Tung plâ 9 hơnăm hdrối nah, ngoh Nguyễn Văn Tiến, kăn ƀô̆ Ƀơrô cheăng Đảng ủy cheăm Ƀuôn Tría, tơring Lak, kong pơlê Dak Lak pơrá hbrâ rơnáu ‘no 10 rơpâu liăn vâ ‘măn tung “Khu râng liăn kơdĭng pêi tiô rơkong pôa Hồ hnê” dêi kơ koan. Ngoh tối: kơxô̆ liăn veăng tơlo ôh ti hên, túa pêi gá tơ’lêi la hiăng pro pơxúa tơƀrê khât.

“Á hlo tơdroăng Khu râng liăn kơdĭng pêi tiô rơkong Pôa hnê kố gá cho tơdroăng ki hlê plĕng khât, mê châ tâi tâng đảng viên tung tâi tâng Đảng ƀô̆ xuân môi tiah đoân viên a mâu thôn pơlê veăng kơhnâ khât. Môi tiah đảng viên hơnăm ối nếo rêm khế veăng tơlo 10 rơpâu liăn”.

Khu râng liăn kơdĭng pêi tiô rơkong pôa hnê cho tơdroăng tơ’noăng “Kơdĭng liăn pêi tiô rơkong pôa hnê” châ Khu pơkuâ ngăn Đảng tơring Lak pêi pro tung hên hơnăm vâ kum mâu ngế ki xơpá. Tiah mê, rêm ngế kăn ƀô̆, đảng viên, đoân viên, kong chưk, viên chưk, mâu ngế pêi cheăng tung lâp tơring hmâ 3 hâi kơdĭng iâ hlái 1 rơpâu liăn; đoân viên, hô̆i viên a mâu cheăm pơlê hmâ 10 hâi kơdĭng iâ hlái 1 rơpâu liăn.

Kơxô̆ liăn kố xua Khu hnê mơhnhôk Đảng pơkuâ ngăn. Jâ Đào Thị Thanh An, kăn phŏ pơkuâ ngăn Đảng tơring Lak ăm ‘nâi, ƀă túa pêi ki kố tung 9 hơnăm hdrối nah lâp tơring hiăng veăng tơlo châ vâ chê 3 rơtal liăn, kum lối hrĭng ngế ki xơpá cho rơpŏng ai hnoăng tơnêi têa, đảng viên, ngế ki ôh tá ai kơbố păn roăng, mâu ngế ki tro pơreăng ôh tá chiâng pơlât prêi.

“Ăm tơdroăng kố rế hía rế tơdjâk troh lâp lu ƀă pro pơxúa kơnía vâ mơhno ki hlê plĕng, veăng kum tơdjâk tơdroăng pâ nhuô̆m troh pơlê pơla xuân môi tiah rế hía rế veăng tŏng kum ƀă mâu ngế ki trâm xơpá troh ƀă mâu ngế ki xơpá khât, ngế ki ôh tá ai kơbố păn roăng, ngế ki tro pơreăng ôh tá kâi pơlât prêi vâ vâi ai ivá, ai tơdroăng ro tung rêh ối”.

Rơtế ƀă tơring Lak, túa pơkâ “Kơdĭng liăn pêi tiô rơkong pôa hnê” hiăng châ po rơdâ, pêi pro tơƀrê a hên tơring môi tiah: Čư̆ Mgar, Čư̆ Kuiñ, Krông Ana, Krông Bông, Krông Ƀuk, Krông Pač ƀă M’Drak dêi kong pơlê Dak Lak. Tung 2 hơnăm hdrối nah, túa pêi kố hiăng kơdĭng châ lối 10 rơtal liăn, ing mê kum bro 89 toăng hngêi ối, 2 to tíu ối tơdjuôm ăm mâu thái cô, hbru lối hrĭng hnoăng tơmeăm ăm mâu rơpŏng ai hnoăng tơnêi têa, ngế ki ai hnoăng ƀă kăch măng.

Ai mâu cheăm ki ‘nâ hiăng ai túa tơbleăng kơdĭng rơkê, mơhnhôk châ tơdroăng ki veăng dêi hên hĭn kăn ƀô̆, đảng viên ƀă kuăn pơlê. Ki tơƀrê cho mâu tơdroăng “Pêi pro kơdĭng kum đảng viên ai tơdroăng rêh ối xơpá” dêi khu pơkuâ ngăn Đảng Ƀuôn Ma Thuột; “Bro hngêi pơyâng ăm mâu hngêi trung hriâm” dêi Khu pơkuâ ngăn Đảng Čư̆ Mgar, “Hlá Mơ-éa Búa Liềm vàng” dêi khu pơkuâ ngăn Đảng pơlê kong krâm Ƀuôn Hồ ƀă hên ki ê.

Pôa Phạm Minh Tấn, kăn phŏ pơkuâ hnê ngăn Đảng kong pơlê Dak Lak mơnhên tối: Kố cho mâu tơdroăng cheăng pêi ki kal, pơxúa ƀă tơƀrê tung “pêi tiô rơkong pôa, pêi pro kơdĭng” sap ing tơring, cheăm.

 “Hriâm tâp ƀă tiô pêi pro tiô troăng tơdjâ hiâm mơno Hồ Chí Minh cho môi tung mâu tơdroăng cheăng ki pêi dêi đi đo. Ƀă khu pơkuâ ngăn Đảng hiăng hnê mơhno nhên khât sap ing chi ƀô̆ tơring cheăm sap ing rêm ngế đảng viên athế ‘mot tơdroăng ki hriâm tâp, pêi pro tiô hiâm mơno troăng tơdjâ dêi Pôa chiâng tơdroăng ki hmâ pêi ƀă ăm mâu tơdroăng trâm mâ hôp rêm khế, rêm hneăng vâ rêm ngế pơtối hlê plĕng nhên ƀă pêi pro tiah lâi ăm gá chiâng môi tơdroăng kố vâi mơhnŏng vâ xêh ƀă ai pơxúa khât, tá tơdroăng ki tơ’lêi lơ mâu tơdroăng ki kân kĭn, tung tơdroăng tŏng kum dêi rơpó rơtế xut tah hrâ mơnguâ kơtiê xơpá, mơjiâng thôn pơlê nếo, pêi klêi mâu hnoăng cheăng ki châ pơcháu”.

Ôh ti xê cho tơdroăng tơ’noăng, “Kơdĭng pêi tiô rơkong Pôa” hiăng chiâng môi tung mâu tơdroăng pêi ki đi đo châ rêm ngế kăn ƀô̆ đảng viên ƀă kuăn pơlê a Dak Lak pêi pro tiô túa ki mơhnŏng vâ xêh. Túa pêi tơ’lêi hlâu la ki kơnía ƀă tơdroăng ki tơdjâk gá kân khât, djâ troh tơdroăng ki hơniâp ro ăm hên ngế kơtiê sap ing mâu toăng hngêi ki lĕm, lơ tơdroăng ki tŏng kum teăm tơdrêng.Tơdroăng pêi kố hiăng mơdêk khôi hmâ “tŏng kum dêi rơpó” tơniăn lĕm dêi hdroâng mơngế, chi túa pêi ki pơxúa má môi vâ hriâm tâp ƀă pêi pro tiô troăng tơdjâ hiâm mơno Hồ Chí Minh.