Pôa Ngô Minh Hiển, ngế xiâm phŏ pơkuâ Rơ’jíu Việt Nam pơkuâ po rôh tơdah. Péa pâ hiăng rơtế ƀă dêi rơpó tơpui tơno klêi kơ’nâi tơrŭm cheăng tung mâu hơnăm hdrối ƀă túa pơkâ tơbleăng tơdroăng tơkêa tơrŭm cheăng tung hơnăm la ngiâ 2024.

A rôh pêi cheăng, pôa Ngô Minh Hiển, ngế xiâm phŏ pơkuâ Rơ’jíu Việt Nam tối nhên, Rơ’jíu Việt Nam mơnhên tối khât mâu tơdroăng tơkêa tơrŭm cheăng ai pơxúa mơdêk ki rơkê plĕng ‘na tơdroăng cheăng ƀă mâu tơdroăng ki rơkê ‘na chêh hlá tơbeăng ăm hên ngế ki chêh hlá tơbeăng dêi Rơ’jíu Việt Nam tối krê, hlá tơbeăng Việt Nam tối tơdjuôm.

Peăng dêi tơná, kăn pơkuâ Wallonie-Bruxelles cho pôa Pierre Du Ville mơnhên tối khât tơdroăng tơrŭm cheăng ƀă Rơ’jíu Việt Nam ƀă rơhêng vâ hơ’lêh nếo mâu tơdroăng ki tŏng kum hnê cheăng tung kơvâ chêh hlá tơbeăng ăm pơxúa ƀă tơƀrê tâ.