Prếo vêh a Kơno tơkâ kroăng Srêpok- tíu ki á ƀă mâu vâi pú ki hiăng rêh ối tung plâ ton khế hơnăm pêi dêi hnoăng cheăng bro troăng, Đăi tă Lê Xuân Bá, cho Trung đoân trưởng Trung đoân 4 kong ƀinh, Sư đoân 470. Ƀinh đoân 12 hneăng hdrối ối ƀriê tung hiâm mơno. Têk nhăng tơbâ troh mâu vâi pú ki hiăng hlâ, pôa Bá mơhno tíu kơno tơkâ têa kroăng, tối: apoăng rơnó mơdrăng hơnăm 1973, đông dêi pôa châ pơcháu hnoăng cheăng bro kông pro troăng sap ing troăng 19 mot a peăng hdroh Tây Nguyên, rak vế troăng rơdâ troăng lăm ngi Ƀuôn Ma Thuột.

A tíu kố, pôa ƀă mâu vâi pú bro môi troăng ăm rơxế kom ƀa ƀă môi to kông ki đông ăm rơxế ô tô, pháu hnêa túa ki hngăm, ƀô̆ ƀinh tơkâ têa kroăng Srêpok. Tung rôh tơplâ ki xâu xía, tơdroăng ki po troăng kal rak tơniăn ƀă pơkí ƀă khŏm pêi pro kơtăng tiô pơkâ “lăm ôh tá hlo chêng, pế ôh tá hlo ngôi, tối ôh tá tâng idrâp”.

“Rơxế kom ƀa, rơxế thap yap mê ai môi to troăng prôk krê. Môi to troăng bro môi to klôh sap ing kơno kĭng ‘na kố cho kĭng peăng kơnhŏng, ‘na tá cho kĭng peăng hdroh. Ki rơdâ dêi kơno kố ai 6m, ki xŏn lăm ngi ‘na tá cho 200m. Gá cho môi thôt hmốu mê ăm rơxế xo hmốu ok mê ăm gá tơbăng vâ chiâng klôh ăm rơxế kom ƀa, rơxế thap yap lăm. Klêi kơ’nâi hiăng bro klêi mê lối hrĭng to rơxế kom ƀa, rơxế thap yap prôk tơkâ troăng ki kố”.

Tiô rơkong pôa Bá, kông ki tơdjêp kố ai inâi LPP châ pơklĕp sap ing mâu plong meăm ƀă dêi rơpó, ‘na ngiâ kông châ bro ƀă loăng. Kơdró kông châ bro sap ing mâu hmốu ki kân krâ ƀă dêi rơpó vâ pro troăng prôk. Kông ki kố klêi bro hiăng châ mâu ƀinh đoân ki xiâm, rơxế kom ƀa, rơxế ki kân prôk tơkâ troh a mâu kong pơlê peăng hdroh Đông Nam Bộ, kơ’nâi kố veăng tung rôh tơplâ Hồ Chí Minh hơnăm 1975.

Tung pơla bro kông, mơgăn kông tơdjêp a péa pâ kĭng têa kroăng Srêpok, khu xâ plâ rơ-iêo. Ƀă hiâm mơno tơplâ khên tơnôu, khŏm mơ-eăm rak vế kông, 57 ngế lêng dêi Trung đoân 4 kông ƀinh ƀă Tiểu đoân ƀô̆ ƀinh 21 ối tung Sư đoàn 470 hiăng hlâ a kơpong kơno têa kroăng. Đăi tă Đặng Đình Đường, cho Sư đoân trưởng Sư đoân 470 hneăng tối chôu vế, tung mâu khế hơnăm ki mê nah, hiâm mơno khŏm mơ-eăm vâ hla rêh ăm tơnêi têa” kum rêm ngế kăn ƀô̆, lêng tơkâ luâ mâu tơdroăng ki xơpá vâ pêi klêi hnoăng cheăng.

‘Nâi xâ plâ kơtăng ó môi tiah mê la vâi ‘nâi cho ôh tá tơplong troăng, ôh tá ăm rơxế vâ prôk lăm vâ ăm rơxế ƀă kuăn mơngế mot tung tíu tơplâ vâ plâ xâ. Tơdroăng ki kal cho ối a tíu ki mê, mê hlâ rêh tiah lâi xuân ôh tá khéa hơ’nêng, kơdroh tơdroăng ki lâi xo. Tâng tâi tâng mâu vâi pú, mâu lêng dêi ngin, tá 57 ngế lêng ối akố mê vâi xuân tơmiât tiah mê xo”.

Xuân a tíu kố, klêi kơ’nâi peăng Hdroh châ tơleăng lĕm, 14 ngế kăn ƀô̆, lêng ối tung Kŏng an kuăn pơlê kring vế Dak Lak (nôkố cho Mố đô̆i gâk tơkăng kong Dak lak) hiăng hlâ tung rôh tơplâ ƀă khu lêng Polpot vâ rak vế tâi tâng rêm xơtá tơnêi dêi Tơnêi têa.

Tơkâ luâ vâ chê 20 hơnăm, troh nôkố, tơdroăng ki hdró ‘na tơdroăng ton nah u ối cho kông bro ƀă loăng ki đông a tơnêi dâng 20cm. Sap ing hơnăm 2013, Kơno tơkâ têa kroăng Srêpok châ mơnhên cho Tíu tơbâ ton nah ki tơviah. Ing mê troh nôkố, tíu kố chiâng môi tíu ki xiâm tung tơdroăng ki hnê hriâm tơdroăng ton nah khôi hmâ kăch măng ăm mâu rơxông hơnăm ối nếo. A kĭng kơno tơkâ têa kroăng, hngêi ki meăn chôu vế mâu ngoh ki hlâ hiăng mơjiâng ƀă pơcháu ăm Đông mố đi gâk tơkăng kong Srêpok rak ngăn.

Troăng prôk sap ing kơno tơkâ luâ têa kroăng troh a troăng kân 14C xuân châ tôh chhá kơxu krúa lĕm, tơ’lêi ăm tơdroăng ki prôk lăm dêi rêm ngế vâ troh pôu. Vâ pro tơnêi tơníu tung plâ tíu tơbâ, mâu kăn ƀô̆, lêng Đông mố đô̆i gâk tơkăng kong Srêpok hiăng bro 2 to kế tơmeăm droh rơtăm, pêt mâu loăng plâi kâ môi tiah plâi mit, krui ngeăm. Tơdroăng ki gô̆m văng ‘mêng rơnêu plông hngêi meăn um tơbâ xuân châ mâu kăn ƀô̆, lêng đông mố đô̆i gâk tơkăng kong pêi pro đi đo.

Thiê̆u tă Phạm Văn Hiếu, ngế pơkuâ ngăn Đảng ủy, Chính trị viên Đông mố đô̆i gâk tơkăng kong Srêpok, Mố đô̆i gâk tơkăng kong kong pơlê Dak Lak ăm ‘nâi:

“Cho đông ki pơkuâ ngăn tíu tơkăng kong, tung mê ai kơpong xối tơbâ ki tơviah kố mê kăn ƀô̆ lêng đi đo chôu vế hnoăng cheăng mâu rơxông pâ pôa, ngoh nâ, malối cho mâu ngế ki hlâ rêh, mâu lêng ki hiăng hlâ vâ tơplâ ƀă rak vế hnoăng pơkuâ tơdroăng tơniăn krê dêi hdroâng mơngế. Cho rơxông ki prôk kơ’nâi ƀă rơxông ki pơtối cho kăn ƀô̆, lêng ngin đi đo hlê plĕng tŭm tơdroăng ki hâk tơngăm ƀă pôu râng dêi hnoăng cheăng, pơtối hriâm ƀối túa ki lĕm tro ƀă tơdroăng ki rơkê plĕng, ivá cheăng vâ pơtối dêi mâu pâ pôa vâ rak vế krá rơdêi hnoăng pơkuâ gâk kring tíu tơkăng kong dêi tơnêi têa tung tơdroăng nếo”.

Rôh tơplâ hiăng tơkâ luâ, la mâu tơdroăng ki khên tơnôu ôh tá kâi piu xuân ối a kơno tíu tơkâ têa kroăng Srêpok cho mâu tơdroăng ki knía git, cho tơdroăng ki khên tơnôu ‘na rôh tơplâ khŏm mơ-eăm, ôh tá kâi piu dêi kuăn pơlê pin. Mê cho tơdroăng ki vê hdró hnê pơchân rêm ngế kuăn pơlê pin ‘na mâu hnoăng ki pleăng, hlâ rêh khên tơnôu dêi mâu rơxông pâ pôa hiăng hlâ ăm hnoăng cheăng tơleăng lĕm hdroâng mơngế, bro tơnêi têa tơrŭm chiâng môi.