Tung roh ki tu ko hmái i lĭng, tơdrá “Hồn tử sĩ” mơnê kân ƀă koh tơbâ, lối 30 ngế vâi muăn hok tro teăng mâ dêi 7 to cheăm tíu tơkăng kong a kong pơlê Dak Nông koh tá tuăn i hiâm, têk nhang, pleăng rơvĭng reăng a Tíu tơbâ Khu ngế khên tơnôu hiăng hlâ hía a Đông gak tíu tơkăng kong dêi bo cheăng tơkăng kong ƀă kong têa vâi inâi cho Bu Prăng, cheăm Bu Prăng, tơring Tuy Đức. Kố cho môi pâ tung tơdroăng “Chôu hriâm tíu tơkăng kong” xua Mô đô̆i Gak tíu tơkăng kong Dak Nông tơkŭm po ăm mâu vâi muăn hok tro. Akố, mâu vâi muăn châ hơ’muăn tối ‘na tơdroăng tơplâ, hlâ hía, khên tơnôu dêi rêm rơxông pâ pôa, ngoh nah, ki rơhêng vâ tối cho 16 ngế hiăng hlâ dêi Đông Mô đô̆i gak tơkăng kong a bo cheăng Bu Prăng Khên tơnôu hiăng tơplâ troh chôu phut má mơ’nui vâ kring vế, xo răk dêi kơpong tíu tơkăng kog Bu Prăng. Mâu tơdroăng roh ton nah ki kơnía git kố hiăng pro mâu vâi muăn hok tro tâ ƀriê phoih tung hiâm mơno, tơbêng tơdroăng mơjo pâ dêi Tơnêi têa. Muăn Y Dũng, hok tro lâm 7A5, Hngêi trung râ má péa Nguyễn Huệ, cheăm Thuận An, tơring Dak Mil, cho kuăn roăng dêi Đông gak tơkăng kong Thuận An ai tối:

“Drêng châ hriâm a lâm ki hriâm a tíu tâp tơneăn kố á hlo hâk mơnê păng ‘nâng dêi tơnêi têa tơná. Á rơhêng vâ châ ai hên lâm hriâm tiah kố. La ngiâ drêng xông kân ah, á rơhêng vâ chiâng ngế mô đô̆i, vâ kring vế rak ngăn tơneăn ƀă gak ngăn tơnêi têa tơná”.

Veăng châ hriâm a “Chôu hriâm tíu tơkăng kong”, rơtế ƀă tơdroăng têk nhang, pleăng rơvĭng reăng a Tíu tơbâ mâu ngế pâ pôa, ngoh nâ ki khên tơnôu hiăng hlâ hía, mâu vâi muăn hok tro hiăng châ mâu thái mô đô̆i gak tơkăng kong djâ lăm pôu ngăn, châ hlo nhên mâu troăng tung kong tíu ki lăm pơtrui, tíu tâp tơneăn, tíu ki gak ngăn ai mơngế prôk lăm, rơxế kơtâu tơkâ luâ troăng tơkăng kong ƀă hên hĕng mâu tíu ki ê. Châ lăm hlo, lăm ngăn ki păng ‘nâng, châ hriâm, hlê plĕng mâu tơdroăng ki nếo, mâu tơdroăng ki ta hâi chêh tối tung hlá mơ-éa ki krih tơviah kố ƀă ki ai pơxúa păng ‘nâng tung tơdroăng ki tơbêng hiâm tuăn mơjo pâ pơlê pơla, Tơnêi têa ƀă pơtối châ mơnhông ivá vâ ăm mâu vâi muăn mơ-eăm hên tâ nếo tung hriâm tâp. Roh apoăng châ veăng hriâm “Chôu hnê hriâm tíu tơkăng kong”, cho a tơneăn kơxô̆ 55, muăn Triệu Thị Cẩm Nhung, hok tro lâm 9A, Hngêi trung râ má môi ƀă Hngêi trung râ má péa Bế Văn Đàn, cheăm Thuận Hà, tơring Dak Song hơniâp ro xua hiăng châ ngăn, châ hlo, châ hriâm mâu tơdroăng ki păng ‘nâng.

“Á hlo chôu hriâm akố ro păng ‘nâng ƀă ai hên ƀai ki mơnhên tối tơdroăng  ki ai păng ‘nâng drêng á kuăn ối a hngêi trung. Drêng châ ngăn, châ hlo ƀă châ hriâm ing ƀai hriâm akố, á thăm rế khíu pâ dêi pơlê pơla, tơnêi têa, ing tơdroăng ki mơjo pâ mê, á kal athế ai hiâm tuăn, pôu râng hnoăng cheăng kring vế dêi tíu tơkăng kong hên tâ”.

Hơnăm kố cho hơnăm ki apoăng “Chôu hriâm a tíu tơkăng kong” Mô đô̆i gak tíu tơkăng kong a kong pơlê Dak Nông tơkŭm po a tâi tâng mâu đông gak tíu tơkăng kong a 7 to cheăm tíu tơkăng kong ối tung 4 tơring Čư Jut, Dak Mil, Dak Song ƀă Tuy Đức. Hdrối mê, ing hơnăm 2018, Đông gak tíu tơkăng kong Tuy Đức, tơring Tuy Đức cho đông ki apoăng dêi kong pơlê tơkŭm po tơdroăng kố, pơxá inâi chôu hriâm ki apoăng a tíu tơkăng koing. Vâ chê 7 hơnăm hdrối mê hía nah, đông ki kố hmâ po tơdroăng ki ai pơxúa kố. Thiê̆u tă Nguyễn Văn Nga, Kăn phŏ ngăn ‘na cheăng kal kí dêi Đông gak tíu tơkăng kong Tuy Đức tối ăm ‘nâi, kơnôm ing tơdroăng ki đông po hnê hriâm kố hiăng gum ăm kuăn pơlê, hok tro a tíu tơkăng kong châ hlê plĕng, ‘nâi klê tơ’nôm mâu tơdroăng ki luât hiăng pơkâ hnê drêng prôk lăm tíu tơkăng kong, hlê thăm ‘na hnoăng cheăng, túa pêi pro, tơdroăng cheăng dêi Mô đô̆i gak tíu tơkăng kong. Tơdrêng amê, vâ tơbêng, pro mơhno rơdâ hiâm tuăn mơno pâ Tơnêi têa, khíu pâ dêi pơlê pơla tung kuăn pơlê ƀă hok tro a kơpong tíu tơkăng kong.

“Xuân pói rơhêng vâ tơdroăng ki lân rơdâ tơdroăng mơjo pâ troh tíu tơkăng kong, hnoăng ki kring dêi Tơnêi têa ƀă mâu vâi muăn hok tro. Ngin xuân pói vâ pơtroh ăm mâu vâi o vâi muăn rêm rơxông, mâu vâi muăn hok tro ƀă kuăn pơlê, ôh ta xê to a tíu tơkăng kong mê a mâu cheăm, pơlê, tơring xuân tơdjuôm ivá kring vế, gak ngăn krá tơniăn troăng tíu tơkăng kong, tơneăn”.

Mâu chôu hriâm a tíu tơkăng kong cho păng ‘nâng, ai pơxúa ƀă gum hên tơdroăng ki tơtro khât châ lân rơdâ a mâu cheăm tíu tơkăng kong dêi kong pơlê Dak Nông. Ing mâu chôu hriâm ki hiăng châ hlê, châ plĕng mê hiăng gum ăm mâu vâi muăn hok tro thăm hlê plĕng hên mâu tơdroăng ki păng ‘nâng, tơdrêng amê, hnối tơbêng ihiâm mơno thăm khíu pâ, mơjo vâ dêi pơlê pơla, Tơnêi têa, pơtối tơ’nôm ivá ki rơkê plĕng vâ vâi muăn thăm rế kơdo mơ-eăm hriâm tâp vâ chiâng mâu kuăn pơlê ki ai pơxúa ăm pơlê pơla, tơnêi têa. Xuân ing mê, veăng gum mơjiâng tơdroăng ki kring vế, gak ngăn lâp luô kơpong tíu tơkăng kong dêi Tơnêi têa.