VOV4.Xơ Đăng - Hlo tơdroăng tơnêi tơdro đi đo a tơring Kon Plông, kong pơlê Kon Tum, pôa Lê Văn Thành, Ngế pro xiâm phŏ hnê ngăn tơnêi têa hiăng pơcháu ăm khu xiâm khoa hok ƀă kŏng ngê̆ pơkuâ tơkŭm lăm séa ngăn, tí tăng ‘nâi plĕng tối ki xiâm, kơlo ki rơ-iô ƀă ki tơdjâk mê hlối tơbeăng ăm mâu kăn, kuăn pơlê ‘nâi hbrâ vâ ví tơ-tro vâ kuăn pơlê pôi tô tuăn. Măng tĭng hnê mơhno dêi khu xiâm ngăn ‘na hbrâ ví xía vâ kong prâi pro ôh tá tơniăn tơrŭm ƀă khu kăn troh a Kon Tum lăm ngăn vâ ‘nâi khât, hlối tơbleăng tơrŭm tung tơdroăng hbrâ ví xía vâ tơnêi tơdro.

Khu râ kăn pêi cheăng dêi Khu hnê mơhno Tơnêi têa ‘na hbrâ ví kong prâi pro ôh tá tơniăn hiăng troh ti tăng plĕng i nhên a Hngêi kơmăi ƀă kơpong long têa hngêi kơmăi on tơhrrik Thươ̆ng Kon Tum a 2 cheăm Ngọc Tem ƀă Đăk Tăng dêi tơring Kon Plông. Ƀă ivá pro 220MW, long têa hdoăng lối 145 rơtuh met khô̆i têa, hngêi kơmăi on tơhrik Thươ̆ng Kon Tum dế châ ngăn cho môi tung mâu xiâm kối kô tơdjâk troh tơdroăng thăm tâk hên mâu roh tơnêi tơdro ƀă tơtro têi tung pơla kố nah a kơpong kố.

Tơbleăng ƀă khu râ kăn pêi cheăng, pôa Trần Công Đàm, Kăn pơkuâ Kŏng ti on tơhrik Thươ̆ng Kon Tum, ối tung Kŏng ti tơlo liăn cheăng on tơhrik Vĩnh Sơn – Sông Hinh tối, on tơhrik châ pro kâi trâng tơnêi tơdro têi râ 7. Hâi lơ 26/2/2020 on tơhrik pơxiâm hdoăng têa. Troh hâi lơ 20/11 rơtế hơnăm mê hiăng hdoăng pêng têa tung long têa.

Klêi kơ’nâi vâ chê 1 hơnăm troh hâi lơ 8/2/2021 hngêi kơmăi pơxiâm châ hlo ai tơdro. Tung pơla dâng sap ing khế 2 troh khế 5/2021 hên xôh tơdro kơ’nâi mê rế hía a khế 6, ôh tá ai tơdro a khế 7, khế 8, troh tung dế khế 9/2021 vêh tơdro nếo ƀă tơdro hên a khế 3 ƀă khế 4/2022.

Khu râ kăn séa ngăn tíu krâ kơmăi séa ngăn tơnêi tơdro a tơring Kon Plông

Krê hâi lơ 18/4 pơla kố nah ai tơnêi tơdro têi má môi sap ing hdrối nah troh nôkố ƀă 4,5 đô̆ richter. Drêng tơnêi tơdro long têa hdoăng dâng 106 rơtuh met khô̆i têa, xiâm tơnêi tơdro ối tung cheăm Hiếu ƀă Pờ Ê, tơring Kon Plông kơtăn hngêi kơmăi lối 14 km ƀă kơtăn long têa lối 25 km. Pôa Trần Công Đàm mơnhên tối:

‘’Klêi kơ’nâi séa ngăn ƀă mơnhên mê mâu roh tơdro kố ôh tá tiô kơdró têa. Kŏng ti ai tơrŭm ƀă Viê̆n Vật lý địa cầu krâ 3 kơmăi khăm ngăn rơtâ tá hngêi kơmăi on tơhrik Thươ̆ng Kon Tum vâ khăm ngăn tơnêi tơdro. Klêi kơ’nâi ai tơdro mê Kŏng ti pơrá tơkŭm po lăm séa ngăn hngêi kơmăi on tơhrik, hngêi kơmăi on tơhrik ôh tá tro klâi ôh’’.

Rơkong tơpui dêi kăn teăng mâ Khu xiâm pơkuâ kơmăi kơmok – tê mơdró, Khu xiâm mơjiâng tơmeăm, Grup pơkuâ on tơhrik Việt Nam, Kŏng ti tơlo liăn cheăng on tơhrik Vĩnh Sơn – Sông Hinh ƀă mâu ngế rơkê prôk rơtế Khu pêi cheăng pơrá ai troăng tơmiât tơdjuôm, mê cho tơdroăng mơnhên xiâm kối chiâng pro tơnêi tơdro, tơdro têi kal thâ pêi pro tơdrêng, laga thế kơchăng pêi tiô khoa hok. A ngiâ Kŏng ti on tơhrik Thươ̆ng Kon Tum tơrŭm ƀă Viện Vật lý địa cầu xêo tơmiât, hriăn plĕng krâ tơ’nôm mâu kơmăi séa ngăn tơnêi tơdro. Ƀă 3 kơmăi séa ngăn tơnêi tơdro châ krâ kêi đeăng kô tơdjêp tơdrêng ƀă Viện vâ ai tơdroăng teăm tơdrêng, tơtro má môi.

Khu râ kăn pơkuâ tơring Kon Plông ƀă kong pơlê Kon Tum kal ai troăng hbrâ ví ƀă tơdroăng ki thâ. Tơdroăng hdoăng têa  hngêi kơmăi on tơhrik Thươ̆ng Kon Tum tung hneăng la ngiâ kal thế tơmiât nhên kơchăng ƀă hía hé. Pôa Nguyễn Đức Quang, Kăn pơkuâ Kơ koan xiâm hbrâ ví ƀă rơnêu tơmeăm khoăng xua kong prâi pro, Phŏ pơkuâ Ƀơrô hnê mơhno má môi Khu hnê mơhno Tơnêi têa ‘na hbrâ ví kong prâi pro ôh tá tơniăn, kăn pơkuâ Khu pêi cheăng tối:

‘’Tá hâi ai kơbố tối mơgêi tơdroăng tơnêi tơdro akố cho xua long têa hngêi kơmăi on tơhrik lơ long têa laga hlo nhên ing kơxô̆ kơmăi séa ngăn tơdroăng ki thăm hên roh tơnêi tơdro achê kố mê gá tơtro ƀă hâi khế hdoăng têa dêi long têa hngêi kơmăi on tơhrik Kon Tum Thươ̆ng. Kố cho tơdroăng ki pin kal séa ngăn ƀă kal hriăn plĕng. Tung mê ai tá mâu troăng pêi la ngiâ ƀă tá mâu troăng pêi ton xŏn.

Khu râ kăn pêi cheăng ƀă Kŏng ti on tơhrik Thươ̆ng Kon Tum

Xuân ăm hlo pin ối ai tơdroăng ki tro lôi tung troăng hbrâ ví kong prâi hơ’lêh, tơdroăng hbrâ ví dêi pin cho ‘na tơnêi tơdro. Mơhé tiô pơkâ xuân hiăng ai, hnê mơhno hiăng ai. Mơnhên cho pin thế hbrâ, ôh tá chiâng tơngôu’’.

Tung hâi apoăng pêi cheăng a kơpong xiâm tơnêi tơdro, tơdro têi a tơring Kon Plong, kong pơlê Kon Tum, Khu râ kăn pêi cheăng dêi Khu hnê mơhno tơnêi têa ‘na hbrâ ví kong prâi ôh tá tơniăn xuân hiăng lăm séa ngăn nhên tơdroăng a kơpong long têa hngêi kơmăi on tơhrik Thươ̆ng Kon Tum ối tung cheăm Đăk Tăng ƀă cheăm Đăk Ring. Kơxo lơ 21/4, Khu râ kăn pêi cheăng kô ai roh pêi cheăng ƀă Khu hnê mơhno hbrâ ví kong prâi pro ôh tá tơniăn ƀă ti tăng tŏng xo mơngế hliăng tiâ kong pơlê Kon Tum.

Xuân tung măng tĭng, Ƀơrô Chin phuh hiăng ai mơ-éa tối rơkong hnê mơhno dêi pôa Lê Văn Thành, Ngế pro xiâm phŏ hnê ngăn tơnêi têa ‘na tơleăng tơdroăng tơnêi tơdro a kơpong tơring Kon Plông, kong pơlê Kon Tum. Pơtối mê, pôa Lê Văn Thành pơcháu Viê̆n Hàn Lâm Khoa Hok ƀă Kŏng nghê̆ Việt Nam hnê mơhno Viện Vật lý địa cầu pơtối pêi pro krâ kơmăi séa ngăn tơnêi tơdro a kơpong nếo tối mê ai, tơbleăng tơdroăng teăm tơdrêng ăm mâu kơ koan ƀă kuăn pơlê ‘nâi vâ hbrâ ví ăm tơtro.

Mâu Khu xiâm: Kơmăi kơmok tê mơdró, Pêi chiâk deăng ƀă mơnhông thôn pơlê, Troăng klông hnê mơhno séa ngăn, mơnhên, hbrâ pêi pro mâu troăng tơniăn long têa hngêi kơmăi on tơhrik, long têa ƀă mâu tơmeăm hngêi trăng, troăng klông kơpong kô tơdjâk xua tơnêi tơdro, ôh tá ăm ai tơdroăng ki ôh tá tơniăn ki ôh tá ƀĕng ê, pro ôh tá tơniăn tơmeăm khoăng.

Khoa Điềm chêh

A Sa Ly tơplôu ƀă tơbleăng