Ƀă hnoăng cheăng dêi môi ngế kơdrâi pơkuâ, nâ Rơ Châm B’Yich, ối a cheăm Ia Krăi, tơring Ia Grai đi đo achê, veăng pêi hnoăng cheăng rơtế ƀă đoân viên droh rơtăm tung rêm tơdroăng cheăng, tơdrêng amê, djâ troăng ahdrối ƀă tơdroăng ki kơhnâ khât ƀa pôu râng hnoăng cheăng. Nâ hiăng mơjiâng Kâu lăk ƀô̆ “Mơhnŏng pleăng hnoăng cheăng ki lĕm tro tung mơjo pâ” veăng gum ăm mâu ngế ki trâm xahpá ƀă mâu tơdroăng cheăng ki ai pơxúa kân khât môi tiah hbru tơmeăm ăm mâu rơpŏng kơtiê, gum hok tro ai tơdroăng rêh ối xahpá pơtối châ troh hriâm a hngêi trung. Ƀă mâu tơdroăng ki pơtối kơdo mơ-eăm, nâ Rơ Châm B’Yich hiăng châ tơdah xo hên ƀâng kơdeăn khĕn dêi rêm râ. Nâ ai tối tiah kố:

“Á pói rơhêng vâ pleăng hnoăng cheăng, ing hiâm mơno ki á hâk git mê, tơná á xuân kơhnâ mơ-eăm tí tăng hriâm mâu tơdroăng ki ‘ló rơkê vâ ing mê ah, hnê mơhno tối ăm vâi krâ-nhŏng o ki ối tâ tá. Kot mâ tung môi rơpŏng ai hnoăng cheăng kăch măng nah, xua mê, khoh ‘nâi nhên ki kal dêi tơdroăng hriâm ƀă pêi pro tiô troăng tơdjâ, hiâm mơno Pôa Hồ Chí Minh. Troh a hơnăm 2024 á hâk tơngăm châ tơdah xo pro 15/10, á hơniâp ro khât. Á tơmiât á pêi cheăng cho tơdroăng ki pleăng dêi hnoăng tơná, ôh tá tơmiât troh tơdroăng ki châ kâ pri ki kố ki mê. Á mơnê kăn xiâm pơkuâ hnê ngăn tơnêi têa, kong pơlê hiăng tŏng gum, mơhnhôk á. Tơná á tung la ngiâ kố ah kô athế pơtối kơdo mơ-eăm hên tâ nếo tung rêm tơdroăng cheăng”.

Hơnăm hriâm ki kố nah, o Nguyễn Hà Bảo Khanh, hok tro lâm 12C1, Hngêi trung râ má pái phôh thong Chuyên Hùng Vương, pơlê kong kơdrâm Pleiku, cho môi ngế ki mê tê ngế hok tro dêi kong pơlê Gia Lai châ Khu xiâm Đoân Droh rơtăm Kŏng san Hồ Chí Minh diâp ăm inâi: “Hok tro 3 lĕm” râ tơnêi têa.

Ôh ta xê to rơkê khât tung mơhriâm, mê o ối kơhnâ tung veăng pêi pro hên mâu tơdroăng cheăng dêi đoân, dêi khu. O xuân veăng pêi pro ƀă châ kâ pri ki kân a mâu hneăng tơ’noăng râ kong pơlê ƀă râ tơnêi têa ‘na hriăn plĕng khoa hok kih thuât, pơxiâm mơjiâng tơdroăng cheăng pêi ƀă lâp trinh robot. Nguyễn Hà Bảo Khanh ai tối:

“Tung tâi tâng mâi hneăng tơ’noăng pơrá ai pơxúa hên ăm mâu tơdroăng ăm mâu vâi pú hok tro, ôh tá xê to tơdroăng ki hâk mơnâ mê ối cho vâ thăm rế hlê plĕng hên tơdroăng. Drêng châ trâm mâu pú hmâ ki veăng ƀă pin mê pin xuân châ hriâm hên tơdroăng. Ƀă xuân hâk tơngăm luâ tâ kơ mê nếo, drêng á hiăng châ inâi hok tro 3 lĕm râ tơnêi têa, ƀă á tơmiât tiah kố, kố cho ivá ki kân ki vâ á pơtối mơnhông tung mơhriâm ƀă kơdô mơ-eăm hên luâ tâ kơ mê nếo”.

Tiô nâ Hồ Thị Giang Thảo, Kăn pơkuâ hnê ngăn Đoân Droh rơtăm kong pơlê Gia Lai tối, vâi droh rơtăm tung kong pơlê hiăng ƀă dế pơtối mơnhông hiâm mơno ki djâ troăng ahdrối, ôh tá la lâi pơtê hriâm ƀă pêi cheăng ki rơkê plĕng, tơdjuôm ivá mơno mơjiâng pơlê pơla Gia Lai rế hía rế kro mơdrŏng kân:

“Ngin kô pơtối hnoăng cheăng pơlê pêi pro mâu hnoăng cheăng ki vâ rak vế pêi pro tiô tơdroăng kơxô̆ 05 dêi Khu xiâm ngăn cheăng Kal kí ‘na thăm mơdêk hriâm tâp, pêi pro tiô hiâm mơno, túa cheăng Pôa Hồ Chí Minh. Thăm ai tơdroăng pơkuâ hnê ngăn dêi Đảng ƀă tơdroăng hnê tối ‘na hnoăng cheăng kăch măng ki troh a tui lui, pơtô ăm i hiâm mơno, túa rêh kâ ối, túa lĕm tro ăm khu rơxông nếo, hnối pêi pro adrêng ƀă tơdroăng ki hâk kơdeăn, po rơdâ mâu troăng hơlâ ki lĕm, tơdroăng ki hơ’muăn tối dêi Đoân. Pakĭng mê, pơtối thăm mơdêk ƀă pêi pro mâu hnoăng cheăng ki pơkâ pêi pro “3 tơdroăng tơrŭm” vâ khu rơxông nếo Gia Lai pơtối veăng pêi pro ƀă khu râ vâ mơjiâng, mơhnhôk vâi droh rơtăm veăng pêi pro mơnhông thôn pơlê nếo, kơphô̆ hloh hlê rơkê plĕng”.