô mơdêk hriăn ngăn mâu hdrê pôm loăng ki nếo dâi lĕm, kâi trâng ƀă pơreăng. Ngế xiâm phŏ ngăn chiâk deăng pơkâ thế mâu kong pơlê ƀă khu mơdró kâ mơdêk tơkŭm pêt tiô troăng kơdroh liăn, mơdêk ki dâi lĕm, mơdêk kế tơmeăm; hơ’lêh nếo kơmăi kơmok, mơdêk uâ pơliê, rak vế kong prâi ƀă tơrŭm pêt krá tơniăn ton.

Katarina Nga tơplôu [ă tơbleăng