Ƀă inâi “Ƀuôn Ma Thuột – Tíu troh dêi kơphế lâp plâi tơnêi” mơdĭng hiăng ƀlêi chiâng ƀă hên tơdroăng tơkêa ki tơƀrê, ƀriê tung hiâm mơno kuăn pơlê ƀă tơmối. Mơdĭng hiăng hnê tối châ 5 tơdroăng ki kal; túa pơtó; tíu troh; mot tơrŭm cheăng; tơdroăng tơdjâk ƀă tơmiât troh tơdroăng kong têa ê ƀă tơdroăng ki rơhêng vâ mơdêk tíu ối dêi Kơphế Ƀuôn Ma Thuột; tơbleăng túa lĕm tro Kơphế Ƀuôn Ma Thuột troh ƀă pú hmâ tung lâp plâi tơnêi.

Tung rôh po mơdĭng ai Rôh hôp tơdjêp troăng prôk kong têa ê hơnăm 2023 ai tơdroăng ki veăng dêi lối 464 ngế kăn, tung mê ai 86 ngế kăn dêi mâu khu tơrŭm kong têa ê cho kăn teăng mâ mâu kong têa a Việt Nam. Mơgêi rôh hôp hiăng ai 10 hlá mơéa, chôu vế tơrŭm cheăng hiăng châ kĭ pơla mâu khu mơdró kâ tê kơphế ngi kong têa ê ƀă mâu khu ki tê tơmeăm ngi kong têa ê lo ing mâu kong têa Sinuâ, Hàn Quốc ƀă khu mơdró kâ Việt Nam.

Tơdjâk troh tơdjêp troăng klông, tung hơnăm 2023, mâu kong pơlê tung kơpong Tây Nguyên hiăng ai hên tơdroăng mơ-eăm ƀă djâ châ tơƀrê hên khât. Khu râ kăn pơkuâ kong pơlê Lâm Đồng hiăng veăng, tơkŭm po tơdroăng tơdjêp troăng klông ƀă hên kong pơlê, pơlê kong kơdrâm tung tơnêi têa; mơhnhôk tơrŭm cheăng tung mâu kơvâ cheăng ƀă kong têa Nhuk, Hàn Quốc, Ấn Độ.

Tơdroăng châ tơƀrê ki nhên, mơ’nui hơnăm 2023, roh kơneăng dêi khu tơƀai Jeju Air sap ing tơraih tơƀai Incheon (Seoul), Hàn Quốc hiăng kơneăng tơdrăng troh tơƀai Liên Khương (kong pơlê Lâm Đồng), mơnhên tơdroăng ki hdró ăm tơdroăng pơxiâm lĕm tro, thăm pêi pro tâ mê nếo tơdroăng tơrŭm krá tơniăn pơla khu râ kăn pơkuâ kong pơlê Lâm Đồng ƀă pơlê kong xiâm Seoul tối krê ƀă mâu kong pơlê, pơlê kong kân dêi Hàn Quốc  tối tơdjuôm, kơdroh ‘nâng ‘nâi pơla 2 kong pơlê, pro tơ’lêi hlâu ăm kuăn pơlê ƀă tơmối ôm hyô lăm ôm hêi, hriâm tâp ƀă kong pơlê Lâm Đồng xuân pói tơngah mơjiâng tơdroăng mơnhông nếo tung kơbông krếo mơ’no liăn cheăng, mơnhông cheăng kâ – rêh ối pơlê pơla.