Tơdroăng trâm xía vâ mê a kơxê hâi lơ 30/3, drêng rơxế chơ tơmối ki ai 45 to tăng ‘nân (xua ngế rơxế inâi N.V.L 44 hơnăm, ối a kong pơlê Bình Phước vê) chơ 36 ngế kơtâu ing Đà Lạt kĕn Pơlê kong kân Hồ Chí Minh. Tung pơla dế tot a văng Bảo Lộc, dêi pơlê kân Dà Mri, tơring Dà Huoai, kong pơlê Lâm Đồng xua ôh tá kâ prê kơdrâ króu tung thông trâu 20m.

Drêng trâm tơdroăng mê, Kăn sát gak troăng prôk, Công an kong pơlê Lâm Đồng ƀă mâu khu râ pơkuâ cheăng hiăng lăm troh a mê vâ tŏng xo mâu ngế trâm xía vâ. Tơdroăng trâm xía vâ mê pro nâ N.T.N.T (26 hơnăm ối a pơlê krâm Đồng Xoài, kong pơlê Bình Phước) hlâ, 3 ngế ki ê tro rong ó châ mâu khu râ pơkuâ cheăng djâ lăm pơlât tơdrêng, mâu ngế ki u ối tro rong iâ. Hdrối rơxế vâ króu, rơxế chơ tơmối mê ai tro chuih iâ a  krí môi toăng rơxế kân ki kơtâu tơdrêng tơngi ngiâ há.