Tung mâu hâi khế 3 kố, hên lâm hriâm tơdrêng ƀă tá lâm hriâm ing troăng hyôh internet ‘na AI, pơhlêh kơxô̆ dế châ tơbleăng hnê ăm mâu droh rơtăm tung lâp tơnêi têa, tung mê ai droh rơtăm ki chó chêng tơvê kŏng, plôm mâ klêk tuăn. Mâu khu ki rơkê ‘na AI, ngế ki mơjiâng tơdroăng kal kơxô̆ ki châ vâi ô eăng hiăng hnê ‘na mâu tơdroăng ki tơ’lêi hlâu má môi, ai pơxúa má môi ƀă tơ’lêi xúa má môi tung tơdroăng cheăng rêm hâi dêi mâu ngế chó chêng tơvê kŏng.

Maluâ chó chêng ki râ ƀă prôk lăm thế kơto rơxế króu, la ngoh Đoàn Ngọc Chiến, pơlê xiâm Hà Tĩnh, ôh tá pơtê hriâm môi rôh ki lâi dêi mâu khu ki rơkê hnê. Hâk vâ tơmâng ƀă chêh ‘măn tung hlá mơ-éa mâu tơdroăng ki rơkê plĕng nếo, kal ăm tơdroăng cheăng rêm rôh veăng hriâm a lâm hriâm Bình dân học vụ kơxô̆ xua Khu ngăn Droh rơtăm Chó chêng tơvê kŏng Việt Nam tơkŭm po hnê, ngoh Chiến tối:

“Tơdroăng cheăng xiâm cho tê mơdró Petshop. Á hlo tê mơdró kơxô̆ rơkê plĕng nôkố dế mơnhông, malối cho tung mâu nền tảng tiktok, á púi vâ kô chiâng xúa kong ngê̆ AI tung tơdroăng mơnhông mâu tơdroăng ki kal, tơdroăng ki mơjiâng pro mâu video, viral ƀă hên ki ê. Drêng ‘nâi Khu ngăn droh rơtăm chó chêng tơvê kŏng Việt Nam tơkŭm po tơdroăng bình dân học vụ kơxô̆ ăm mâu ngế ki chó chêng tơvê kŏng, á hiăng chêh inâi hriâm, ngế ki chó chêng tơvê kŏng châ gum châ xúa hên mâu tơdroăng hên tâ troh kong ngê̆ AI, vâ tí tăng tơdroăng cheăng tơtro ƀă gum ăm dêi tơná. Á púi vâ klêi hriâm á kô chiâng pro xêh mâu tơdroăng ki kal, video viral mê ki ôh tá kal athế tơkôm a môi khu ki lâi ôh”.

Pakĭng tơdroăng cheăng tê mơdró mâu kế tơmeăm ăm mâu kuăn chó ki păn a Hà Nội, ngoh Đoàn Ngọc Chiến ối pro video a Tíu xiâm Hnê hriâm cheăng pêi ƀă Mơnhông ivá cheăng ăm mâu ngế ki chó chêng tơvê kŏng Việt Nam. Xua mê, drêng veăng tung lâm hriâm, ngoh Chiến hiăng châ mâu khu ki rơkê plĕng tơbleăng tối ‘na mâu túa ki xúa AI môi tiah Copilot ƀă mâu tơdroăng ƀă túa ki gá tŏng gum tơdroăng cheăng rêm hâi: ‘na tối tơbleăng nhên tơdroăng kal, tơmiât pêi rơkê; hbrâ tŭm mâu tơdroăng hriâm ƀă xúa vâ chêh pro hlá mơ-éa rĕng, ƀeăn vâ pơchuât tơbleăng, chêh pro túa tơmiât ƀă hên ki ê.

“Tơdroăng cheăng cho chêh mơ’no ƀai tung video dêi Tíu xiâm, pro mâu tơdroăng tơkêa vâ krếo thế tŏng gum; mơjiâng pro mâu tơdroăng cheăng tung la ngiâ ‘na mơnhông ăm tíu xiâm ƀă hên ki ê mê drêng veăng hriâm tung tơdroăng kố ƀă châ mâu khu ki rơkê ‘na AI hnê tiâ mơnhên, tŏng gum, á chiâng ‘nâi hên tâ troh kong ngê̆ kơxô̆ vâ tí tăng ‘nâi xêh ƀă tí tăng xêh tơdroăng ki rơkê dêi tơná vâ xúa tung tơdroăng cheăng dêi tơná, môi tiah copilot, á chiâng xúa tung chêh pro túa pơkâ tơdjuôm tung tơdroăng cheăng, chêh pro tơdroăng ki mơđah tơbleăng, mâu túa tơmiât pêi rơkê vâ mơnhông tơdroăng cheăng”.

Tiô mâu khu ki rơkê, tung to lâi hơnăm la ngiâ ai 65% tơdroăng cheăng nôkố kô pơhlêh xua kong ngê̆. Kố xuân cho rôh vâ ăm mâu rơxông droh rơtăm ki chó chêng tơvê kŏng Việt Nam châ xúa ƀă châ hriâm kơxô̆, tơmiât vâ pêi cheăng, tê mơdró Online, veăng tung mâu tơdroăng cheăng dêi pơlê pơla. Hlo tơdroăng kố, Khu ngăn Droh rơtăm ki Chó chêng tơvê kŏng Việt Nam hiăng chêh pro khu “Bình dân học vụ kơxô̆” tơkŭm mâu khu ki rơkê plĕng xiâm a hên kơvâ cheăng ki phá dêi rơpó môi tiah: AI, Blockchain, An toàn ƀă Bảo mật tơdroăng kal, Khu ki mơjiâng pro tơdroăng kơxô̆, Ngế ki tơpui tối leăng, Kơchuâ chêh đồ họa, lập trình ƀă hên ki ê veăng hriâm ‘na mâu tơdroăng ki xiâm má môi, xúa tơ’lêi hlâu má môi tung pêi cheăng ƀă tơdroăng rêh ối ăm droh rơtăm chó chêng tơvê kŏng ki rơkê plĕng. Ngoh Phạm Văn Thành, Kăn hnê ngăn Droh rơtăm chó chêng tơvê kŏng Việt Nam ăm ‘nâi:

“Ngin tơkŭm po mâu lâm hriâm ‘na hriâm tơdrêng, hriâm ing troăng hyôh internet tung 3 khế la ngiâ. Hâi kố rôh apoăng tơbleăng ‘na copilot dêi Microsoft. Pakĭng mê, ngin ối tơrŭm ƀă mâu tíu pêi cheăng ki ai ivá rơkê mâu vâi pú mơno kô pêi pro klêi tâi tâng tung mê hriâm xúa ‘na AI ƀă hên ki ê ƀă tơdroăng ki hbrâ mơdât tro vâi heâk pơloi đi đo tơbleăng mâu tơdroăng kal ‘na tơniăn tơdroăng kal, rak pơkí tơdroăng kal xuân môi tiah ƀă mâu rôh hnê tơdrêng kô gum tơdroăng ki kuăn pơlê hriâm pơhlêh kơxô̆ ăm vâi droh rơtăm chó chêng tơvê kŏng Việt Nam châ tơƀrê”.

 Mơhnŏng vâ veăng tung đô̆i “Pro tơ’lêi hlâu hriâm pơhlêh kơxô̆”, rêm ngế môi kơvâ cheăng châ hnê, tối ki rơkê plĕng ‘na AI, gum mâu ngế ki chó chêng tơvê kŏng plôm mâ klêk tuăn khên tơnôu tơrŭm ƀă pơlê pơla ƀă pơxiâm vâ pêi cheăng. Ing mê, vâi kô gum mâu ngế ki tá hâi ‘nâi ‘na pơhlêh kơxô̆ ‘nâi ‘na kơvâ cheăng ki nếo kố. Ngoh Lê Công Thành, ngế ki chêh pro tơdroăng tơkêa, “Bình dân hóa học AI” tối:

“Mâu ngế ki pêi cheăng tung pơlê pơla kố pơrá kal xúa tuăn ngoâ rơkê plĕng ki kuăn mơngế pro, a hên kơlo ki phá dêi rơpó: xúa tung tơdroăng cheăng lơ hriâm tâp, ai kơlo ki ê xúa tung tơdroăng rêh ối cheăng kâ rêm hâi. Pơtih môi kế kâ pin kô ‘nâi ham lươ̆ng trếo lĕm gá to lâi. Xua mê tơdroăng ki xúa tuăn ngoâ rơkê dế chal nôkố cho kal khât. Laga gá bu nếo khât, tá hâi ai hên ngế xúa. Kơvâ cheăng á cho kơvâ cheăng tuăn ngoâ rơkê. Á loi tơngah mơni kô tơdjâk ki rơkê plĕng dêi tuăn ngoâ rơkê ki kuăn mơngế pro ôh ti xê hên ngế ki chó tơvê kŏng a Việt Nam mê mơni kô ối veăng tối tơbleăng ki rơkê plĕng ăm mâu ngế ki tá hâi ‘nâi ‘na kong ngê̆ kơxô̆”.

Pơhlêh kơxô̆ dế ôh tá pơtê tơdjâk tung mâu kơvâ cheăng, po hên rôh tơ’lêi vâ mâu ngế ki chó chêng tơvê kŏng hbrâ rơnáu tâ tung tơdroăng ki xúa, hmâ ƀă xúa tung tơdroăng rêh ối rêm hâi, pro tơdroăng tơdâng tơ’mô tung pơlê pơla. Mâu lâm hriâm “ ‘na pơhlêh kơxô̆’’ dế rêm hâi, rêm chôu tơdjâk ki rơkê plĕng kơxô̆ tung droh rơtăm ki chó chêng tơvê kŏng tối krê xuân môi tiah tung tâi tâng kuăn pơlê, gum Việt Nam mơjiâng môi pơlê pơla kơxô̆ rơkê plĕng, hbrâ rơnáu mot tơrŭm ƀă mơnhông tơtêk.