VOV4.Xơ Đăng - Kơtăn kố ai 55 hơnăm (hâi lơ 24/6/1967), Việt Nam ƀă Kul pơxiâm mơjiâng tơrŭm cheăng tơpui kâ ƀă hâi kố hiăng chiâng tơdroăng ki hmâ dêi péa tơnêi têa môi tiah môi tơdroăng ki kal, po môi troăng prôk nếo tung tơrŭm cheăng péa tơnêi têa, tơtro ƀă ivá dêi péa hdroâng kuăn ngo ki achê. Maluâ trâm mâu tơdroăng xơpá dêi tơdroăng ton nah ƀă mâu tơdroăng ôh tá tơniăn dêi rơxông hdrối nah, la tơrŭm cheăng pơla Việt Nam ƀă Kul rế hía rế vâ krá, tơniăn, châ mâu rơxông kăn pơkuâ ƀă kuăn pơlê péa tơnêi têa ôh tá la lâi pơtê thăm tơbêng, rak vế, chiâng tơdroăng ki kơnía dêi péa hdroâng kuăn mơngế.

55 hơnăm cho pơla mâu hơnăm ki ton khât tâng vâ pơchông ƀă tơdroăng ki hiăng pêi pro dêi tơrŭm pơla péa hdroâng mơngế,  cho pơla rôh ki ai pơxúa kân rơtế ƀă tung tơdroăng kal tí tơrŭm pơla péa tơnêi têa. Mê cho rôh ki kuăn pơlê Việt Nam ƀă Kum nhŏng o đi đo rơtế ƀă dêi rơpó tung tơdroăng pêi cheăng mơnhông pro tơbleăng lĕm hdroâng mơngế ƀă rơtế mơjiâng tơnêi têa hơniâp, kuăn pơlê hơniâp ro, phâi tơtô.

Tơdroăng tơrŭm môi tuăn, ‘nâi pâ hơ-ui pâ khât dêi rơpó, tŏng kum dêi rơpó péa hdroâng mơngế cho tơdroăng ki mơhnhôk, cho ki rơdêi vâ péa tơnêi têa rơtế ƀă dêi rơpó plâ ƀlêi trâng rơxông khu ki kơdê mơngế Pol Pot, djâ tơnêi têa Chuô Thôt Kul kâi châ xông nếo ƀă tơdroăng tơrŭm pơla péa tơnêi têa mơnhông tơ-brê môi tiah hâi kố.

Tiê̆n sih Kim Phea, Kăn phŏ Viện trưởng viện Hàn lâm Kul ai tối tiah kố:

“Tơdroăng tơrŭm cheăng, tơrŭm môi tuăn, tơrŭm tơ-rôa ƀă tŏng kum ing mố đô̆i pleăng hnoăng cheăng Việt Nam ƀă Kul ai pơxúa ton nah đi đo ta ah ƀă ôh tá kâi xut tâi. Tơdroăng veăng kum dêi Việt Nam ƀă Măt trâ̆n tơrŭm môi tuăn tŏng kum kong têa Kul kal khât, veăng rôih hnâp rơxông Khmer Đỏ ƀă mơjiâng nếo tơnêi têa Kul”.

Ngế xiâm tơpui kâ Việt Nam Bùi Thanh Sơn

Mâu hnoăng ki Việt Nam ƀă Kul rơtế châ pêi pro tung plâ 55 hơnăm hdrối, ôh tá xê to plâ ƀlêi trâng dêi tơdroăng tơplâ pro tơleăng lĕm hdroâng mơngế, mê ối mơhno a ki mơnhông tơ-brê tơrŭm cheăng tung tâi tâng mâu tơdroăng tung mơjiâng ƀă mơnhông tơnêi têa. Tung lối 2 hơnăm hdrối, mơhé pơreăng kân COVID-19 tơdjâk troh ki mơnhông mơdêk a tơrêm tơnêi têa, la tơdroăng tơrŭm pơla Việt Nam - Kul xuân ôh tá pơtê mơnhông mơdêk.

Péa tơnêi têa rơtế tơrŭm hbrâ mơdât pơreăng châ tơ-brê, kum dêi rơpó ƀă hên tơdroăng tá tuăn hiâm ƀă tơmeăm khoăng, kế tơmeăm ‘na xúa khăm pơlât, liăn ngân, vaccine. Péa tơnêi tea đi đo tơrŭm krá, hnê tối ăm dêi rơpó ‘nâi teăm tơdrêng ƀă kum dêi rơpŏ a mâu hneăng hôp lâp plâi tơnêi ƀă tung kơpong, malối tung tơrŭm dêi mâu kong têa Đông Nam Á (ASEAN ), Khu lâp kong têa ƀă mâu luât pơkâ tơrŭm dêi kơpong Mekong.

Ƀă tơdroăng rak tơniăn, tơ’nôm veăng kum dêi kuăn pơlê péa tơnêi têa, tơdroăng tơrŭm pơla Việt Nam - Kul nôkố dế mơnhông mơdêk tơ-brê tiô troăng rơhlâ “Kong têa achê tơrŭm lĕm, tơrŭm tiô khôi hmâ, tơrŭm tung tŭm tơdroăng cheăng, krá tơniăn ton’’. Kăn teăng mâ Việt Nam a Kul Nguyễn Huy Tăng tối:

“Pin pơtối mơdêk tơrŭm cheăng rơdêi tung mâu kơvâ cheăng kâ kal kí vâ tơniăn tiô troăng rơhlâ tâi tâng tơrŭm cheăng péa tơnêi têa, mơdêk tơdroăng hnê  ăm mâu khu râ kuăn pơlê  péa tơnêi têa, malối hnê ăm mâu rơxông nếo ‘nâi hnoăng cheăng ki kal ai pơxúa tung tơdroăng tơrŭm cheăng pơla Việt Nam - Kul xuân môi tiah ai pơxúa rêh ối dêi tơdroăng tơrŭm mê.  Vâ ing mê ‘mâi mơnhông, mơdêk tuăn loi ‘na kal kí, pro xiâm rêh ối pơlê pơla krá tơniăn ăm tơdroăng mơnhông, mơdêk tơrŭm tâi tâng tơdroăng cheăng péa tơnêi têa. Tơdrêng amê, mơdêk rơdêi tâ tung tơdroăng tơrŭm kring tơniăn, ‘na cheăng lêng ƀă tơpui kâ. Kố cho  xiâm ki kal tung tơrŭm pơla péa tơnêi têa, veăng rak tơniăn tơdroăng mơnhông mơdêk dêi péa tơnêi têa. Ƀă Ki kal tâ cho mơdêk tơrŭm cheăng kâ, pro xiâm mơhnhôk nếo, pro xiâm tơniăn ăm ‘na mơnhông mơdêk krá tơniăn pơla Việt Nam - Kul. 

Ngế xiâm pơkuâ ngăn lêng kong têa Kul Tea Banh ƀă Ngế xiâm pơkuâ lêng Việt Nam Phan Văn Giang xup um ƀă mâu vâi muăn hok tro Kul

Hâi lơ 24/6/1967 cho môi tíu ki hdró tơdroăng tơrŭm môi tuăn, tơrŭm tơrôa hmâ ƀă kuăn pơlê pơla péa tơnêi têa Việt Nam - Kul. Tơdroăng tơrŭm tiah hmâ pơla péa kuăn pơlê péa tơnêi Việt Nam ƀă Kul 55 hdrối veăng ‘no hnoăng kal tung mâu hnoăng châ pêi pro a tơrêm tơnêi têa, cho xiâm, ki krá kak vâ péa tơnêi têa pơtối rak vế pêi pro tung pơla nôkố ƀă tung la ngiâ.

Pôa Nguyễn Phú Trọng, Kăn xiâm hnê ngăn Đảng [a\ pơtáu kong têa Kul

Tơdroăng tơrŭm cheăng péa tơnêi têa rế châ mơhno ki rơdêi tung tơrŭm cheăng kâ, hiăng ƀă dế châ kăn hnê ngăn ƀă kuăn pơlê péa tơnêi têa pơtối rak vế pêi pro tung mâu hơnăm nôkố ƀă tung la ngiâ.  Tơdroăng tơrŭm péa tơnêi têa rế châ hdró tung tơdroăng tơrŭm cheăng, hiăng ƀă dế châ kăn xiâm hnê ngăn ƀă kuăn pơlê péa tơnêi tâ rak vế ƀă pơtối pêi pro, châ rơxông nếo péa tơnêi têa hlê nhên ƀă mơjiâng nếo mâu tơdroăng tơrŭm.

Sun So Phonl, sinh viên hneăng hdrối dêi hngêi trung Đại học Prea Say Ha Mu Ni Ria, tối:

“A phiu ro ƀă hâk tơngăm xua tơnêi têa á hiăng mơjiâng tơdroăng tơrŭm môi tuăn ƀă Việt Nam. Tơdroăng tơrŭm mê hiăng kum 2 tơnêi têa pin châ hơniâp lĕm, tơniăn ƀă mơnhông tơ-brê. Mâu kong têa achê thế kơnôm dêi rơpó mơnhông mơdêk krá tơniăn. Mâu hơnăm ối nếo môi tiah ngin thế ai hnoăng rak vế tơrŭm tơrôa ki lĕm mê”.

Tơdrêng ƀă ôu tơchoâm têa kroăng Mekong, Việt Nam ƀă Kul ai tơchoâm tơdroăng rêh ối. Mâu hnoăng ki kal châ pêi pro a tơrêm to tơnêi têa, tơdroăng tơrŭm trâu rơdâ ƀă ki tơ-brê tung plâ 55 hơnăm hdrối cho mâu tơdroăng ki ăm hlo nhên  khât, tơ-brê ‘na tơrŭm cheăng kâ pơla Việt Nam - Kul.

Phùng Kiên- Văn Đỗ - VOV CPC

Gương tơplôu ƀă tơbleăng