Tung pơla hdrối kố nah, tơdroăng rơlâm tơhnâp tơnêi, hmốu a Tây Nguyên pro tơ’nhê hên ó ‘na kuăn mơngế ƀă tơmeăm khoăng dêi kuăn pơlê. Ki xiâm pro hên tíu tơnêi chiâng rơlâm tơhnâp a mâu tíu tung pơla hdrối kố nah, malối a kơpong Tây Nguyên hiăng châ pôa Lê Công Thành, ngế pro xiâm phŏ hnê ngăn tơmeăm khoăng ƀă hyôh kong prâi têa tối nhên tung rôh hôp ƀă khu chêh hlá tơbeăng Chin phuh tiah hmâ hôp khế 7.

Tối nhên ki xiâm pro tơnêi tơhnah tơhnâp, pôa Lê Công Thành tối nhên, ƀă mâu hbêa ngo kŭn, ngo kân rơtế ƀă tơdroăng hơ’lêh tơnêi kong chiâng tơnêi pêt loăng plâi lơ xua ing gu tơnêi ăm tơbăng pro hngêi, pro troăng ƀă hên ki ê tơnêi tíu mê chiâng pơ’lêh, chiâng tơ’lêi pro ăm tơnêi tơhnâp troh drêng ai kong mêi kân.

Xiâm ki ăm ‘nâi tơnêi tơhnâp cho drêng kong mêi hên hâi, mêi kân; hlo rơheăng mơnât hngêi, hbêa ngo; a tơnêi tơbăng hlo tơbêt, tơnêi tơdro... Drêng hlo tiah mê, Kuăn pơlê thế séa ngăn mâu tơdroăng tối tơbleăng hdrối ăm ‘nâi drêng têa rơlêa, tơnêi tơhnâp, tơbleăng ăm mâu kăn ƀă mâu ngế ki ối rơtâ tá.  Mâu khu râ, kơvâ cheăng dêi cheăm tơring thế séa ngăn đi đo drêng hlo rĕng djâ kuăn pơlê lăm ối tíu ê, thế kring vế kuăn pơlê ki ahdrối.

Pôa Lê Công Thành, ngế pro xiâm phŏ hnê ngăn tơmeăm khoăng ƀă hyôh kong prâi têa tối tơbleăng hdrối, rơnó mêi khía mơhot têa lân lu, tơbleăng kong prâi mơni kô ối ôh tá tơniăn, kô pro hên tơdroăng xía vâ ôh tá ‘nâi hdrối. Ngế pro xiâm hnê ngăn Chin phuh xuân hiăng krếo phôn hnê mơhno nhên ăm mâu kong pơlê kơpong Tây Nguyên pơtối séa ngăn, tí tăng ngăn tơkâ luâ tơdroăng pá.