Khu kăn xiâm Đảng Kŏng sản Việt Nam, Kuô̆k hô̆i kong têa Cộng hòa xã hội chủ nghĩa Việt Nam, Kăn xiâm hnê ngăn  tơnêi têa Cộng hoà xã hội chủ nghĩa Việt Nam, Chin phuh tơnêi têa Cộng hoà xã hội chủ nghĩa Việt Nam, Vi ƀan xiâm Mặt trận Tơnêi têa Việt Nam ƀă rơpŏng hngêi khíu pâ mơjo pơtâng tối tiah kố:

Pôa Lê Văn Thành, kot mâ hâi lơ 20/10/1962; pơlê xiâm: cheăm Tân Liên, tơring Vĩnh Bảo,  pơlê kong kân Hải Phòng; ối a kơxố hngêi 217, troăng Lạch Tray, pơlê krâm Ngô Quyền, pơlê kong kân Hải Phòng; veăng pêi cheăng a khế 2/1988; mot Đảng hâi lơ 24/6/1997; Ngế cheăng tung tíu xiâm Đảng mâu hneăng 12, 13, Ngế cheăng tung Khu kăn Đảng, Chin phuh, Ngế pro xiâm phŏ hnê ngăn Chin phuh; Cho kăn hnê ngăn Đảng pơlê kong kân, Kăn hnê ngăn Hô̆i đong kuăn pơlê dêi pơlê kong kân Hải Phòng; Kăn Kuô̆k hô̆i hneăng 12. Pôa châ Đảng, Tơnêi têa diâp ăm Huân chương Pêi cheăng ối má Pái, Ngế lêng tơ’noăng tung lâp tơnêi têa ƀă châ mơhá ăm hên mê dai ki kơnía.

Klêi kơ’nâi tro châi ta mo râ, mơhé hiăng châ Đảng, Tơnêi têa, khu pú hên dêi mâu yăo sư, ƀok thái pơkeăng ƀă rơpŏng hngêi rak ngăn, pơlât la tơdroăng châi rế ó, pôa hiăng kơtê hiâm a 20 chôu 20 phut, hâi lơ 22/8.2023 (tơkéa vâ tối hâi lơ 7/7 hơnăm Qúy Mão) a hngêi krê tơná pôa, drêng pơ’lăng 61 hơnăm.

Vâ mơhno hiâm mơno pâ mơjo  ƀă mơnê hnoăng ki pôa Lê Văn Thành hiăng veăng ‘no tung plâ ối rêh, Khu Kăn xiâm Đảng Cộng sản Việt Nam, Kuô̆k hô̆i tơnêi têa Cộng hòa xã hội chủ nghiã Việt Nam, Kăn xiâm hnê ngăn tơnêi Cộng hoà xã hội chủ nghĩa Việt Nam, Chin phuh tơnêi têa Cộng hoà xã hội chủ nghĩa Việt Nam, Vi ƀan xiâm Măt trâ̆n tơnêi têa Việt Nam pơkâ tơkŭm pro leh mơdâm kiâ pôa Lê Văn Thành tiô túa leh mơdâm ‘mé kiâ râ Kăn xiâm tơnêi têa.

Tối tơbleăng mơdâm pôa Lê Văn Thành

Khu xiâm pơkuâ hnê ngăn Đảng hiăng pơkâ mơjiâng Khu pơkuâ tơdroăng mơdâm mơngế hlâ dêi Tơnêi têa ai 23 ngế; xua pôa Lê Minh Khái, Kăn xiâm pơkuâ hnê ngăn Đảng, Ngế pro xiâm phŏ hnê ngăn Chin phuh pro kăn Khu.

Poăng pôa Lê Văn Thành a Tíu xiâm Hneăng hôp pơlê kong kân Hải Phòng, kơxô̆ 18 Hoàng Diệu, pơlê kân Hồng Bàng, pơlê kong kân Hải Phòng.

Ăm kuăn pơlê pôu ngăn a 9 chôu, hâi pŭn, hâi lơ 24/8/2023 (cho hâi lơ 09 khế 7 hơnăm Quý Mão) troh 7 chôu, hâi tơdrốu, lơ 26/8/2023 (cho  hâi má 11 khế 7 hơnăm Quý Mão).

Tơbâ hnoăng a 7 chôu, hâi tơdrốu, hâi lơ 26/8/2023. Kơ’nâi mê lăm ‘mé a hdrối 11 chôu, hâi tơdrốu, lơ 26/8/2023 a Ilâng kiâ pơlê xiâm, cheăm Tân Liên, tơring Vĩnh Bảo, pơlê kong kân Hải Phòng.