VOV4.Xơ Đăng - Kơxê lơ 14/4, pôa Nguyễn Xuân Phúc, Kăn xiâm hnê ngăn tơnêi têa hiăng châ hlo Leh kĭ tơkêa Troăng pơkâ tơrŭm pơla Ƀơrô Kăn hnê ngăn tơnêi têa ƀă Hngêi tơleăng kuăn pơlê ki kân, Kơ koan xiâm hnê kuăn pơlê arak luât. Xông tơpui a roh leh, pôa Nguyễn Xuân Phú kheăn kơdeăn, mâu hneăng cheăng hiăng hluâ, tơdroăng tơrŭm pơla Ƀơrô Kăn xiâm hnê ngăn tơnêi têa ƀă Hngêi tơleăng kuăn pơlê ki kân, Kơ koan xiâm hnê kuăn pơlê arak luât ƀă mâu kơ koan pơkuâ tơnêi têa, hnê arak luât đi đo krá tơniăn, châ tơƀrê hên tơxâng păng ‘nâng mơnhên. Ing mê, kum tơniăn pêi pro tơtro tơdroăng cheăng, hnoăng cheăng dêi rêm kơ koan.

Pôa Nguyễn Xuân Phúc, Kăn xiâm hnê ngăn tơnêi têa ƀă khu râ kăn kĭ mơ-éa

Pôa Nguyễn Xuân Phúc pơkâ thế Khu pơkuâ tơdroăng tơnêi têa, Hngêi tơleăng kân, Kơ koan xiâm hnê kuăn pơlê arak luât, Khu xiâm pơkuâ Kŏng an, Viƀan hnê arak luât dêi Kuô̆k hô̆i ƀă Ƀơrô Kăn hnê ngăn tơnêi têa ai tơdroăng tơrŭm krá tơniăn, đi đo ƀă châ tơƀrê tâ. Kăn hnê ngăn tơnêi têa pơkâ mâu mơ-éa pơkâ châ kĭ tơkêa roh kố thế châ pêi pro trâu hơhngế ƀă pêi pro kơtăng ing kăn pơkuâ troh mâu khu cheăng, ki rơhêng vâ tối cho mâu kăn ƀô̆, mâu ngế pêi cheăng tơdrêng pêi pro tơdroăng cheăng.