Cho môi tung mâu đảng viên châ xo phĭu kơdĭng liăn, pôa Trần Thanh Tâm, Chi ƀô̆ bêng Bình Tân, pơlê kong krâm Ƀuôn Hồ tối ăm ‘nâi: kơtăn kố 6 hơnăm, pôa tro rong xua tơklâm rơxế, 2 hơnăm apoăng ối môi tíu ôh tá chiâng prôk ulâi. Troh drêng hiăng chiâng prôk la châ ôh pá hro, hâi teăm mo lĕm, tŭm tơdroăng ki kố ki mê kơnôm to kơdrâi, kuăn.

Tơdroăng mơhnhôk, veăng kum ing tơmeăm troh hơlêm tuăn ngôa dêi mâu vâi pú tung chi ƀô̆ ƀă vâi krâ nhŏng o tung pơlê cho tơdroăng veăng mơhnhôk kân kum ăm má kơdrâi ai tơ’nôm ivá ai tuăn mơ-eăm tơplâ ƀă pơreăng, tơkâ luâ tŭm tơdroăng pá puât tung rêh ối:

“Drêng trâm xía vâ troh nôkố xuân châ mâu kăn cheăm tơmâng tŏng kum, ’nâ hía veăng mơhnhôk mơ-eăm tơkâ luâ xơpá châi tamo, pin mơngế hiăng pá kâi hro, ôh tá chiâng pêi ki klâi bú kơnôm to a kơdrâi kuăn’’.

Xuân hiăng tro xía vâ tơklâm rơxế ƀă châ xo Phĭu kơdĭng liăn Búa Liềm Vàng, đảng viên Y Mơi Ktla, chi ƀô̆ ƀuôn Dlung 1B, bêng Thống Nhất, pơlê kong krâm Ƀuôn Hồ ăm ‘nâi, rơpŏng hngêi pôa cho rơpŏng kơtiê, bú ai 4 sào tơnêi chiâk. Xo kơxô̆ liăn kơjo kum 5 rơtuh liăn, rơpŏng hngêi pôa hiăng ‘no rak ngăn loăng plâi tơngah loăng plâi dâi lĕm châ xo hên mơnhông tơdroăng rêh ối ăm rơpŏng hngêi:

“Mơnê peăng Đảng ủy bêng veăng kum kơxô̆ liăn ‘măn kơdĭng vâ tơ’nôm a kơxô̆ liăn pê lo ăm rơpŏng hngêi. Phĭu kơdĭng liăn mê ai xiâm ing kơxô̆  liăn  vâ rôe phon rơvât loăng kơphế ƀă rôe hdrê loăng plâi ƀă rôe pơkeăng pơlât ăm tơná’’.

Môi tiah mê, ƀă kơxô̆ liăn ‘măn kơdĭng châ kơjo kum, đảng viên H’Môi Ƀuôn Yă, chi ƀô̆ ƀuôn Dlung 1A, bêng Thống Nhất hiăng kơdĭng  veăng tơ’nôm vâ rôe môi to hdrê ro vâ păn:

“Pơla hdrối kố nah a châ xo Phĭu kơdĭng liăn ‘măn kơdĭng Búa Liềm Vàng, mơhé kơxô̆ liăn mê tá ai hên la á tâ hiăng ro tung hiâm mơno, kum a ai iâ liăn vâ kum dêi on cheăng drêng pá puât mê’’.

Tơdroăng ‘’Phĭu kơdĭng liăn Búa Liềm Vàng’’ châ khu kăn pơkuâ hnê ngăn Đảng pơlê kong krâm Buôn Hồ tơbleăng tơlo liăn ‘măn kơdĭng sap ing khế 3 hơnăm 2023. Ing mê, rêm kăn ƀô̆, đảng viên tung lâp pơlê kong krâm pêi pro tơdroăng kơdĭng liăn ƀă hên tơdroăng môi tiah xo iâ liăn khế, xo pêi mâu tơdroăng cheăng mơjiâng tơmeăm khoăng, ‘na tơdroăng cheăng pro pơxúa cheăng kâ vâ mơjiâng chiâng kơxô̆ liăn ‘măn kơdĭng.

Ing tơdroăng pơkâ rêm hơnăm rêm ngế đảng viên a chi ƀô̆  ‘măn kơdĭng châ môi troh pái “Phĭu kơdĭng liăn Búa Liềm Vàng’’. Rêm chi ƀô̆ a cheăm bêng ‘măn kơdĭng châ môi iâ tung ’’Phĭu kơdĭng liăn Búa Liềm Vàng”.

Klêi 6 khế mơhnhôk, pơlê kong krâm hiăng mơhnhôk kơdĭng châ 400 rơtuh liăn, pro 73  Phĭu kơdĭng liăn, kơnâ rêm phĭu mê châ 5 rơtuh liăn, ăm kơ mâu đảng viên ki kơtiê xơpá tung pơlê kong krâm.

Jâ Nguyễn Thị Thu Nguyệt, Kăn pơkuâ hnê ngăn Đảng pơlê kong krâm Ƀuôn Hồ ăm ‘nâi, tơdroăng mơhnhôk tơlo liăn ‘măn a “Phĭu kơdĭng liăn Búa Liềm Vàng” cho môi tơdroăng pêi pro ôh tá xê nếo nôkố la túa pêi cheăng hiăng pơ’lêh  pro pơxúa tơƀrê hên. Kố cho tơdroăng pêi pro ai pơxúa, mơhno hnoăng cheăng, tơdroăng cheăng pêi ki nhên ăm tơrêm ngế kăn ƀô̆ đảng viên ƀă tơrêm khu tơrŭm cheăng Đảng tung tơdroăng hriâm ƀă pêi pro tiô Pôa Tơdroăng mơjiâng, diâp ăm “Phĭu kơdĭng liăn Búa liềm Vàng” ối  veăng ‘no hnoăng mơjiâng môi khu kăn ƀô̆ ki pêi pro troăng lĕm ahdrối ‘na hiâm mơno lĕm, tơdroăng rêh ối tro, hmâ kơhnâ khât ƀă khu tơrŭm cheăng Đảng:

“Tơkéa vâ tối apoăng kơxô̆ liăn mê hâi teăm hên la gá hiăng pro xiâm mơhno tơbleăng troh lâp lu tung khu tơrŭm cheăng Đảng tung tâi tâng pơlê kong krâm ăm malối cho pro xiâm ki kân ing mâu kăn ƀô̆ đảng viên a tơrêm pơlê cheăm bêng. Ki kal má môi tâ, môi tơdroăng ki pơxúa ‘na kal kí dêi Đảng mê cho ing tơdroăng diâp Phĭu kơdĭng liăn vâ hmâ ƀă hnoăng cheăng pêi ƀă ki thế hlê plĕng dêi đảng viên ƀă tơdroăng veăng pêi veăng tơkŭm hôp tơrŭm dêi khu Đảng a pơlê cheăm, bêng. Malối a chi ƀô̆ dêi pơlê cheăm tơná vâ mơdêk ki tơƀrê tung tơrŭm cheăng dêi chi ƀô̆ nôkố’’.

Tơdroăng “Phĭu kơdĭng liăn Búa Liềm Vàng” dế pro pơxúa khât, mơhno ki lĕm khât, châ đảng viên ƀă mâu kuăn pơlê a pơlê kong krâm Buôn Hồ, kong pơlê Dak Lak, khĕn kơdeăn khât, pro xiâm ki vâ mơhnhôk pêi pro troh lâp lu.