Séa ngăn khât ‘na inâi hnoăng cheăng hơnăm 2023 dêi On tơhrik Việt Nam ‘na “Pêi pro kơdĭng – Hbrâ mơdât pro mơhrê liăn”, Kŏng ti on tơhrik Dak Lak hiăng tơkŭm pro tơdâng mâu tơdroăng cheăng, troăng hơlâ pơkâ tung 5 kơvâ cheăng ki kal, mê cho: pêi cheăng kâ; ‘no liăn mơjiâng; pơkuâ ngăn, xúa kế tơmeăm; pơkuâ ngăn; chiâ xo, xúa kong kế ƀă rak vế hyôh kong prâi; pơkuâ ngăn, xúa mâu ngế pêi cheăng ƀă hâi khế pei cheăng.

Tiah mê, kŏng ti hiăng tơbleăng nhên tơdroăng ki pơkuâ ngăn ƀă kơdroh ki mơhrê on tơhrik, mơdêk hnoăng cheăng séa ngăn mơgrúa lĕm biến áp, ‘mâi rơnêu troăng ki vê ngăn riân, trâ văng kĭng troăng mơ-eăm kơdroh tơdroăng ki mơhrê on tơhrik hơnăm 2023 chu ối 4,4%.

Tung hnoăng cheăng mơdró, troh nôkố, tâi tâng kuăn pơlê xúa on tơhrik a Dak Lak hiăng châ hơ’lêh kong tơ điê̆n tưh; tơdrêng amê hlối pro hơ’lêh kơxô̆, tơdrăng tơdroăng ki vê riân xúa on tơhrik rêm hâi, tơbleăng troăng hơlâ “môi tíu pêi cheăng” pơla kơvâ on tơhrik ƀă kơ koan pơkuâ ngăn tơnêi têa, kum kuăn pơlê tơ’lêi châ xúa mâu tơdroăng ki tơ’lêi ‘na on tơhrik.