Kơtăn kố vâ chê 50 hơnăm hdrối, lối rơpâu ngế droh rơtăm hiăng pơ’lâng dêi Pơlê kong xiâm Hà Nội mot a Tây Nguyên po pông tơnêi tiô idrâp krếo thế lăm mơjiâng kơpong pêi cheăng kâ nếo. Mâu kế tơmeăm ki vâi djâ ôh ti ai klâi pa kĭng ivá hơnăm ối nếo mê ối cho túa, hiâm mơno dêi pơlê xiâm vâ mơjiâng chiâng môi tơring mơnhông mơdêk. Vâi djâ tơdế tá mâu inâi ki hmâ khĕn môi tiah Mê Linh, Gia Lâm, Từ Liêm, Đông Anh ƀă hên inâi ki ê. Vâ pơkâ inâi ăm mâu pơlê, cheăm a pơlê cheăm ki nếo. Cheăm Liên Hà, tơring Lâm Hà nôkố cho inâi dêi môi to cheăm a tơring Đan Phượng, pơlê kong kân Hà Nội.

Jâ Nguyễn Thị Bích Hạnh tiô dêi rơpŏng mot ối a Lâm Đồng sap ing tơxĭn, nôkố cho kăn hnê ngăn vâi kơdrâi cheăm Liên Hà ăm ‘nâi, lâp cheăm ai lối 2 rơpâu rơpŏng kuăn pơlê ƀă dâng 9 rơpâu pơ’leăng mâ mơngế. Vâi krâ nhŏng o đi đo mơhno hiâm mơno tơrŭm tung pêi cheăng kâ.

“Ƀă Liên Hà mê hiâm mơno tơrŭm dêi mâu vâi nâ o tung tơdroăng pêi pro thôn pơlê nếo hiăng châ mơdêk. Mâu nâ o hiăng mơjiâng mâu khu pêi cheăng tơrŭm pêt loăng yâu păn hdrong a kơpong hdroâng kuăn ngo. Mâu vâi nâ o mơngế Čil K’Ho hiăng kơhnâ pêt loăng yâu, châ tŏng kum ăm mung liăn dêi Tíu xiâm ngăn pêi chiâk vâ roê kế ki păn hdrong, ‘no liăn pêi cheăng rak ngăn loăng yâu ƀă roê hdrê yâu ki nếo. Ing mê, tơdroăng rêh ối dêi mâu vâi nâ o hiăng châ mơdêk khât, xua hiăng pêi lo liăn rêm hâi vâ xúa tung tơdroăng rêh ối”.

Troh nôkố, pêi lo châ liăn rêm ngế a tơring Lâm Hà, kong pơlê Lâm Đồng châ lối 52 rơtuh liăn, tâk 2 hdroh tơdế tâng pơchông ƀă 10 hơnăm hdrối; kơxô̆ rơpŏng kơtiê xuân hiăng kơdroh hên bu ối 1,58%; tâi tâng mâu cheăm châ mơnhên hiăng pêi klêi thôn pơlê nếo; cho tơring ki má 5 dêi kong pơlê Lâm Đồng châ Ngế pro xiâm hnê ngăn Chin phuh mơnhên cho tơring pêi klêi thôn pơlê nếo pơla hơnăm 2016 – 2020; ƀă hâk tơngăm châ Kăn xiâm hnê ngăn tơnêi têa diâp Me dái pêi cheăng ối má Pái.

Cheăng kâ rêh ối pơlê pơla mơnhông, tơdroăng rêh ối mơhno túa lĕm tro dêi mâu kuăn pơlê mâu hdroâng kuăn ngo a tơring Lâm Hà – kơpong tíu pêi cheăng nếo dêi mơngế Hà Nội a Lâm Đồng xuân hiăng châ mơdêk. Pôa K’Thế - Kăn phŏ pơkuâ Tíu xiâm Mơhno túa lĕm tro, tơ’noăng ivá tơring Lâm Hà ăm ‘nâi, tung mâu tơdroăng cheăng ‘na mơhno túa lĕm tro, malối cho mâu tơdroăng cheăng ki kân a tơring, đi đo mơhno ‘na khôi túa lĕm tro dêi mơngế Hà Nội ƀă kuăn pơlê hdroâng kuăn ngo akố.

“Inâi “Lâm – Hà” cho tơdjêp dêi Lâm Đồng ƀă Hà Nội, mê tơdroăng tơrŭm dêi mâu hdroâng kuăn ngo tung tơring gá lĕm tro khât, xuân kơnôm ing mâu troăng hơlâ tŏng kum dêi Đảng ƀă Tơnêi têa. Ôh ti xê  to kuăn pơlê mâu hdroâng kuăn ngo mê Đảng, Tơnêi têa rơhêng vâ rak vế mâu tơdroăng ki lĕm ‘na khôi hmâ môi tiah chêng koăng, rak vế mâu tơdrá hơdruê.

Rơhêng vâ Đảng, tơnêi têa tơmâng ngăn, tŏng kum rak vế mơhno túa lĕm tro hdroâng kuăn ngo. Vâ xo ah hmôi tơdroăng cheăng kâ kô mơnhông tâ, kô xúa hên tâ mâu tơdroăng ki hlê plĕng dêi kih thuât tung pêi cheăng kâ. Tung tơdroăng rak vế mơhno túa lĕm tro mê ngin tơngah kô ‘mot tung tơdroăng ki hnê a mâu lâm ‘na chêng koăng, hdruê tơdrá ton nah.

Rế veăng kum mâu vâi o hlê plĕng ‘na mơhno túa lĕm tro hdroâng kuăn ngo rế kum rak vế ki kơnía khôi hmâ dêi hdroâng kuăn ngo tơná ăm rơxông kơ’nâi”.

Pôa Trần Văn Hiệp, Kăn hnê ngăn Vi ƀan kong pơlê Lâm Đồng mơnhên tối khât mâu tơdroăng pêi pro ki tơƀrê ki kal ki tơring Lâm Hà hiăng mơ-eăm pêi klêi tung pơla hdrối nah, tơdrêng amê hlối tối rơdêi tơdroăng mơjiâng thôn pơlê nếo hiăng chiâng tơdroăng mơnhông mơdêk rơdêi, pêi pro tung lâp lu tung kong pơlê, châ tá khu pơkuâ tơdroăng kal kí ƀă kuăn pơlê kơhnâ veăng. Lâp kong pơlê hiăng ai 107/111 to cheăm pêi klêi thôn pơlê nếo, 2 to pơlê kong kơdrâm hiăng pêi klêi hnoăng cheăng mơjiâng thôn pơlê nếo ƀă 5 to tơring châ mơnhên pêi klêi thôn pơlê nếo.

Pôa Trần Xuân Hiệp, tối:

“Vâ pơtối mơdêk mâu tơdroăng ki hiăng pêi pro klêi, ngin pơkâ thế tung la ngiâ, tơring Lâm Hà mơdêk rơdêi troăng hơlâ pêi chiâk deăng, hơ’lêh nếo túa mơdêk, mơjiâng bro mâu kơpong pêt kế tơmeăm tơkŭm pêi pro châ tiô tơdroăng púi vâ dêi kong pơlê, mơhnhôk veăng tơlo liăn ăm mâu khu ki ‘no liăn mơnhông mơdêk cheăng kâ rêh ối pơlê pơla. Rak vế tơniăn hnoăng cheăng kơdroh kơtiê krá ton, rak vế tơdroăng tŏng kum rêh ối pơlê pơla.

Pơtối mơdêk khôi hmâ tơrŭm, veăng kum hên tâ nếo, pêi pro pơxúa tâ nếo tung tơdroăng mơnhông mơdêk tơdjuôm dêi kong pơlê Lâm Đồng”.