Kố cho môi tung mâu tơdroăng pêi pro ki kal dêi Leh tơbleăng sầu riêng Dak Lak hơnăm 2026, ai vâ chê 400 tíu tơbleăng dêi lối 140 khu mơdró tung tơnêi têa, 20 khu mơdró lo ing kong têa ê.

A kơpong mơhno tơbleăng, ki rơhêng vâ ngăn cho a mâu tơmeăm pêi pro tiô troăng hơlâ mơnhông tơbrê ‘na pêi lo tơmeăm krúa lĕm ƀă krá ton, xuân cho troăng hơlâ pêi dêi kơvâ ngăn ‘na sầu riêng Dak Lak. Hên tíu pêi cheăng hiăng djâ troh mâu troăng pêi ki tơbrê, xúa ư̆ng yŭng kŏng ngê̆ sinh hok vâ kơjo kum kuăn pơlê pêi cheăng kâ tơniăn sap apoăng rak ngăn. Pôa Nguyễn Thanh Điền, teăng môi khu mơdró ăm ‘nâi troăng hơlâ sinh hok vâ kơjo kum kuăn pơlê pêt tơniăn ing apoăng sap rak ngăn.

Pôa Nguyễn Thanh Điền, teăng mâ môi khu mơdró kâ tối ăm ‘nâi troăng hơlâ sinh hok tung pêi chiâk, ăm ‘nâi tíu pêi cheăng veăng po leh ƀă púi vâ tối ăm dêi rơpó ‘nâi mâu tơdroăng tung rak ngăn hdrê loăng, mơdât ôa drong kâ ‘nhiê plâi sầu riêng.

“Ing rôh po kơchơ kuăn pơlê kô hlê nhên tâ ‘na troăng hơlâ ki ngin mơhno djâ, malối mâu troăng hơlâ sinh hok tung rak ngăn mơdât ôa hdrong kâ ‘nhiê. Ing mê, kum kuăn pơlê hmiân tuăn pêi cheăng kâ, mơdêk ki tơƀrê tơmeăm pê lo ing chiâk deăng ƀă veăng mơnhông ‘na chiâk deăng Việt Nam xông tơbrê tơniăn ton”.

Ki veăng tơmâng dêi 20 khu mơdró lâp plâi tơnêi xuân pro tơ’nôm môi troăng tơdjêp a rôh po. Sap ing mơhno tơbleăng, troh mâu khu tơrŭm cheăng kong têa ê ai rôh vâ châ tăng hlê phĕng tơdrêng mâu tơmeăm, ‘na khu mơdró Việt Nam ki ai liăn kô châ pơkâ pêi pro nhên tâ dêi mâu kơchơ mơdró ki rôe tơmeăm ing kong têa ê. Tơdrêng ƀă sầu riêng, mâu tơmeăm châ mơnhên OCOP ƀă tơmeăm kong pơlê pê lo xuân châ  tơbleăng a rôh kố, cho rôh mâu ngế ki pêt châ tơbleăng dêi inâi tơmeăm ƀă po rơdâ kơchơ mơdró.

Jâ Nguyễn Thị Thu An, Ngế pơkuâ ngăn ‘na Mơdró kâ kong pơlê Dak Lak, ăm ‘nâi ing mâu tơdroăng pêi pro tơdjêp tơdrêng, cheăm bêng, kong pơlê púi vâ ki kơnía tơmeăm pê lo ing chiâk deăng ôh tá xê to a tơmeăm ki tê, mê ối châ mơdêk ki tơbrê, inâi, khâu pêi pro ƀă ivá pêi ai tiô pơkâ tơrêm kơchơ mơdró. Kố cho troăng prôk vâ sầu riêng rơtế ƀă tơmeăm ki châ mơnhên OCOP dêi Dak Lak chôa lâng veăng tơbleăng trâu tâ nếo mâu tơmeăm ki kơnía tung tơnêi têa ƀă lâp plâi tơnêi:

 “Ki hdrối thế châ tơbleăng sầu riêng Dak Lak troh ƀă rêm ngế ki rôe, tơdjêp ƀă mâu khu lăm rôe hlối tơbleăng tơdroăng ki kal, kong pơlê hlối pro hlâu ăm mâu khu mơdró pêi cheăng tê mơdró, xuân môi tiah tơdjêp, tăng plĕng trâu rơdâ tâ nếo ‘na pêi lĕm krúa ƀă tăng ‘nâi kơchơ mơdró vâ sầu riêng mê châ tê hơngế tâ nếo”.