Mơ’nui măng tĭng hdrối, Vi ƀan hnê ngăn cheăm Ea Tul, tơring Čư̆ Mgar, kong pơlê Dak Lak tơkŭm po “Hâi leh Tâi tâng kuăn pơlê kring vế - gak ngăn tơnêi têa hơnăm 2023. Veăng ai mâ a hâi leh mê ai pôa Trần Lưu Quang, Ngế pro xiâm phŏ hnê ngăn Chin phuh, kăn teăng mâ pơkuâ Kŏng an, kăn pơkuâ ngăn Đảng, Vi ƀan hnê ngăn kong pơlê Dak Lak rơtế ƀă mâu khu râ, pơkuâ cheăng kong pơlê.

Mâu hơnăm hdrối nah, tơdroăng tâi tâng kuăn pơlê kring vế - gak ngăn tơnêi têa a cheăm Ea Tul châ tơbleăng lâp lu tâi tâng a mâu thôn, pơlê ƀă hiăng pêi klêi mâu tơdroăng ki tơƀrê. Mâu kơvâ cheăng hdroâng kuăn ngo, tơdroăng loi tĭng tiô khôp, gak kring thôn pơlê châ rak vế; mâu ngế ki pro xôi luât châ hbrâ mơdât, pơtối rak vế cheăm pơlê ôh tá pâk chik ma tŭi, ôh tá ai tơdroăng ki tơklâm rơxế a troăng, tung khu pơkuâ tơrŭm, xua vâ kum kuăn pơlê, kuăn pơlê tơrŭm, loi Đảng, khu kăn pơkuâ.

Pôa Y Uốt Ayun - Kăn pơkuâ hnê ngăn Đảng cheăm Ea Tul, tơring Čư̆ Mgar tối, nôkố 10 to pơlê ƀă 1 to thôn pơrá châ krâ camera séa ngăn, ƀă mơjiâng tôh pơkuâ ngăn xêh. Pôa Y Uốt tối ki rơkê dêi tơdroăng tâi tâng kuăn pơlê kring vế - gak ngăn tơnêi têa a cheăm tung pơla hdrối kố nah.

“Tung pơla hdrối kố nah, kŏng an chính quy vêh a cheăm mê hiăng kum mơjiâng mâu tôh pơkuâ ngăn xêh, rêm kong măng lăm pơtrui kring vế - gak ngăn tơniăn a cheăm pơlê. Kơnôm mê a cheăm tá hâi ai tơdroăng ki tong hơ’vĕng kế tơmeăm ki lâi ôh. Pakĭng mê, khu kŏng an kố ối mơhnhôk mâu rơxông hơnăm ối nếo, mâu vâi muăn hok tro đi đo ai tơdroăng rêh ối tơniăn, kơhnâ, pơkuâ ngăn, mơdât mâu ngế ki pro xôi a cheăm”.

Veăng a hâi leh, pôa Trần Lưu Quang, Ngế pro xiâm phŏ hnê ngăn Chin phuh tơmâng xo, khĕn kơdeăn ƀă mơnhên tối khât mâu tơdroăng ki Đảng ƀô̆, khu kăn pơkuâ ƀă Kuăn pơlê cheăm Ea Tul hiăng pêi pro klêi tung pơla hdrối kố nah. Ngế pro xiâm phŏ hnê ngăn tơnêi têa rơhêng vâ Đảng ƀô̆, Khu kăn pơkuâ ƀă Kuăn pơlê cheăm Ea Tul pơtối mơdêk hiâm mơno tơrŭm, hbrâ rơnáu tung tơdroăng ki tâi tâi tâng kuăn pơlê tơrŭm kring vế - gak ngăn a cheăm pơlê, rơkê plĕng tung tơplâ mơdât mâu tơdroăng ki tơpui tối ôh tá tro, tơtrâ Đảng, Tơnêi têa ƀă pro ôh tá tơniăn tung hdroâng kuăn ngo a cheăm, pơlê tối krê, kong pơlê Dak Lak tối tơdjuôm, vâ veăng kum mơjiâng pơlê pơla tơniăn tung tơdroăng rêh ối ăm kuăn pơlê.

Pôa Trần Lưu Quang, Ngế pro xiâm phŏ hnê ngăn tơnêi têa pơkâ thế Đảng ƀô̆, Khu kăn pơkuâ ƀă Kuăn pơlê cheăm Ea Tul mâu tơdroăng ki kal tơtrŏng tiah a kơ’nâi kố:

“Pơtối pêi pro kơtăng ƀă khŏm tơƀrê mâu tơdroăng ki hnê mơhno dêi Tơnêi têa ‘na pêi pro tơdroăng Tâi tâng kuăn pơlê kring vế - gak ngăn tơnêi têa. Mơdêk hnoăng cheăng djâ troăng ahdrối dêi khu kŏng an chính quy, măt trâ̆n tơnêi têa, mâu hô̆i, khu râ đi đo séa ngăn vâ ‘mâi mơnhông mâu tơdroăng ki tá hâi pêi pro tơƀrê tâng ai vâ pêi pro tơƀrê tơdroăng pơkâ. Ăm tơdroăng kố rế hía rế châ prôk trâu hngế tung tơdroăng ki ai khât, rế hía rế tơƀrê, vâ tâi tâng kuăn pơlê kơhnâ veăng”.

Pơla hdrối kố nah, jâ Trương Thị Ngọc Ánh, Kăn xiâm phŏ hnê ngăn Vi ƀan xiâm Măt trâ̆n Tơnêi têa Việt Nam xuân hiăng veăng a hâi po mơdĭng tâi tâng kuăn pơlê kring vế - gak ngăn tơnêi têa a cheăm Ngok Wang, tơring Đăk Hà, kong pơlê Kon Tum. Tung pơla hdrối kố nah, Khu hnê mơhno Tơdroăng hbrâ mơdât mâu ngế pro xôi, tơdroăng ki ôh tá tơniăn tung pơlê pơla ƀă mơjiâng tơdroăng tâi tâng kuăn pơlê kring vế - gak ngăn tơnêi têa tơring Đăk Hà hiăng veăng tí tăng ‘nâi plĕng ăm Khu pơkuâ ngăn Đảng, Vi ƀan hnê ngăn tơring pêi tơƀrê mâu tơdroăng hnê mơhno dêi Tơnêi têa ƀă dêi kong pơlê Kon Tum tung kơvâ cheăng kố.

Tơring Đăk Hà hiăng tơkŭm po 188 rôh hnê tối ‘na tơdroăng ki tâi tâng kuăn pơlê gâk kring tơnêi têa ăm lối 37.400 ngế. Kuăn pơlê tối tơbleăng ăm khu kŏng an 70 tơdroăng ki kơnía; mơhnŏng pơcháu nâp xêh hên pháu hnêa trếo pơtôu ki vâi bro xêh ăm kŏng an.

Tơpui a hâi leh jâ Trương Thị Ngọc Ánh, Kăn xiâm phŏ hnê ngăn xiâm Măt trâ̆n Tơnêi têa Việt Nam mơnhên tối khât klêi kơ’nâi pêi pro ƀlêi chiâng dêi tơring Đăk Hà, kong pơlê Kon Tum tung tơdroăng ki hnê tối, mơhnhôk ƀă tơbleăng tơdroăng tâi tâng kuăn pơlê gâk kring Tơnêi têa; tối rơdêi ki kal dêi tơdroăng kố ƀă kring vế - gak ngăn tơniăn dêi kong pơlê. Hlo tơdroăng ki pơlông jâ dêi khu ‘mêi tí tăng ‘nâi tơdjêp ƀă mâu khu tơrŭm tơtrâ pa kong mơhnhôk, pro tơklâ khu tơrŭm tâi tâng kuăn pơlê ƀă khu tơrŭm mâu tơdroăng tơtrâ ƀă mâu khu pơkua kuăn pơlê, jâ Trương Thị Ngọc Ánh pơkâ thế:

“Khu hnê mơhno pơtối mơdêk tí tăng ‘nâi vâ râ Đảng ai troăng hơlâ pơkâ, ai mâu tơdroăng ki hnê mơhno rơdêi tâ nếo ƀă tơdroăng tơ’noăng pêi pro. Mâu tơdroăng cheăng dêi mâu kơ koan tơrŭm cheăng Khu hnê mơhno athế tiô túa pơkâ tơmiât troh tơring, cheăm, séa ngăn kơtăng a kong pơlê, teăm ‘nâi tơdrêng ‘na tơdroăng tung kuăn pơlê, teăm ‘nâi mâu tơdroăng ki rơhêng vâ ai troăng tŏng kum teăm tơdrêng, tơxâng ƀă mâu tơdroăng pâ thế dêi mâu kuăn pơlê. Pơkâ thế mâu kăn pin thăm mơdêk tí tăng ‘nâi plĕng mâu hnoăng cheăng hnê tối, hnoăng cheăng hnê hriâm luât ăm vâi krâ nhŏng o”.