Mơjiâng a hơnăm 2021 xua mâu ngế hơnăm ối nếo ƀeăn ƀĕng rơkê, Kŏng ti tê mơdró Epis, tơring M’Drak, kong pơlê Dak Lak tê mơdró mâu tơmeăm, moi tiah: phom, kơlôn châ pro ing mâu tơmeăm ing kong kế dêi tơring. ‘Nâi tơdroăng ki rơdêi dêi kŏng ngê̆, mâu ngế hơnăm ối nếo hiăng châ achê mâu ngế rôe xúa ing mâu trang măng pơlê pơla ƀă kĭ inâi tơmeăm a mâu tơmeăm tê mơdró điê̆n tưh.

Nâ Lê Thị Hồng Thơm, Kăn phŏ pơkuâ Kŏng ti, tối ăm ‘nâi: Nôkố tơmeăm dêi khu tê mơdró hiăng ai mâ a tâi tâng mâu tíu tê mơdró điê̆n tưh ki hmâ châ kơdrâm mơngế rôe xúa ‘nâi ƀă ai tơdjêp hên ƀă môi tiah: Shoppee, Tiki, Lazada, Tiktokshop ƀă hía hé. Tơdroăng ki kố hiăng kum khu tê mơdró châ kơdroh hên kơxô̆ liăn mơđah tơbleăng ƀă lăm tê tơmeăm.

“Cho môi khu tê mơdró pơxiâm tăng cheăng pêi, xua mê xuân ối hên trâm pá ‘na kơxô̆ liăn, tíu tê mê tơdroăng tê mâu tơmeăm a tíu tê mơdró điê̆n tưh ƀă internet hiăng cho troăng ki rơdêi ƀă kum ăm ngin kơdĭng hên kơxô̆ liăn tung tơdroăng mung tíu tê lơ mâu tơmeăm ki khu tê mơdró tá hâi ai’’.

Xuân rah xo troăng châ achê ƀă po rơdâ kơchơ mơdró ing mâu tơdroăng ki tơ’lêi hlâu dêi tê mơdró điê̆n tưh, Kŏng ti tê mơdró Kim Long, a tơring Krông Ƀuk, kong pơlê Dak Lak hiăng rĕng ai mâu pú hmâ tê mơdró a hên kong pơlê, pơlê kong kơdrâm tung lâp tơnêi têa.

Pôa Đỗ Ngọc Anh, teăng mâ khu tê mơdró tối ăm ‘nâi:

“Tơmeăm á cho tơmeăm nếo, xua mê á hiăng tiô tơdroăng cheăng tung online cho ki xiâm. Ga thế hên châ lối 50% pêi lo liăn ing tơdroăng tê gá troh ing troăng tê mơdró, ing mâu website tê tơmeăm dêi á. Xua mê tơdroăng xúa website xuân môi tiah mâu tơdroăng tê mơdró tiô troăng online tung tê mơdró, gá cho môi tơdroăng ki kal tung tê mơdró dêi khu tê mơdró dêi tơná’’.

Tiô pôa Hoàng Minh Ngọc Hải, Kăn pơkuâ Tíu xiâm tơdjêp ƀă pơ’lêh pêi cheăng xúa kŏng ngê̆ Khu tơrŭm tê mơdró kong pơlê Dak Lak, kơxô̆ riân nôkố 70% pơ’leăng mâ mơngế Việt Nam châ xúa internet ƀă ki hên cho mơngế hơnăm ối nếo. Rôe tơmeăm tung mâu tíu tê mơdró điê̆n tưh chôa ‘lâng chiâng hmâ dêi mơngế rôe xúa. Khu tê mơdró kô châ achê ƀă hên tơmối ki vâ rôe. Khu tơrŭm cheăng hiăng ai hên tơdroăng ƀă troăng pêi châ pêi pro, tŏng kum mâu khu tê mơdró Dak Lak tơdjêp, tê tơmeăm, ki má lối cho tơmeăm pêi lo ing chiâk deăng dêi kong pơlê tung tíu tê mơdró mơ’no tơdrêng tung măng.

Pôa Hoàng Minh Ngọc Hải  tối ăm ‘nâi:

“Ngin hiăng po rơdâ ƀă tơdjêp lối 28 khu tơrŭm cheăng kŏng ngê̆ vâ mơjiâng tŭm tâi tâng tơdroăng, tơxup tơbriât vâ kum khu tê mơdró ai mâu troăng pêi ki tro má môi. Mâu troăng pêi kố xuân hiăng châ mơnhên ‘na tơdroăng ki pơkí ƀă ki châ tơƀrê. Drêng khu tê mơdró châ rơtế ƀă mâu tíu cheăng ki hiăng chiâng rơkê pêi cheăng, xuân môi tiah krếo thế pơ’lêh hlê plĕng chôa ‘lâng i iâ, á loi tơngah khât khu tê mơdró kô mâu tơdroăng ki mơdât mê tê mơdró điê̆n tưh dế djâ ăm ƀă châ tơƀrê hên tung tíu mơdró xúa kŏng ngê̆.