Môi hâi mơ’nui khế 9, ô tô pơto ngin tiô troăng séa ngăn tơkăng kong lăm a tíu gâk pêi cheăng pơkuâ, gâk kring kơxô̆ 1 dêi đông Mô đô̆i gâk tơkăng kong Ia Mơ. Prôk a troăng péa pâ to ngo ngối kong kế, tơngôu ngăn mơngiơk ngiât loăng kong hlo a ngiâ, mê á piu lôi rơkong tơbleăng dêi ngế cheăng kal kí Nguyễn Đức Hùng ‘na tíu gâk pêi cheăng châ tối cho 3 ôh tá ai: Ôh tá ai hyôh phôn, ôh tá ai têa ô hum rôh jiếo, ôh tá ai on tơhrik.

Tơdah ngin cho mâu kăn ƀô̆, mâu mô đô̆i gâk vâ chê 1 măng tĭng. Ngiâ méa kơbố xuân prăng, châ chăn ‘răng môi tiah loăng ối tung dế ngo ngối kong kế Tây Nguyên. Trung tă Rơ Lan Khúi, Kăn pơkuâ ‘na mơ-éa – liăn ngân đông Mô đô̆i gâk tơkăng kong Ia Mơ tối, tíu tơkăng kong rơnó kố, nhŏng o mô đô̆i gâk tơkăng kong ối ai têa ôu hum roh jiếo, troh rơnó khăng khoăng, kong tô khăng khoăng ó pro rêm ngế drêng lâi xuân lo têa kơxôu. Trung tă Rơ Lan Khúi tối:

‘’A kố gâk pêi cheăng trâm hên pá puât, on tơhrik ôh tá ai, têa rơnó mêi hum têa kroăng, têa plông. Rơnó khăng mê ôh tá ai ki klâi ôh. Vâ krếo phôn ăm kơdrâi kuăn ‘nĕng, pêi cheăng ƀă đông thế kơtâu a pái hơlâ troăng a km kơxô̆ 0 vâ krếo. Mê nhŏng mơ-eăm pá, hnoăng cheăng Đảng ƀă Tơnêi têa pơcháu mê nhŏng xuân mơnhên troăng tơmiât hmiân tuăn pêi cheăng’’.

Ƀă kăn ƀô̆, mô đô̆i a tíu gâk pêi cheăng, têa ôu git tâ mêa. Vâi hdoăng rêm kơto têa mêi a kuâ hngêi tôl vâ xúa pế pơchên tơmeăm rêm hâi. Ôh tá ai têa, on tơhrik ôh tá bê tŭm. Tâi tâng kơnôm to a kơmăi mơ’no on tơhrik bu bê a kơmăng tê, ai drêng thế xúa on tiê. Kơtăn kố ôh tá ton, tíu gâk châ krâ pro on tơhrik kơtâu ƀă mâ hâi laga dế rơnêu dâng 2 khế kố.

‘’Kâ tung hơkôp, koi tung kong’’ tơbrêi tơbrêh môi tiah mê, laga mâu kăn ƀô̆ mô đô̆i gâk tơkăng kong Ia Mơ đi đo mơhnhôk dêi pó tiah kố: ‘’tung troăng prôk dêi mơngế lêng ôh tá ai pá puât mê bu ai hiâm mơno tơkâ hluâ tâi tâng’’. Rêm hâi, klêi kơ’nâi mơgêi hnoăng cheăng séa ngăn tơkăng kong, ngế lêng kơlŏng ngiât pơtối vêh tíu gâk pêi cheăng vâ pêt mơjiâng tơmeăm, rak ngăn dêi kơdrum pêt kơchâi drêh dêi tơná. Thiê̆u tă Trần Văn Hạnh, đông mô đô̆i gâk tơkăng kong Ia Mơ tối:

“Mơdêk pêt mơjiâng tơmeăm a kố cho pêt kơchâi drêh rơnó mêi. Rơnó tô ôh tá chiâng pêt klâi ôh. Păn í, păn ká, păn pu pái dêi đông, á rak ngăn. ‘Na ôu kâ tiô pơkâ xuân tơniăn’’.

Tung dế ngo ngối kong kế ôh tá xê to ai chêm kơtốu, oâ tri trôu kơtốu đi đo mê ối tâng kơtốu dêi khu í, mơngiơk ngiât dêi kơdrum pêt kơchâi klŏng hối, plâi hung. Đông lêng ối păn khu pu pái lối 20 to vâ ai kơchâi kâ rêm hâi dêi mô đô̆i. Thươ̆ng tă Nguyễn Đức Hùng, Cheăng kal kí Đông mô đô̆i gâk tơkăng kong Ia Mơ tối ăm ‘nâi, Đông mô đô̆i gâk tơkăng kong Ia Mơ pơkuâ, gâk ngăn 12,6 km troăng tơkăng kong tơkăng ƀă kong têa Kul. Kơpong tơkăng kong xua đông pơkuâ tá hâi châ tâp tơneăn xua mê hnoăng gâk kring pơkuâ tơnêi tơníu cho pá puât ƀă tơvâ tơvân.

Laga ƀă tơdroăng gâk kring hnoăng pơkuâ tơnêi têa krih tơviah, ôh tá lôi mơngế pa kong châ mot, kăn ƀô̆ mô đô̆i đông gâk tơkăng kong Ia Mơ đi đo mơnhên troăng tơmiât, krá tơniăn, tơkâ hluâ pá puât vâ pêi kêi đeăng lĕm hnoăng cheăng châ pơcháu. Thươ̆ng tă Nguyễn Đức Hùng tối rơdêi:

“Tơdroăng rêh ối a kố ối hên pá puât, laga 100% ôh tá ai kơbố lôi pêi hnoăng cheăng châ pơcháu a mâu tíu gâk tơkăng kong. Đảng ủy, Khu pơkuâ đông đi đo mơhnhôk, ƀă xing xoăng kăn ƀô̆ ối a mâu tíu pá puât, ôh tá ăm ngế ki lâi ối lối ton’’.

Hluâ to lâi rơnó tô xuân môi tiah rơnó mêi, kơpong tơkăng kong Ia Mơ đi đo ai mâu ngế lêng gâk tơkăng kong gak ngăn – vâi môi tiah tơneăn ki gâk kring ăm tơdroăng tơniăn tíu mot lo dêi Tơnêi têa.