VOV4.Xơ Đăng - Bú ối 3 măng tĭng kô troh hneăng tơ’noăng mơgêi hriâm râ má pái phôh thong. Nôkố, kơvâ ngăn hnê hriâm ƀă hnê mơjiâng tuăn ngôa rơkê mâu kong pơlê tung kơpong Tây Nguyên dế mơdêk hriâm rơbot ƀai ăm hok tro vâ tơ’noăng châ tơ-brê tơniăn. Tơdrêng amê, mâu kong pơlê kô ai pơkâ luât tŏng kum liăn ăm mâu hok tro kơtiê xơpá, hok tro hdroâng kuăn ngo hmiân tuăn tơ’noăng.

A Kon Tum, hneăng tơ’noăng mơgêi râ má pái phôh thong hơnăm kố ai lối 4.700 ngế hok tro kĭ tơ’noăng. Nôkố, mâu hngêi trung tung kong pơlê dế thăm tơdroăng hriâm ƀai ăm hok tro. Vâ mơnhên tro ivá dêi rêm hok tro, Khu pơkuâ Hnê hriâm ƀă Hnê mơjiâng kong pơlê Kon Tum hnê mơhno mâu hngêi trung tơkŭm po ăm tâi tâng hok tro lâm 12 tơ’noăng.

Ing tơdroăng pro ƀai dêi hok tro ai mơnhên tŭm tơdroăng, séa ngăn vâ teăm tơdrêng tơ’nôm, pơ’lêh tơdroăng xiâm hriâm tơ’noăng rêm môn kum hok tro tơ’lêi hlâu plĕng ƀai hnê ƀă ‘nâi krá tơdroăng hriâm. Thái Nguyễn Tiến Định, Thái pơkuâ hngêi trung râ má pái Trần Quốc Tuấn, pơlê kân Đăk Hà, tơring Đăk Hà, tối ăm ‘nâi:

‘’Hngêi trung dế thăm pêi kơtăng, mâu tôh pêi cheăng tiô tơdroăng nôkố mê hriâm tơ’noăng. Ki rơhêng vâ tối thăm séa ngăn hô sơ yăo án. Tôh pêi cheăng thế hnê mơhno kơtăng khât ƀă thái cô. Tơdrêng amê đi đo tơmâng xo rơkong ing mâu vâi o hok tro vâ mơnúa ngăn hâi hôm há tiah mê. Troh hâi lơ 30/6 hngêi trung pêi kêi đeăng tâi tâng ăm mâu vâi o hiăng hbrâ rơnáu mot hneăng tơ’noăng châ tơƀrê lĕm má môi’’.

Khu pơkuâ Hnê hriâm ƀă Hnê mơjiâng tuăn ngôa rơkê kong pơlê Kon Tum tiô tối hdrối mơjiâng 12 tíu tơ’noăng, ƀă 203 kơbong hriâm, 41 kơbong tơkôm ƀă hbrâ. Kong pơlê xuân hiăng ai troăng tơniăn ăm hok tro kơpong hơngế hơhngo tung tơdroăng lăm tơ’noăng ƀă tíu kâ, pơtê.

A Dak Lak, hneăng tơ’noăng ai 20.455 ngế hok tro kĭ tơ’noăng. Kong pơlê châ hbrâ 32 tíu tơ’noăng ƀă 951 kơbong tơ’noăng a 15 tơring, pơlê kong kơdrâm, pơlê kong krâm. Nôkố, kơvâ hnê hriâm ƀă hnê mơjiâng tuăn ngôa rơkê kong pơlê dế tơkŭm hriâm ăm hok tro. A hngêi trung râ má pái phôh thong Thưk hành Cao Nguyên (a pơlê kong kơdrâm Ƀuôn Ma Thuột), vâ chê 300 ngế hok tro lâm 12 troh hngêi trung rêm hâi vâ hriâm ƀai tơ’noăng.

O Lê Thị Minh Nguyệt, hok tro akố tối ăm ‘nâi:

‘’Pakĭng hriâm tơ’nôm chôu a hngêi trung, á ối veăng môi lâm hriâm pakong, vêh a hngêi á ối hriâm xêh nếo, ngăn mơ-éa tơdroăng hriâm tung trang web ki loi tơngah’’.

Môi roh hriâm ƀai tơ’noăng mơgêi râ má pái phôh thong dêi hok tro hngêi trung râ má péa – râ má pái phôh thong Đông Du, pơlê kong kơdrâm Ƀuôn Ma Thuột – Dak Lak

A Hngêi trung râ má péa ƀă râ má pái Đông Du, pơlê kong kơdrâm Ƀuôn Ma Thuột, tơdroăng hriâm tơ’noăng mơgêi râ má pái xuân châ thăm hriâm pái hdroh: kơxo, kơxê, kơmăng.  Rơtế ƀă tơdroăng xing xoăng hok tro tiô mâu khu tôh hơp Khoa hok tư̆ nhiên, Khoa hok pơlê pơla, hngêi trung ối rak xo hok tiô ivá hlâ plĕng vâ ai troăng hriâm tâp tơtro.

Cô yăo Chu Thị Dạ Thảo, cô hnê môn Ngữ văn, tối:

‘’Tung tơdroăng hnê ăm hok tro châm ƀai ăm châ tơná ƀă châm ƀai dêi pó pơla mâu pú hma ahok tro ƀă dêi pó xua tiô troăng tơmiât cho drêng hok tro ‘nâi troăng châm ƀai mê kô ‘nâi troăng tơxâng tiô pơkâ vâ tung ƀai dêi đê tơ’noăng’’.

Khu pơkuâ hnê hriâm – Hnê mơjiâng tuăn ngôa rơkê kong pơlê Dak Lak hiăng pơkâ mâu hngêi trung râ má péa hbrâ mơjiâng pơkâ, rah xo mâu troăng hriâm tâp tơtro ƀă tơdroăng rêm môn hriâm ƀă tuăn ngôa dêi rêm hok tro. Ƀă hok tro hriâm tơdâng, ôh tá chiâng hriâm, thái cô thăm hriâm tâp mâu ƀai ki xiâm rêi, ki xiâm. Ƀă khu hok tro hôm, rơkê, hngêi trung hnê mâu ƀai ki pá tâ mê kum mâu vâi o hmâ ƀă hên ƀai ki phá dêi pó, ƀai ki pá tâ.

Pôa Phạm Đăng Khoa, Kăn pơkuâ Hnê hriâm – Hnê mơjiâng tuăn ngôa rơkê kong pơlê Dak Lak tối:

‘’Ngin hiăng hnê mơhno mâu hngêi trung râ má pái phôh thong mơjiâng mâu khu đê ngăn hdrối dêi mâu khu đê dêi Khu pơkuâ hnê hriâm – hnê mơjiâng tuăn ngôa rơkê tơkŭm po mơnúa tơ’noăng ƀă mơnhên ki hôm păng ‘nâng dêi hngêi trung. Tơdrêng amê ing tơdroăng mê ai pơkâ tơkŭm po hriâm tâp ăm mâu vâi o. Tơniăn mâu vâi o ‘nâi tơdroăng veăng hneăng tơ’noăng mơgêi râ má pái la ngiâ’’.

A kong pơlê Dak Nông, hneăng tơ’noăng kố ai lối 6.87- ngế hok tro kĭ veăng, tung mê ai dâng 1.580 ngế hok tro hdroâng kuăn ngo. Rơtế ƀă tơdroăng tơniăn tơmeăm khoăng, ƀă hnê ăm hok tro, kong pơlê pơtối pêi pro troăng hơlâ tŏng kum liăn a ngâ kum mâu hok tro ai tơdroăng rêh ối cheăng kâ pá puât, hok tro mơngế hdroâng kuăn ngo hmiân tuăn veăng tơ’noăng.

Pôa Phan Thanh Hải, Kăn phŏ pơkuâ Hnê hriâm ƀă Hnê mơjiâng tuăn ngôa rơkê kong pơlê Dak Nông, tối ăm ‘nâi, hơnăm kố, kong pơlê pơtối pêi pro troăng hơlâ tŏng kum liăn a ngâ lối 300 rơpâu liăn ăm rêm ngế hok tro ai tơdroăng rêh ối pá puât, hok tro mơngế hdroâng kuăn ngo, kum mâu vâi o hmiân tuăn veăng tơ’noăng:

‘’Pakĭng tơdroăng hriâm tâp ƀai tơ’noăng ăm hok tro mê ngin pơtối tơbleăng ăm Vi ƀan kong pơlê ‘na mâu troăng tơ’noăng ing tơdroăng ki ai khât nôkố dêi kong pơlê, tơniăn mâu tơdroăng gâk kring, tơniăn troăng klông tơ’lêi hlâu ăm hok tro prôk lăm ƀă hía hé. Ki rơhêng vâ tối ƀă hok tro cho kuăn ‘nĕng vâi krâ hdroâng kuăn ngo, hok tro ai tơdroăng cheăng kâ pá puât, mê Khu pơkuâ hnê hriâm ƀă hnê mơjiâng tuăn ngôa rơkê ai hnoăng riân, tơdâng tơ’mô kơxô̆ liăn tơtro má môi vâ veăng tơbleăng Vi ƀan kong pơlê ai kơlo tŏng kum tơtro, pro ti lâi ôh tá ăm ai tơdroăng hok tro thế  lôi pơtê tơ’noăng xua pá puât ‘na cheăng kâ lơ ôh tá ai liăn vâ prôk lăm tơ’noăng’’.

Ƀă tơdroăng ki hbrâ nhên ‘na tơmeăm khoăng, tơkŭm po hriâm mâu ƀai tơ’noăng inhên, tơdroăng tơrŭm tơtro pơla mâu khu cheăng, Hneăng tơ’noăng mơgêi râ má pái phôh thong hơnăm kố a mâu kong pơlê Tây Nguyên kô châ tơƀrê lĕm má môi.

VOV Tây Nguyên chêh

A Sa Ly tơplôu ƀă tơbleăng