Klăng leh tơbâ 78 hơnăm Hâi Kăch măng khế Tơheăm châ ƀlê trâng ƀă Hâi mơjiâng tơnêi têa lơ 2/9, a tơring tơkăng kong Ngọc Hồi, Khu pơkuâ Droh rơtăm Việt nam kong pơlê Kon Tum tơrŭm ƀă Khu hnê mơhno má môi Khu pleăng hnoăng cheăng pêi tơdroăng lĕm Tơnêi têa kơpong Tây Nguyên tơkŭm po Tơdroăng pêi pro “Á nhuô̆m tơnêi têa á’’ hơnăm 2023.

Tơdroăng pêi pro troh lâp lu hiâm mơno djâ troăng ahdrối xua pơlê pơla ƀă troh lâp pơtâng hnê tối ‘na tuăn pâ pơlê xiâm, tơnêi têa dêi rơxông ối nếo. Tơdroăng pêi pro ‘’Á nhuô̆m Tơnêi têa á’’ hơnăm 2023 tơkŭm po hên tơdroăng ki kơnâ ƀă veăng amê ai lối 400 đoân viên, droh rơtăm lo ing 6 kong pơlê: Dak Lak, Gia Lai, Dak Nông, Lâm Đồng, Phan Thiết ƀă Kon Tum.

A pơlê Đăk Mế, cheăm Pờ Y, tơring Ngọc Hồi, rơtế ƀă tơkŭm po tơdroăng khôi túa lĕm tro, hơdruê xuăng, trâm mâ ƀă kuăn pơlê hdroâng kuăn ngo Brâu, mâu tíu cheăng hiăng diâp 100 kơxuô tơmeăm ăm rơpŏng kơtiê; diâp 250 kơxuô tơmeăm mê cho kơtong ƀalô, kơxop mơ-éa, tơmeăm xúa hriâm tâp tŏng kum mâu vâi o hok tro hbrâ mot hơnăm hriâm nếo ƀă tâi tâng kơnâ mâu kơxuô tơmeăm 114 rơtuh liăn.

Roh kố, Khu hnê mơhno má môi Khu pleăng hnoăng cheăng pêi tơdroăng lĕm Tơnêi têa kơpong Tây Nguyên diâp 400 xiâm hdrê loăng măc-ca ăm rơpŏng kơtiê hdroâng kuăn ngo ƀă kum vâ mâu rơpŏng thăm pêi mơjiâng tơmeăm khoăng, chôa ‘lâng mơ-eăm hluăn ing kơtiê.