Vâ thăm mơdêk, thăm mơdêk ki tơƀrê tối tơbleăng tơdroăng kal ‘na tơpui kâ ‘na hnoăng kuăn mơngế, tung 2 hâi lơ 26 – 27/10, a pơlê kong kơdrâm Kon Tum. Khu xiâm tối tơbleăng tơdroăng kal tơrŭm ƀă Khu pơkuâ hnê mơhno ‘na Hnoăng kuăn mơngế dêi Chin phuh ƀă Vi ƀan hnê ngăn kong pơlê Kon Tum tơkŭm po Rôh hôp hnê hriâm hnoăng cheăng tối tơbleăng tơdroăng kal ‘na hnoăng kuăn mơngế ăm vâ chê 200 ngế cho kăn ƀô̆ pêi dêi hnoăng cheăng tối tơbleăng tơdroăng kal, hnoăng cheăng pêi cheăng ‘na hnoăng kuăn mơngế 19 to kong pơlê, pơlê kong kân kơpong Tây Nguyên, Tây Nam Bộ ƀă Pơlê kong kân Hồ Chí Minh.

Tung pơla 2 hâi mâu kăn ki veăng a rôh hriâm tâp hnoăng cheăng tối tơbleăng tơdroăng kal ‘na tơpui kâ ‘na hnoăng kuăn mơngế châ pơkâ kơtăng dêi Ngế pro xiâm hnê ngăn Chin phuh ‘na tơdroăng kĭ pơkâ tơdroăng tơkêa tối tơbleăng tung um tơvi, rơ’jíu ‘na hnoăng kuăn mơngế; tối tơbleăng ‘na tơdroăng ki pro pơxúa ăm dêi tơná ‘na tơdroăng loi tĭng tung pơla hdrối kố nah ƀă tơdjâk dêi um tơvi tơpui kâ; hnê mơhno mơdêk tơdroăng ki mơđah tơbleăng um méa kong pơlê troh a mâu kong têa ê; ki rơkê ‘na ki hnê tối tung um tơvi, rơ’jíu tung mâu hlá tơbeăng tơpui kâ ƀă kong têa ê; tơdroăng cheăng dêi hnoăng kuăn mơngế ƀă mâu troăng tơmiât troh hnoăng cheăng hnê tối ‘na hnoăng kuăn mơngế.