Pôa Ngô Hiểu Khoa, Kăn pơkuâ Khu pơkuâ Grup pơkuâ Đèo Cả tối ăm ‘nâi troăng kân tung kơdâm tơnêi Phượng Hoàng xŏn 1,7 km, cho troăng kân ối tung tơdroăng mơjiâng pro troăng kân xŏn 11 km xua khu pro tơdah pro. Nôkố rêm hâi grup pơkuâ rah xo 400 ngế pêi cheăng ƀă dâng 100 rơxế, kơmăi kơmok, rơtế pêi cheăng mơjiâng pro troăng kân tung kơdâm tơnêi Phượng Hoàng rơtế 10 to kông.

Tâng tơdroăng tăng tơnêi peăng kong pơlê Khánh Hòa châ pêi pro tơniăn, mê kô chiâng ăm rơxế kơtâu tung troăng kân tung kơdâm tơnêi xŏn lối 117 km, troăng kân 4 hơlâ troăng, tung pơla mơ’no liăn mơjiâng hneăng má I hơnăm 2025. Tâi tâng kơlo liăn mơ’no pro troăng kân vâ chê 22.000 rơtal liăn. Nôkố tá khu ki mơ’no liăn ƀă mâu khu ki mơjiâng pro dế tơkŭm mơngế pêi pro, pơkâ pêi troh mơ’nui hơnăm 2026 lâp troăng kân kô ăm rơxế prôk lăm.