Hneăng hdrối, Vi ƀan Măt trâ̆n tơnêi têa Việt Nam rêm râ hiăng tơkŭm pêi pro tro tơdroăng séa ngăn ƀă rơkê tơpui leăng. Hên tơdroăng séa ngăn dêi Măt trâ̆n Tơnêi têa Việt Nam hiăng pro pơxúa gum ăm kơ koan râ kơpêng teăm tah tơdroăng pá tơvâ tơvân, ôh tá tro; pơkâ thế pro klêi luât pơkâ, luât tŏng gum; ai tiô tơdroăng púi vâ, kring vế, ki pơxúa  tro luât, tơxâng dêi kuăn pơlê.

Cheăm Minh Khai, tơring Hoài Đức, pơlê kong  kân Hà Nội... tâi tâng tơnêi châ xo tơvêh vâ pêi tơdroăng tơkêa bro troăng ví pa Kĭng 4 - kơpong pơlê xiâm ai 5,7 hectar dêi 143 rơpŏng. Kố cho cheăm ki apoăng dêi tơring Hoài Đức châ ối má môi tung tơdroăng mơhnhôk kuăn pơlê ăm tơnêi vâ pêi tơdroăng tơkêa pro troăng ví pa kĭng 4.

Troh nôkố 100% ngế kuăn pơlê hiăng xo liăn chêl thiăn veăng gum, pơcháu tơnêi ăm tơdroăng tơkêa bro ƀă hlo ƀă mâ mâu km apoăng dêi Tơdroăng Tơkêa bro pơxiâm toh chhá kơxu. Jâ Đỗ Thị Tuyết, Ngế pơkuâ cheăng Măt trâ̆n thôn Minh Hòa 3, cheăm Minh Khai ăm ‘nâi:

"Kăn thôn ƀă Khu cheăng Măt trâ̆n thế mơ-eăm pêi cheăng kơtăng mê nếo châ ti mê. Khu cheăng Măt trâ̆n dêi thôn lăm mơhnhôk  mê kuăn pơlê xuân tơmâng la tô tuăn, ôh tá ‘nâi pơ’lêh tâng pơ’lêh hôm trâm tơdroăng pá klâi há? La vâ pêi tro tiô pơkâ dêi tơnêi têa mê mâu rơpŏng hngêi xuân vâ pêi pro’’.

Pêi pro tiô troăng pơkâ “kuăn pơlê ‘nâi, kuăn pơlê tơpui, kuăn pơlê pêi, kuăn pơlê táng ngăn, kuăn pơlê séa ngăn, kuăn pơlê xúa’’, Tung hneăng hdrối, Vi ƀan Tíu xiâm xiâm Măt trâ̆n Tơnêi têa Việt Nam hiăng pơkuâ mơjiâng 31 khu kăn lăm séa ngăn vâ tơkŭm po tăng ngăn tiô chuyên đề; Vi ƀan Xiâm Măt trâ̆n Tơnêi têa Việt Nam rêm râ hiăng pơkuâ, tơrŭm tăng ngăn châ 231 rơpâu rôh.

Tơdroăng pêi ai pơxúa veăng gum mơnhông hnoăng cheăng pêi dêi ngế kuăn pơlê tung tơdroăng veăng mơnhông cheăng kâ - rêh ối pơlê pơla. Laga, ki khât a hên tíu ai mâu tơdroăng hơ’muăn kuăn pơlê hlo, kuăn pơlê ‘nâi, la ôh tá vâ tối, ôh tá khên tối, ôh tá khên tối tơdrăng. Phŏ yăo sư Tiê̆n sih Vũ Văn Phúc - Kăn phŏ Hnê ngăn Hô̆i đong Khoa hok mâu kơ koan Đảng Xiâm tơnêi têa pơkâ thế:

"Ki khât vâ tối: Kuăn pơlê veăng mơjiâng, ‘mâi hơ’lêh tơdroăng cheăng Đảng dêi kuăn pơkê, veăng ‘no hnoăng tăng ngăn kăn ƀô̆ đảng viên la hâi ai môi luât pơkâ ki nhên khât vâ pêi pơtối rah hnoăng cheăng séa ngăn dêi Măt trâ̆n tơnêi têa, mâu khu cheăng kal kí pơlê pơla ƀă kuăn pơlê. Xua mê, kal pơtối pêi tro tâ nếo hnoăng cheăng dêi kuăn pơlê tung tơdroăng ngăn tối nhên, séa ngăn mâu kăn ƀô̆ đảng viên pêi tro hnoăng cheăng, tơdroăng cheăng pêi dêi tơná; kăn ƀô̆ đảng viên djâ troăng pêi ahdrối; séa ngăn kăn ƀô̆ đảng viên hriâm pât ‘na hiâm mơno lĕm, tơdroăng rêh ối thế lĕm tro”.

Vâ séa ngăn, tối tơdrăng dêi Măt trâ̆n tơnêi têa ôh tá xê tơdroăng kal pơkâ luât vâ kuăn pơlê châ tối ăm mâu tŭm mâu tơdroăng, tro hlối nhên ƀă teăm tơdrêng. Séa ngăn tối tơdroăng kuăn pơlê pêi pro thế  tơmeăm ăm ‘nâi tâi tâng, tơdrăng, pơtối rak ki lĕm tro, thế ai tŭm tơdroăng ki veăng dêi kuăn pơlê, malối hnoăng cheăng kuăn pơlê tung séa ngăn kăn ƀô̆, đảng viên a tíu pêi cheăng ƀă tíu ối.

Thế tơmâng xo tơdroăng kuăn pơlê tối, klêi mê tiâ, tơleăng mơnhên pâ thế séa ngăn, tối tŭm tơdroăng pơlê pơla dêi Măt trâ̆n Tơnêi têa Việt Nam. Jâ Nguyễn Quỳnh Liên, Ngế pơkuâ Ki môi tuăn, séa ngăn ƀă tối tro  mâu tơdroăng pơlê pơla, Vi ƀan Xiâm Măt trâ̆n tơnêi têa Việt Nam ăm ‘nâi:

“Ngin kô tăng ‘nâi plĕng vâ pơkâ môi luât tơniăn pêi pro mâu tơdroăng pâ thế dêi Măt trâ̆n klêi séa ngăn, tơpui leăng. Ing luât pơkâ pêi mê kô pơkâ mâu luât ê nếo vâ rĕng mơnhên mâu pơkâ a Tơdroăng 14 a Pơkâ 69, xuân môi tiah mâu troăng rơhlâ tơbleăng tung Luât pơkâ kơxô̆ 22 dêi Kăn hnê ngăn Đảng, vâ tơniăn ăm mâu kơ koan thế pôu râng hnoăng cheăng tơná pêi tung tơdroăng pêi mâu pơkâ dêi Măt trâ̆n”.

Tơdroăng tăng ngăn, tơpui leăng dêi Măt trâ̆n tơnêi têa malối thế ngăn a kuăn pơlê, pơtối veăng pêi, veăng ‘no hnoăng dêi kuăn. Kal thế ai pơkâ vâ kuăn pơlê pêi hnoăng cheăng séa ngăn, tơpui teăng tối tơdrăng. Pơtối rak hnoăng séa ngăn dêi kuăn pơlê cho hiăng pêi pro tiô tuăn mơno hnê mơhno dêi Hồ Chí Minh, Kăn xiâm hnê ngăn tơnêi têa hneăng apoăng “Xo kuăn pơlê pro xiâm’’, vâ tơkŭm po, mơhnhôk kuăn pơlê veăng séa ngăn tơrŭm cheăng Đảng, đảng viên veăng ‘no hnoăng séa ngăn khât trâu rơdâ tâ - ai pơxúa.