Kố cho hơnăm má 9 tơdroăng “Rơtế bă thái cô” châ tơkŭm po. Môi tung mâu tơdroăng cheăng ki tơƀrê dêi tơdroăng lăm pôu mâu thái cô a cheăm kơtiê xơpá kơpong 1, kơpong 2, kơpong 3 dêi kơpong hdroâng kuăn ngo ƀă kong ngo.

Tơdroăng ‘’Rơtế ƀă thái cô’’ xua Tíu xiâm Khu ngăn droh rơtăm Việt Nam tơrŭm ƀă Khu xiâm ngăn hnê hriâm ƀă hnê mơjiâng tuăn ngôa rơkê, Vi ƀan ngăn kuăn ngo ƀă Grup Thiên Long tơkŭm po rôh a poăng a hơnăm 2015, troh nôkố, tơdroăng kố hiăng khĕn kơdeăn 458 ngế thái cô kơhnâ rơkê veăng ‘no hên hnoăng tơná tung hnê mâu hok tro a pơlê cheăm,  chiâng mâu rôh ki pơ’lêh tơƀrê ƀă pơxúa tơdroăng hnê hriâm, hok tro ai tuăn ‘nâi vâ mơ-eăm tơkâ luâ xơpá, thái cô hnê tá hiâm tá mơno tơná, châ hok tro, nôu pâ hok tro, kuăn pơlê pâ nhoăm.