VOV4.Xơ Đăng - Pơla hdrối kố nah, hên ngế vâi hơnăm ối  nếo a kong pơlê Gia Lai hiăng tro khu ‘mêi xúa kŏng ngê̆ ki rơkê, tơbriât xo tiô troăng Internet vâ lu lêa, djâ lăm troh a kong têa Kul pêi cheăng tung khu ki lu lêa, klêi mê, thế nôu pâ vâi mơhá liăn châ hrĭng rơtuh liăn mê nếo mơdrếo kơ vâi hơnăm ối nếo mê. Kŏng an kong pơlê Gia Lai hiăng hnê tối kuăn pơlê kal athế hbrâ kơchăng vâ châ hluăn ing tơdroăng ki pơloăng dêi khu ki ‘mêi.

Tung môi toăng hngêi pơtân a tôh 4, pơlê kân Kon Dơng, tơring ‘Mang Yang, kong pơlê Gia Lai, nâ N.T.L têa mâ briê lo drêng tối ‘na kuăn kơnốu Đ.V.T (15 hơnăm) nôkố ôh tá ‘nâi hôm ối rêh. Mâu tơdroăng pói vâ tăng liăn kum rơpŏng, mơ’nui khế 3 hơnăm kố, tiô tơdroăng tung măng pơlê pơla, T. to rơxế pơto tơmối mot a Pơlê kong kân Hồ Chí Minh, klêi mê, châ 1 khu ngế djâ lăm a kong têa Kul pêi cheăng. Dâng tơdế khế 4, T. krếo phôn, chêh pơtroh chư ing Zalo tối, mâu ngế a kố pơklât T. ing măng pơlê pơla pơlông mơngế Việt Nam troh a kong têa Kul pêi cheăng. Tâng châ tơƀrê, ƀă rêm ngế, T. kô châ mơhá liăn 30 rơtuh liăn.

10 hâi kơ’nâi T. chêh chư pơtroh rơpŏng tŏng kum, krếo thế pơtroh 150 rơtuh liăn a tài khoản ai inâi Quách Thanh Tùng vâ o châ vâi ăm vêh. Lối kơtiê ó, troh nôkố, on veăng nâ L. xuân tá kâi tăng châ kơxô̆ liăn kân kố vâ tŏng xo dêi kuăn:

‘’Rơpŏng pá puât, ôh tá ai liăn pơtroh, kuăn á chêh chư pơtroh ing Zalo cho peăng ‘na tá pâm xiăn, lôi kơklêa kuăn á 2 hâi. Nôkố kơnôm Kŏng an Việt Nam, Kul, kăn teăng mâ tŏng xo kuăn á vêh Việt Nam tơniăn’’.

Nôu pâ T. ngế tro lu lêa lăm pêi cheăng a kong têa ê tô tuăn châ chăn dêi kuăn kơnốu a kong têa ê

Trung tă Đinh Văn Sơn, Kăn phŏ pơkuâ gâk kring măng Internet ƀă hbrâ mơdât mơngế xôi xúa kŏng ngê̆ kơmăi kơmok rơxông nếo (Kŏng an kong pơlê Gia Lai) tối ăm ‘nâi, tá hâi châ 6 khế apoăng hơnăm 2022, tíu cheăng hiăng tơdah 43 tơdroăng tơbleăng tối tro lu lêa ing măng, ƀă tâi tâng kơxô̆ liăn tro lŭp troh lối 26 rơtal liăn. Pakĭng mê, mâu tơdroăng lu lêa hdrối nah môi tiah rah xo ngế pêi cheăng tê tơmeăm, krếo mơ’no liăn ki ôh tá xê khât tung măng Internet, lu lêa tối dêi tơná kăn ƀô̆ tơbleăng tối tơdroăng xôi vâ pơxâu phâk ƀă hía hé, mê nôkố ai tơ’nôm tơdroăng ki nếo mê cho lu lêa lăm pêi cheăng a kong têa Kul ƀă kơlo liăn khế 800 troh 1.000 dollars.

Tiô tơdroăng tối tơbleăng dêi mâu ngế ki tro lu lêa, drêng troh a kong têa Kul, vâi djâ mot rêh ối tung mâu toăng hngêi chưng cư xua mơngế Sinuâ pơkuâ. Tơdroăng cheăng rêm hâi cho mot a măng pơlê pơla krếo phôn a Việt Nam lu lêa mơngế tung tơnêi têa ƀă mâu troăng rah xo mơngế tê tơmeăm, kơbông krếo mơ’no liăn cheăng, pơlông djâ lăm pêi cheăng a kong têa Kul ƀă hía hé.

Tâng ôh tá châ pơkâ, vâi kô tro pơxâu phâk ki vâ iâ 1.000 dollars, tro pâm xiăn, lôi ăm kơklêa kơ’nâi mê pơkâ thế krếo phôn ăm mơngế a hngêi pâ liăn rơpŏng hngêi vâ châ vêh a hngêi. Vâi bu châ ăm vêh drêng rơpŏng nâp hrĭng rơtuh liăn ăm vâi vâ châ xo dêi mơngế nhŏng o.

Rơpŏng hngêi kơtiê pá puât dêi  T. ngế tro lu lêa pêi cheăng a kong têa ê

Trung tă Đinh Văn Sơn pơchân tối kuăn pơlê kal thế tơmiât nhên, kơchăng drêng ai mâu rơkong krếo pêi cheăng tơdroăng cheăng hiâ, liăn khế hên ing măng Internet, vâ ví mâu tơdroăng lu lêa dêi mâu ngế pro xôi:

‘’Kuăn pơlê kal vâ tăng cheăng pêi, kal thế tí tăng plĕng nhên, vâ tăng cheăng pêi a kong têa ê mê thế pro mơ-éa a mâu kơ koan dêi Khu pơkuâ cheăng pêi mô đô̆i rong râ ƀă rêh ối pơlê pơla vâ ai hnê mơhno i nhên. Mâu rơpŏng ai kuăn ‘nĕng dế hơnăm pêi cheăng kal ai tơdroăng veăng hnê tối, tơdjêp, tŏng kum vâ ti tăng tơdroăng cheăng tơtro, ví tơdroăng tro mâu ngế ki ‘mêi lu lêa, pơlông djâ pêi cheăng a kong têa ê ôh tá tro luât’’.

A Sa Ly tơplôu ƀă tơbleăng