VOV4.Xơ Đăng - Tơdjâk troh tơdroăng ki mâu tíu pêi cheăng pêi pro tơdroăng tơkêa pro troăng Trường Sơn Đông hmôu pơ ko ‘nhiê xêh kong péa Kơdrum kong ilâng Čư̆ Yang Sin, kong pơlê Dak Lak ƀă Bidoup – Núi Bà, kong pơlê Lâm Đồng, hâi lơ 16/5, Khu kăn ki pêi dêi hnoăng cheăng dêi Kuô̆k hô̆i ƀă mâu Khu xiâm kơvâ cheăng Tơnêi têa hing lăm séa ngăn, mơnhên tối ki ai khât a tơnêi tơníu a kong pơlê Lâm Đồng.

Khu kăn ki pêi dêi hnoăng cheăng dêi Kuô̆k hô̆i xua Thươ̆ng tươ̆ng Trần Quang Phương, kăn xiâm phŏ hnê ngăn Kuô̆k hô̆i pơkuâ djâ. Tung péa hâi lơ 16 ƀă lơ 17 khế 5, Khu kăn ki pêi dêi hnoăng cheăng hiăng lăm séa ngăn, mơnhên tối a tíu ki ai khât tơdroăng tơkêa pro troăng Trường Sơn Đông, ƀă ai rôh pêi cheăng ƀă Vi ƀan hnê ngăn kong pơlê Lâm Đồng.

Khu kăn pêi dêi hnoăng cheăng dêi Kuô̆k hô̆i ƀă mâu Khu xiâm kơvâ cheăng Tơnêi têa séa ngăn, mơnhên tối tơnêi tơníu ki pro troăng Trường Sơn Đông a kong pơlê Lâm Đồng

Hdrối mê, môi tiah Rơ’jiu Việt Nam hiăng tơbleăng, mơ’nui khế 1, apoăng khế 2 hơnăm 2022, mâu kơ koan ki ai tơdjâk péa kong pơlê Dak Lak ƀă Lâm Đồng châ ‘nâi mâu tíu pêi cheăng kố dế pro troăng Trường Sơn Đông hiăng hmôu pơ ko ‘nhiê xêh kong, gu bro tơbăng lối 10km tơkâ luâ 2 to kơdrum kong ilâng Čư̆ Yang Sin dêi Dak Lak ƀă Bidoup – Núi Bà dêi Lâm Đồng.

Apoăng mơnhên mâu tíu pêi cheăng ki pro troăng kố hiăng ko ‘nhiê kong drêng tá hâi châ tơdroăng ki hbru ăm hnoăng hơ’lêh xúa tơnêi kong, ai mâu tíu vâi gu lo a gong tơkăng tiô tơdroăng kơchuâ chêh dêi tơdroăng tơkêa. Rôh pêi pro tơdroăng kố hlo pro xôi luât kơtăng khât.

Katarina Nga tơplôu ƀă tơbleăng