Thăm mơdêk tơrŭm cheăng lêng Việt Nam - Cuba
Thứ tư, 06:00, 25/10/2023
Tơplôu: Katarina Nga/VOV
Tơplôu: Katarina Nga/VOV
VOV4.XơĐăng - Kơxo lơ 24/10, a tíu pêi cheăng Khu xiâm pơkuâ ngăn lêng, Thươ̆ng tươ̆ng Nguyễn Tân Cương, Kăn tí tăng ‘nâi plĕng Khu lêng Việt Nam, kăn phŏ pơkuâ ngăn lêng pơkuâ leh tơdah ƀă tơpui tơno păng ‘nâng ƀă Khu kăn tí tăng ‘nâi plĕng ngế xiâm pơkuâ mâu khu lêng kring vế kăch măng Cuba xua Thươ̆ng tươ̆ng Roberto Legrá Sotolongo - kăn xiâm tí tăng ‘nâi plĕng, ngế xiâm phŏ pơkuâ ngăn lêng mâu Khu lêng kring vế kăch măng Cuba lăm pôu Việt Nam sap ing hâi lơ 19 – 28/10/2023.
A rôh tơpui tơno, Péa pâ hiăng môi tuăn mơnhên tối tơrŭm cheăng lêng pơla péa tơnêi têa châ mâu rơxông mâu kăn pơkuâ Việt Nam ƀă Cuba tơmâng ngăn khât, chiâng môi tung mâu tơdroăng ki xiâm tung tơrŭm cheăng tơdjuôm péa tơnêi têa, veăng kum rak vế tơdroăng ƀlêi chiâng dêi kăch măng, tơtro ƀă tơdroăng rơhêng vâ ƀă ki rơdêi dêi rêm tơnêi têa.
Tung la ngiâ, pơkâ thế péa pâ tối tơbleăng túa pơkâ tơrŭm cheăng lêng pơla hơnăm 2023 - 2025; Tơbleăng tơƀrê tơrŭm cheăng kơmăi kơmok cheăng lêng, tơtro ƀă tơdroăng ki rơhêng vâ ivá ai ƀă tơdroăng tơ’lêi hlâu dêi rêm pâ.
Viết bình luận