Thăm mơdêk hnoăng cheăng vâi kơdrâi Tây Nguyên tung mâu tíu tê tơmeăm pêi lo ing chiâk deăng
Thứ năm, 06:00, 26/10/2023
Tơplôu: Katarina Nga/VOV Tây Nguyên
Tơplôu: Katarina Nga/VOV Tây Nguyên
VOV4.Xơ Đăng - Kơxo lơ 25/10, a pơlê kong kơdrâm Ƀuôn Ma Thuột, kong pơlê Dak Lak, Khu tơrŭm cheăng kong têa ê, Khu xiâm ngăn Chiâk deăng ƀă Mơnhông thôn pơlê tơkŭm po Rôh hôp tối tơdroăng ki rơkê tung mơdêk hnoăng cheăng vâi kơdrâi tung mâu tíu tê mơdró kế tơmeăm pêi lo ing chiâk deăng.
Rôh hôp kố cho rôh vâ tối ăm dêi rơpó mâu tơdroăng ki rơkê, túa tơmiât tro vâ pro rôh mơdêk tơdroăng ki veăng kum dêi vâi kơdrâi tung tơdroăng ki kơnía, mơdêk hnoăng cheăng ƀă hnoăng pơxúa dêi vâi kơdrâi tung kơvâ pêi chiâk deăng ƀă mâu kơvâ cheăng ki kơnía dêi kế tơmeăm xiâm dêi Việt Nam môi tiah báu phái, pôm ƀok, kơphế ƀă tiu.
A rôh hôp, mâu kăn hiăng tơno ‘na hnoăng cheăng dêi vâi kơdrâi tung pêt tiu krá ton a Tây Nguyên, tơpui tối leăng klêi kơ’nâi 2 troh 3 rôh hriăn ngăn ‘na pêt báu hmâ ƀă kong prâi ai tơdroăng ki veăng dêi vâi kơdrâi. Teăng mâ khu vâi kơdrâi pêi chiâk deăng kong pơlê Dak Lak xuân tối ‘na ki rơkê ƀă tung pơla veăng tung mâu tơdroăng tơkêa mơnhông kơvâ kơphế ƀă pôm ƀok tơniăn ton.
Viết bình luận