Tiô Khu pơkuâ Kơmăi kơmok tê mơdró kong pơlê Gia Lai, tiô tối hdrối tơdroăng kal vâ rôe tơmeăm tung roh Têt Lo hơnăm nếo Quý Mão 2023 kô tâk dâng 30%. Vâ tơniăn mơjiâng pro kal vâ tơmeăm khoăng. Khu kố hiăng pơkâ mâu tíu cheăng, khu tê mơdró pêi pro pơkâ ‘măn mâu tơmeăm ki kal xúa rêm hâi, ki rơhêng vâ tối cho tơmeăm kâ, pêi pro châ tơƀrê tơdroăng rak tơniăn yă. Tơdrêng amê, mâu tíu cheăng kĭ tơkêa tơniăn ki dâi lĕm tơmeăm khoăng, ai mơ-éa mơnhên tŭm, xiâm kối nhên.

Jâ Đào Thị Thu Nguyệt, Kăn phŏ pơkuâ Khu pơkuâ Kơmăi kơmok tê mơdró Gia Lai, tối:

“Kơxô̆ tơmeăm hơnăm kố tiô tối hdrối kô châ 20.800 rơtal liăn, kơxô̆ tơmeăm ‘măn rêm hơnăm cho tơniăn tŭm. Khu pơkuâ kơmăi kơmok tê mơdró xuân pêi pro mâu pơkâ pêi ăm mâu khu tê mơdró vâ ‘măn tơmeăm khoăng tơniăn tê ƀă kơjo mơngế Việt Nam kơjo xúa tơmeăm khoăng Việt Nam vâ pêi pro mâu tơdroăng tung roh Têt. ‘Măn tơmeăm tơniăn mơjiâng pro kal vâ, ôh tá ăm ai tơdroăng mơdêk yă tung roh Têt Lo hơnăm nếo 2023 kố’’.

A kong pơlê Dak Lak, kơchơ mơdró tơmeăm khoăng tê a Têt Lo hơnăm nếo Quý Mão dế tơkŭm po kơdrâm phiu ro. Ƀă 2 tíu tê yo chah tung pơlê kong kơdrâm Ƀuôn Ma Thuột, nâ Nguyễn Thị Nguyệt, tối ăm ‘nâi, roh Têt kơxô̆ tơmeăm tê tung kơchơ mơdró tâk vâ chê 3 xôh, drêng hên má môi tê châ dâng 7 tă/hâi.

“Tíu tê kố mơdró dâng 5 hơnăm kố, mê rêm hơnăm á pêi a Têt kơxô̆ tơmeăm hên, tơmeăm a kố mê bu xúa hơ’nêh nếo tê, ôh tá xúa hơ’nêh ki tâ tung kơtuh hngíu, xo a tíu siê, chêh ai to lâi hơ’nêh kơhiâm mê pro to mê. Nôkố ki krúa lĕm cho kal má môi, ƀă mâu tơmeăm ki râm thế pêi tiô Khu xiâm ngăn pơkeăng ƀă khăm pơlât pơkâ, vâi ăm to lâi mê pro to mê tê’’.

Tíu uâ mơdiê pro tơmeăm Thành Phát, pơlê kong kơdrâm Ƀuôn Ma Thuột troh nôkố xuân hiăng chôu ‘măn tŭm mâu tơmeăm ki kal xúa rêm hâi. Tiô jâ Vũ Thị Gấm, pơkuâ tíu mơjiâng pro tơmeăm, tối hdrối, roh Têt hơnăm kố tơdroăng kal vâ tơmeăm kâ tâk dâng 20% tâng pơchông hâi tiah hmâ. Vâ tơniăn tŭm tơmeăm khoăng, tíu pro hiăng hbrâ kok tơmeăm a mâu tíu pro ing Pơlê kong kân Hồ Chí Minh ƀă mâu khu tơrŭm pêt mơjiâng tơmeăm pêi chiâk deăng krúa tung kong pơlê Dak Lak:

“Tơmeăm khoăng môi tiah kơƀăn mưt, kĕo mâu tơmeăm ki ê hiăng châ rôe châ 90%. Má péa nếo, nôkố dế mot hneăng pro hơpê tâm chôu, mâu tơmeăm kâ tiô khôi vâi krâ nah a Têt. Hơnăm ki lâi xuân môi tiah mê, tiô tơkêa ƀă khu pơkuâ kơchơ mơdró, khu tê mơdró rôe tơmeăm tiô tro xiâm kối tơmeăm inhên, klêi mê tĕm inâi mâu tơmeăm ki rôe ing kong têa ê thế inhên nếo vâ tơniăn ki pơxúa dêi mơngế rôe’’.

Vâ tơniăn dâi lĕm ƀă yă tơmeăm khoăng, lối 1 khế kố khu cheăng pơkuâ kơchơ mơdró ối tung Kơ koan xiâm pơkuâ kơchơ kong pơlê Dak Lak hiăng thăm pêi pro mâu tơdroăng lăm séa ngăn tơdroăng mơjiâng pro. Tơdrêng amê thăm pơtâng tối tơbleăng tối luât ƀă kĭ tơkêa ƀă mâu khu tơrŭm cheăng, ngế krê ôh tá pơto ‘măn kơtôa, tê mơdró tơmeăm ki ôh tá xê khât, tơmeăm ki ôh tá ai xiâm kối nhên.

Pôa Mai Mạnh Toàn, Kăn xiâm pơkuâ Kơ koan xiâm pơkuâ tê mơdró kong pơlê Dak Lak tối ăm ‘nâi:

“Mơnhên pơlê, tíu ai mơngế, tơmeăm ki kal, mơjiâng pơkâ pêi ki nhên vâ pêi pro châ tơƀrê, thăm séa ngăn pơkuâ kơchơ tê mơdró ƀă pơxâu phâk kơtăng mâu tơdroăng pro xôi ƀă mâu tơmeăm ki kal xúa rêm hâi kum tê ăm kuăn pơlê tung roh Têt’’.

A kong pơlê Dak Lak xuân mơjiâng 3 Khu séa ngăn ‘na rak tơniăn krúa lĕm tơmeăm, tơkŭm po séa ngăn a mâu tíu mơjiâng pro, uâ mơdiê, pro, tê mơdró, rôe ing kong têa ê tơmeăm, tê mơdró tơmeăm ôu kâ, tê mơdró tơmeăm ôu kâ troăng kơphô̆ a 7 tơring, pơlê krâm ƀă pơlê kong kơdrâm Ƀuôn Ma Thuột.

Pôa Phạm Thế Hoan, Kăn phŏ séa ngăn Khu pơkuâ ‘na pêi chiâk deăng ƀă mơnhông mơdêk thôn pơlê tối ăm ‘nâi:

“Klêi kơ’nâi séa ngăn mê hlo tâi tâng mâu rơpŏng, khu pú hên, ngế krê mơjiâng pro tê mơdró tơmeăm pêi tơtro tiô mâu pơkâ dêi luât. Laga ai mâu tíu pro xôi mê ngin kô tơkŭm pơxâu phâk tiô pơkâ. Tơrŭm ƀă séa ngăn mê ngin kô pơtâng tối pơkâ ‘na luât rak tơniăn troăng klông ƀă rơxế kơtâu ƀă hnê mơhno mâu tíu mơjiâng pro tê mơdró tơniăn krúa lĕm tơmeăm tiô pơkâ’’.

Vâ tơniăn yă kơchơ tê mơdró klăng roh Têt Lo hơnăm nếo Quý Mão 2023, Vi ƀan kong pơlê Dak Lak hiăng ‘măn lối 1.500 rơtal liăn vâ ‘măn tơmeăm khoăng ki kal xúa rêm hâi. Khu mâu tơmeăm kal tơkŭm rak tơniăn yă roh mơ’nui hơnăm 2022 ƀă Têt Lo hơnăm nếo Quý Mão 2023, mê cho: tơmeăm kâ (tơxông, phái xú hŏm pêt tung tơnêi têa), hơ’nêh (chu, í peâp, kơtâ í peâp, têa rơmâ, sik, ƀô̆t ngot ƀă mâu tơmeăm ki pro, kơchâi, plâi, pôm), hên tơmeăm ki ê. Hâi khế rak tơniăn yă sap ing hâi lơ 30/11/2022 troh hâi lơ 30/2/2023.