VOV4.Xơ Đăng - Kơxo lơ 7/4, kong pơlê Quảng Trị tơkŭm po leh chôu nhang tơbâ 115 hơnăm hâi kot mâ pôa Lê Duẩn, Kăn xiâm hnê ngăn Đảng hneăng apoăng (07/04/1907 – 07/04/2022) ƀă pơxiâm rơnêu, pro ăm i dâi lĕm kơpong tơbâ pôa Lê Duẩn. Vâ thăm mơdêk ki kơnâ khôi túa lĕm tro, hnoăng, mâu tơdroăng pleăng ki kân dêi pôa Lê Duẩn, Kăn xiâm pơkuâ hnê ngăn Đảng hneăng apoăng ƀă Đảng ƀă kăch măng, Chin phuh, mâu Khu xiâm, kơvâ xiâm tơnêi têa hiăng tơmâng mơ’no liăn mơjiâng kơpong tơbâ pôa Lê Duẩn a pơlê xiâm pôa a pơlê Hậu Kiên, cheăm Triệu Thành, tơring Triệu Phong, kong pơlê Quảng Trị, cho tíu hnê hriâm khôi túa pâ nhuô̆m tơnêi têa, kăch măng mâu rơxông ƀă cho tíu tăng troh ti tăng plĕng dêi pú hmâ lâp plâi tơnêi.

Kong pơlê Quảng Trị hiăng kĭ ăm pêi pro tơdroăng tơkêa bro rak vế, rơnêu pro ăm i dâi lĕm kơpong tơbâ pôa Lê Duẩn, Kăn xiâm pơkuâ hnê ngăn Đảng hneăng apoăng ƀă tâi tâng kơlo liăn mơ’no 45 rơtal liăn. Tơmeăm klêi kơ’nâi kêi đeăng tơniăn rak vế, nhuô̆m lôi tơmeăm ối tiah ton, ôh tá pro pơ’lêh tơmeăm, ki kơnâ ki hiăng ai sap ing nah.

A Sa Ly tơplôu ƀă tơbleăng