Tơring Ia Pa, kong pơlê Gia Lai châ mơjiâng hơnăm 2002 ai 9 to cheăm. Tung mê, ai 7 to cheăm kơtiê xơpá. La ƀă tơdroăng môi tuăn dêi rơpó tung kuăn pơlê, môi tuăn pơla khu râ kăn cheăng kal kí, veăng ‘no ivá mơno dêi khu râ kuăn pơlê, troh nôkố, ngiâ méa tơring Ia Pa hiăng pơ’lêh, hiăng ai 2 to cheăm Ia Mrơn ƀă Ia Tuk châ mơnhên tối thôn pơlê nếo. Pê lo liăn rêm ngế rêm hơnăm lối 40 rơtuh liăn. Ngoh  R’ô Hôk, ối a  Plei Marin 3, cheăm  Ia Mrơn,  tơring  Ia Pa  ăm ‘nâi:

“Plêi Marin 3, cheăm Ia Mrơn, tơring Ia Pa ki hên to kuăn ng Jarai. Hdrối nah, tơdroăng rêh ối dêi kuăn pơlê hrâ mơnguâ kơklêa đi đo xua ôh tá hlê tung pêi chiâk, pêi cheăng tiô túa ton nah, troăng prôk pá puât. Tơdrêng ƀă tơdroăng mơ-eăm kơhnâ pêi chiâk pêi cheăng ƀă hlối ai Đảng, Tơnêi têa veăng tơmâng tŏng kum, pơlê Plei Marin 3 hiăng pơ’lêh hên, troăng prôk lăm hiăng lĕm tơ’lêi hlâu, hngêi tơkŭm hôp kuăn pơlê, plông xah hêi, hngêi trung mơjiâng pro lĕm. Kuăn pơlê hiăng ‘nâi xúa khoa hok kih thuât vâ rak ngăn loăng plâi, mơnăn păn, ‘nâi pêt báu klâng. Kơnôm ing mê, troh nôkố, pơlê Plei Marin 3 hiăng hên rơpŏng châ hluăn kơtiê, tơdroăng rêh ối dêi kuăn pơlê châ mơnhông tơƀrê tâ hdrối nah, hiăng hlo mâu hngêi mơjiâng mơjiâng pro lĕm, mơhno ki hiăng pơ’lêh rêm hâi a pơlê’’.

*** Tung mâu hơnăm hdrối nah, a mâu tơring: Tu Mrông, Đăk Tô, Đăk Hà, Kon Plông, Kon Braih dêi kong pơlê Kon Tum hlo ai hên mâu đoân viên, droh rơtăm mơngế Rơteăng pêi cheăng kâ rơkê ƀă mơjiâng tơdroăng rêh ối rơpŏng hngêi phâi hơtô, hơniâp ro. Ki xiâm cho mâu túa pơkâ Tôh tơrŭm, Khu pêi cheăng tơrŭm pêt, uâ pơliê mơdiê pro pơkeăng; Khu ki tŏn chêng tơgôu koăng, kơhnhon xuăng ƀă hên ki ê dêi đoân viên, droh rơtăm a mâu tơring Tu Mrông ƀă Kon Plông. Rơtế ƀă kơvâ pêi chiâk deăng, hên đoân viên, droh rơtăm ối djâ troăng ahdrối tung tơdroăng ki lăm pêi cheăng a kong têa ê, pơtối tơmâng xo hriâm ƀối khoa hok kih thuât xúa tung pêi chiâk deăng ƀă hên ki ê.

Nâ Y Za Nhi, 28 hơnăm, thôn Mô Bành 1, cheăm Đăk Na, tơring Tu Mrông tối tiah kố:

“Athế mơnhên pro ti lâi vâ pin ai tơdroăng rêh ối tơniăn, cheăng kâ mơnhông, malối cho mâu rơxông hơnăm ối nếo hâi kố rế hía rế athế kơhnâ hriâm tâp, kơhnâ pêi chiâk vâ mơnhông cheăng kâ rơpŏng hngêi. Rơxông ối nếo pin pôi tá tơkôm to tung tơdroăng ki tŏng kum mê athế mơ-eăm tơkâ luâ, pơloăng mơnúa, pôi tá klâi khéa, mê tơdroăng rêh ối pin ôh tá kâi xông tơtêk. Á ai rơkong pơchân tối troh mâu vâi pú hơnăm ối nếo athế ‘nâi tơmiât, athế hriâm pât dêi tơná, chiu pá pêi mâu tơdroăng cheăng ki ai pơxúa ăm rơpŏng hngêi, ăm dêi tơná, mơ-eăm ‘nôi mê tơngah pin kô ai tơdroăng reh ối chía niân môi tiah mâu ngế ki ê há”.