Ngoh Y Sim Kƀuôr ối a cheăm Hoà Xuân, pơlê kong kơdrâm Ƀuôn Ma Thuột, ngế pêi cheăng dêi Kŏng ti veăng tơlo liăn pro meăm Thĕp ASEAN tung khu kơmăi kơmok Hòa Phú sap hơnăm 2020. A tíu pêi cheăng ai chi ƀô̆ Đảng, ngoh hiăng mơ-eăm kơhnâ khât vâ châ mot Đảng ƀă klêi mê châ mot chiâng mơngế đảng viên a khế 9/2024. Ngoh Y Sim Kƀuôr tối, kố cho tơdroăng hâk ro ôh tá xê to tơná ngoh mê ối tá mâu ngế tung rơpŏng hngêi.

“Á pêi cheăng a kŏng ti veăng tơlo liăn krê dêi kuăn pơlê la châ ăm mot Đảng, rơpŏng hngêi á ngế ki lâi xuân kơdrâ, sôk ro ƀă hâk tơngăm. Cho đảng viên mê á thế pêi tro tơdroăng cheăng, djâ troăng lĕm kơhnâ ahdrối ăm kuăn pơlê’’.

Rơtế pêi cheăng pro kŏng nhân a Kŏng ti veăng tơlo liăn pro meăm Thĕp ASEAN, đảng viên Y Hoan Ktul ối châ pôk pro ngế cheăng tung chi ƀô̆ kŏng ti hneăng hơnăm 2020-2025. Djâ troăng lěm kơhnâ tung mâu tơdroăng cheăng pêi, Y Hoan châ chi ƀô̆ xoăng hnoăng cheăng hlối hnê chông djâ môi ngế ki ê nếo kơhnâ rơkê tung pêi cheăng vâ ăm mot Đảng tung la ngiâ.

“Á đi đo hnê pơchân nhŏng o tung tôh, malối cho mâu nhŏng o mơngế Rơđế, thế mơ-eăm kơhnâ, veăng pêi mâu tơdroăng cheăng dêi Kŏng ti, pêi tro tơdroăng cheăng ki châ pơcháu, pro meăm thĕp vâ ai tơmeăm tê. Tâng mơ-eăm pêi cheăng kơhnâ ƀă ai tuăn tơmiât vâ mot đảng, mê mâu nhŏng o pin kô châ mot Đảng’’.

Chi ƀô̆ Kŏng ti veăng tơlo liăn pro meăm Thĕp ASEAN châ mơjiâng pro  hơnăm 2017, rôh apoăng ai 5 ngế đảng viên, troh nôkố hiăng ai 25 ngế. Pôa Trần Trung Tiến, Kăn hnê ngăn chi ƀô̆ ăm ‘nâi, châ tơmâng khât dêi mâu kăn kŏng ti, tơdroăng tơ’mot mơngế mot Đảng trâm hên tơdroăng ki tơ’lêi hlâu. Mâu hơnăm achê kố, hơnăm ki lâi chi ƀô̆ xuân tơ’mot  sap 3 troh 4 ngế mot đảng viên nếo, luâ kơ xô̆ pơcháu. Pôa Trần Trung Tiến tối, chi ƀô̆ dế mơ-eăm vâ mơnhông chiâng Đảng ƀô̆ a hơnăm 2026:

“Tung hơnăm 2025, chi ƀô̆ mơ-eăm ‘mot sap 3 troh 5 ngế đảng viên, tiô pơkâ dêi Đảng ủy Khô̆i mâu Kơ koan ƀă Khu mơdró kong pơlê Dak Lak pơcháu. Ngin hiăng tăng mơngế ki kơhnâ vâ hbrâ hriâm, hnê chêh pro lý lịch, mơnhên ngăn hồ sơ ƀă dế tơkŭm kĭ vâ tơ’mot tung pái khế  apoăng hơnăm 2025 kố ah ai 2 ngế’’.

Pôa Trần Quang Tân, Ngế phŏ pơkuâ hnê ngăn Đảng ủy Khô̆i mâu kơ koan ƀă Khu mơdró kong pơlê Dak Lak, ăm ‘nâi, lâp tung kong pơlê nôkố ai 11 tôh tơrŭm cheăng Đảng tung mâu khu mơdró ki pá kong khu mơdró, ƀă ai 537 đảng viên. Tung pơla hdrối kố nah, tơdroăng tơ’mot Đảng a mâu khu mơdró krê dêi kuăn pơlê ai mâu tơdroăng pêi tơƀrê, veăng gum mâu khu mơdró ki pêi cheăng tơniăn, gum Đảng achê tâ ƀă mâu ngế pêi cheăng, mâu ngế rơkê cheăng kâ. Pôa Trần Quang Tân tối:

“Rêm hơnăm, ngin mơ-eăm ’mot sap 16 ngế đảng viên tơngi klêng a khu mơdró kâ pa kong Tơnêi têa, tung mê ai sap 1- 2 đảng viên cho mơngế rak ngăn ‘na mơdró kâ. Troh hơnăm 2030, ngin kô mơjiâng tơ’nôm 2 troh 3 tôh tơrŭm cheăng Đảng a mâu tíu pêi cheăng ƀă 1 troh 2 khu tơrŭm cheăng dêi khu grup môi tiah đoân viên droh rơtăm, mâu lêng hneăng hdrối. Ki iâ gá ai 8% khu mơdró krê kuăn pơlê tung kong pơlê kô ai khu tơrŭm cheăng Đảng, ƀă ai đảng viên cho ngế pơkuâ khu mơdró veăng cheăng tung râ ủy”’.

Tơdroăng tơ’mot mơngế mot Đảng tung khu mơdró krê kuăn pơlê a kong pơlê Dak Lak ai mâu tơdroăng ăm hlo tơbrê, hiăng veăng ‘no hnoăng  a tíu pêi cheăng tơniăn, tơƀrê, veăng ‘no hnoăng mơnhông ‘na tơdroăng kal kí, cheăng kâ ƀă rêh ối pơlê pơla dêi kong pơlê Dak Lak thăm rế xông tơƀrê.