VOV4.Xơ Đăng - Tiô tối hdrối, tơnêi têa pin tê ká xi xŏng ngi kong têa ê tung pái khế hneăng má péa (4,5,6) hơnăm kố pơtối tâk rơdêi ƀă kô troh a kơlo 3 rơtal dollars Mih, xua kơnôm tơdroăng tơtêk rơdêi dêi tơdroăng tơnăng ká xi xŏng ki xiâm tung pái khế apoăng hơnăm ƀă apoăng hneăng má 2. Kơxô̆ liăn tê ká xi xŏng 4 khế apoăng hơnăm kố châ lối 3,6 rơtal dollars, tâk troh 46,8% tâng pơchông ƀă roh kố hơnăm nah.

Tiô tơbleăng, tung hneăng má 2, tê ká xi xŏng ngi kong têa ê kô pơtối tâk hôm păng ‘nâng drêng mâu tơmeăm ki tê xiâm, mê cho: xi xŏng, ká tra dế tơ’lêi hlâu ‘na tíu tê a mâu kong têa Mih ƀă Sinuâ. Pakĭng mê, yă ká xi xŏng tâk rơtế tơdroăng ki ôh tá bê ká vâ tê tung lâp plâi tơnêi xua tơdjâk ing hơkăng Rusi – Ukraina xuân cho roh tơ’lêi kân vâ thăm mơdêk ki kơnâ mâu tơmeăm ki xiâm tối krê ƀă tê ká xi xŏng ngi kong têa ê tối tơdjuôm dêi Việt Nam.

A Sa Ly tơplôu ƀă tơbleăng