VOV4.Xơ Đăng - Kơxê lơ 30/5, Khu kăn ki pêi dêi hnoăng cheăng kơxô̆ 8 dêi Khu hnê mơhno cheăng Tơnêi têa ‘na hbrâ mơdât kâ kơluâ liăn ngân (Khu hnê mơhno cheăng) xua pôa Lê Minh Trí, Ngế cheăng tung tíu xiâm Đảng, Viê̆n trưởng Viê̆n seá ngăn arak luât kuăn pơlê, Ngế cheăng tung Khu hnê mơhno cheăng pro kăn xiâm pơkuâ djâ khu kăn kố hiăng ai rôh pêi cheăng ƀă Đảng ủy Kŏng an Tơnêi têa vâ tơbleăng Túa pơkâ kơxô̆ 18 dêi Khu hnê mơhno cheăng.

Tơbleăng Túa pơkâ, séa ngăn dêi Khu pêi hnoăng cheăng kơxô̆ 8 a Đảng ủy Kŏng an Tơnêi têa

Tơpui mơgêi rôh pêi cheăng, pôa Lê Minh Trí ăm ‘nâi, ki xiâm dêi rôh séa ngăn rôh kố cho vâ mơnhên tối ki xiâm, klêi kơ’nâi mâu tơdroăng ki hiăng pêi pro klêi, mâu tơdroăng ki tá hâi pêi pro klêi, xiâm kối chiâng ai tung tơdroăng pơkuâ, hnê mơhno ƀă tơkŭm pêi pro. Ing mê, châ hlo, pâ thế pơxâu phak mâu tơdroăng ki pro xôi ‘na kâ kơluâ liăn ngân, cheăng kâ, ki ôh tá chiâng pơkâ tơleăng lơ pơkâ tơleăng tiô pơkâ dêi Đảng ƀă luât dêi Tơnêi têa; pơkâ tơleăng lơ pâ thế pơkâ tơleăng kơtăng mâu ngế ki pro xôi luât, ví, ôh tá vâ tối mâu tơdroăng mơgêi séa mơnhên, mơnhên tối ki ôh tá ai hơlâ; pơkâ mơ’no mâu hnoăng cheăng, troăng hơlâ vâ mơdêk tơƀrê ƀă hnoăng cheăng châ hlo, hnê tối, tơdah xo, pơkâ tơleăng mâu tơdroăng ‘na mâu ngế pro xôi ƀă hnoăng cheăng séa mơnhên ngăn, pơkâ yă.

Katarina Nga tơplôu ƀă tơbleăng