VOV4.Xơ Đăng - Mơhnhôk Tơdroăng tơkêa bro ‘’Pêt môi rơtal xiâm loăng ngiât hneăng hơnăm 2021 – 2025’’ dêi Ngế pro xiâm hnê ngăn Chin phuh, kơxo lơ 4/7 a troăng kân pa kĭng Văng Mang Deang a troăng kân tơnêi têa 24, kơpong pơlê krâm Mang Deang, tơring Kon Plông, Khu pơkuâ cheăng Đoân Droh rơtăm kong pơlê Kon Tum tơkŭm po lo lăm pêt loăng ngiât péa pâ troăng kân vâ pro ăm lĕm mơnâ mâ ngăn ƀă rak vế kong prâi.

Kăn pơkuâ hnê ngăn cheăng Đảng kong pơlê, Kăn hnê ngăn Hô̆i đong kong pơlê Kon Tum veăng pêt loăng rơtế đoân viên droh rơtăm

Tung peăng kơxo má, lối 300 ngế kăn ƀô̆, đoân viên droh rơtăm rơtế kuăn pơlê péa tơring Kon Rẫy ƀă Kon Plông, kong pơlê Kon Tum hiăng pêt rơpâu xiâm loăng hngó pái kơtâ hlá drô péa pâ troăng pakĭng Văng Mang Deang. Ƀă troăng pêi rêm râ Đoân Droh rơtăm môi tơmeăm pêt loăng ngiât, sap hơnăm 2020 troh nôkố krê a troăng kân pakĭng Văng Mang Deang, Khu pơkuâ cheăng Đoân Droh rơtăm kong pơlê Kon Tum hiăng tơrŭm ƀă tíu cheăng ki tơdjâk tơkŭm po 3 roh lo lăm pêi cheăng, pêt châ vâ chê 20 rơpâu xiâm loăng hngó pái kơtâ hlá pro lĕm tíu rêh ối ƀă rak vế kong prâi.