Tung kơbong hồi sức dêi Hngêi pơkeăng pơlât vâi hdrêng Gia Lai, nâ Trần Khánh Huyền (pơlê kong krâm Ayun Pa, Gia Lai) tơkôm kuăn kơnốu 10 khế riu klêi kơ’nâi pâ pơlât hoăng troăng krôk. Nâ Huyền tối ăm ‘nâi, sap ing kot mâ, kuăn hiăng trâm hên tơdroăng ki châi tamo xua pơreăng kố, môi tiah đi đo tro kơtâk têa tôu ro, êi tung tuăn, pro ivá ôh tá pá hro ƀă hrá kân. Mơhúa ‘nâi troh tơdroăng Pâ pơlât Rơkong tó, tâi tâng pơrá pâ pơlât tê kơtê ƀă pơlât khât ‘nâng:

‘’Tơdroăng to rah khăm, khu ƀok thái pơkeăng pơlât khât ‘nâng. Vâi hnê mơhno tâi tâng, ối tŏng kum tơ’nôm liăn têa kơxăng. Nôkố pâ pơlât, cho môi ngế nôu á hmiân tuăn tâ vâ kuăn á kô xông kân tiah mâu vâi hdrêng ki ê há; pơreăng êi tuăn mơni kô prêi lĕm tâng pơchông ƀă hdrối pâ pơlât’’.

A kơpong tơkôm, pâ kuăn ngoh Phùng Theo Sáng, hdroâng kuăn ngo Mông, ối a thôn Quảng Hòa, tơring Dak Glong, kong pơlê Dak Nông, xuân rơrêk tung hiâm mơno tơdroăng pâ pơlât hoăng rơkong. Ngoh Sáng tối ăm ‘nâi, kuăn ngoh 16 hơnăm ƀă plâ 16 hơnăm hiăng hluâ, ngoh đi đo pói vâ kuăn châ pâ pơlât, laga ôh tá ai ivá xua tơdroăng rêh ối pá puât. Ngoh pói tơngah klêi kơ’nâi pâ pơlât, kuăn ngoh kô chiâng tơpui tơno, ôu kâ tiah hmâ vâ loi tơngah tâ tung tơdroăng tơpui tơno.

‘’Tơdroăng kố cho lĕm ‘nâng xua loi tơngah ‘na khu ƀok thái pơkeăng pâ pơlât. Ngin troh a kố pói vâ cho tơdroăng pâ pơlât mâu kuăn kô chiâng ôu kâ, tơ’lêi tơpui tâ, vâ la ngiâ ah mâu muăn xo on veăng’’.

Kố cho roh má péa tơdroăng Pâ pơlât rơkong tó, môi tơdroăng ki lĕm xua Khu tơrŭm tơkŭm po Operation Smile Việt Nam tơrŭm ƀă Hngêi pơkeăng pơlât vâi hdrêng Gia Lai tơkŭm po a kong pơlê Gia Lai. Hơnăm nah, tơdroăng pơlât hiăng ai 104 muăn ối kŭn châ pâ pơlât lĕm. Tơdroăng kố hơnăm kố tơkŭm rah khăm pơlât ăm dâng 200 ngế vâi hdrêng ƀă tơkŭm pâ pơlât ăm dâng 100 ngế vâi hdrêng tro hoăng rơkong tá hâi châ pâ pơlât; tơdroăng ki hoăng sap ing pơxiâm kot mâ hoăng rơkong, tơliê, hoăng môh, hoăng a hơnĕng), ‘lối ‘răng kŏng, tơpá hơ‘răng (kŏng, chêng) a kong pơlê Gia Lai ƀă mâu kong pơlê ki achê.

Mâu ngế tro hoăng rơkong, tơliê, môh châ rah khăm, pơlât ƀă pâ pơlât tê kơtê, tơdrêng amê châ tŏng kum kơxô̆ liăn prôk lăm, kâ ối. Thak sih, Ƀok thái pơkeăng Bạch Minh Tiến, Kăn kơvâ Pâ pơlât pro lĕm châ chăn-ngiâ méa, Hngêi pơkeăng Hữu nghị Việt Nam – Cuba, kăn pơkuâ khu ƀok thái pơkeăng tối ăm ‘nâi:

‘’Ngin cho mâu ngế ƀok thái pơkeăng pâ pơlât, cho mâu ƀok thái pơkeăng pơlât vâi hdrêng ƀă mâu ngế ki pleăng hnoăng cheăng troh ing Hà Nội, pơlê kong kân Hồ Chí Minh, Nghệ An ƀă Huế rêm ngế pêi cheăng tá hiâm mơno, ngin xuân hiăng hbrâ ‘na pơkeăng, tơmeăm pơlât vâ tơniăn ăm mâu muăn châ pơlât lĕm tro má môi ƀă pói vâ djâ ăm mâu rơkong tó ăm vâi hdrêng’’.

‘Na peăng hngêi pơkeăng pơlât vâi hdrêng Gia Lai, jâ Từ Thị Mai Linh, Kăn phŏ pơkuâ Hngêi pơkeăng tối ăm ‘nâi, hngêi pơkeăng đi đo mơ-eăm pro tơ’lêi hlâu má môi, ăm tâi tâng mâu ngế pâ pơlât, rơpŏng hngêi mâu ngế pâ pơlât vâ roh pơlât rơkong tó roh kố châ tơƀrê tâi tâng:

‘’Kơxô̆ mâu vâi hdrêng troh hngêi pơkeăng cho kơdrâm, khu ngin xuân hiăng ai pơkâ pêi cheăng tá hiâm mơno, pêi kơmăng ƀă thăm tơrŭm pơla hngêi pơkeăng pơlât vâi hdrêng rơtế ƀă khu vâ pêi cheăng ăm tơtro tâ ƀă châ tŭm tâ’’.

Tơdroăng pêi pro tơdroăng djâ ki kơnâ lĕm trâu hơngế, mơhno tơdroăng ki tơmâng dêi pơlê pơla ƀă vâi hdrêng, vâi hdrêng hoăng rơkong, tơliê, môh ai tơdroăng rêh ối pá puât châ pâ pơlât dâi lĕm. Tơdroăng kố hiăng djâ ăm rơkong tó, tơdroăng loi tơngah ăm vâi hdrêng ôh tá mơhúa tro hoăng môh, rơkong, tơliê, vâ vâi o vêh tơdroăng rêh ối tiah hmâ, ai roh châ hriâm tâp, xah hêi ƀă xông kân môi tiah pú hmâ ki ê, kum mâu vâi o ai tơdroăng rêh ối lĕm tâ.

Tơdroăng Pâ pơlât Rơkong tó ôh tá xê to kum mâu vâi o ối kŭn chiâng prêi lĕm, tăng rơkong tó mê ối kum mâu ƀok thái pơkeăng a kong pơlê mơdêk tơdroăng pêi cheăng pâ pơlât, châ hriâm mâu kih thuât ki rơkê ing khu mâu ngế ƀok thái ki rơkê.